Şäxes

Ilnur Kaşapow

«Sälät-Saba 2018» smenası direktorı

- Sälät oeşmasına niçek kilep eläkteñ?

- 2008-nçe elnı berençe tapkır bala bularak «Cälät-Kol Şärif onıkları» belän berlektä Bilärdä ütüçe forumga kildem. Älege moxitkä eläkkäç, şunda uk bu cirneñ miña bik yakın ikänen, monda bulırga telägänemne añladım.

- Sälätneñ 3 iñ yaratkan smenası.

- Iñ yaratkanam smenalarım ul – «Sälät-Çallı», «Sälät-Olimp» . Iñ berençe tapkır Yar Çallıda ütüçe «Cälät-Kol Şärif onıkları» smenasında bulıp kaytkaç, kiläse Sälät tormışımnı da Çallı şähärendä ütüçe smenalarda kürdem.

- Bügenge häm elekke Sälätne çagıştırıp närsä äytä alasıñ?

- Kübese kürgänçä, Sälät zamana belän ber adımda bara. Läkin, şuña da karamastan, ul xäzer dä üzendä gailä cılılıgın häm berdämlek köçen saklıy!

- Sälkeş ul – ...

- Sälkeş ul – bez buldırırga telägän yaşlek etalonı. Bez anıñ öçen icat itkän häm icat itäçäk berämlek.

- Äydaman ul – ...

- Äydaman ul – aerım ber yaşäü räweşe. Sälkeşlär öçen çın ürnäk.

- Üzeñneñ berençe äydamannarıñnı xäterliseñme?

- Älbättä, berençe äydamannarımnı, xätta, ber sistema bulıp eşli torgan komandanı xäterlim. Alarnıñ härberse dä zur mexanizmnıñ ber detale ide. Üzemneñ «Sälät-Saba» komandasında da şundıy sistema, berdäm mexanizmnı buldırasım kilä.

- Sineñçä, bezgä nindi proektlar citmi?

- Balalarnıñ xolıgın nıgıta aluçı sport proektları citmi dip sanıym. Bu cäyne «Sälät-Saba» smenası älege yunäleştä başlangıç nokta bulaçagına ışanam.

- Sälättäge bulgan eşçänlektän tış, närsälär belän şögıllänäseñ?

- Xäzerge wakıtta  üz-üzemne törle yaktan üsterü, eçke dönyamnı baetu belän şögıllänäm.

- Tatar telendä bulgan iñ yaratkan süzläreñ yaki gıybarä.

- Tirä-yakka karaganda, bar keşelär kürgänne kürsäñ dä, üzeñçä uyla.

- Sälkeşlärgä teläkläreñ.

- Ägär dä sez Sälättä ikän, dimäk sez iñ bäxetle balalar! Şunı belegez!

tulısınça ukırga

Nailä Battalowa

«Sälät-Gayrät 2018» smenası direktorı

- Sälät oeşmasına niçek kilep eläkteñ?

- Minem iñ berençe smenam «Sälät-Sanak», 2012-nçe el. Älege oeşmaga kuşılırga tanışım Ildar abıy Xäyrullin kiñäş itte. Soñınnan, näk menä ul berençe kuldaşıma, ikençe elga ölkän äydamanıma häm mäñgelekkä yaxşı dustıma äwerelde. (Elmaya)

- Sälätneñ 3 iñ yaratkan smenası.

- Älbättä, iñ yaratkan, yakın itkän smenam «Sälät-Gayrät». Monda min berençe tapkır äydaman, ölkän bularak üzemne kürsättem häm cäen, nihayat, direktor bulıp baraçakmın.

Ikençese – «Sälät-Şäxes». Çönki biredä ŞTK, kabatlanmas «Yoldızlı» moxite, küp kızıklı şäxeslär. Şulay uk balaçaktan yaratılgan «Sälät-Ruxiyat» smenasın aerıp äytä alam.

- Bügenge häm elekke Sälätne çagıştırıp närsä äytä alasıñ?

- Şäxsän minem öçen, Sälät härwakıtta da icat, üseş, därt, üzençälekle moxit berdämlege. Ellar ütkän saen, bu berdämlek yugalmıy. Kiresençä, nıgaya gına bara. Älbättä, oeşmabız gel üsä bara häm bü üz çiratında, bezne şatlandıra, kuandıra.

- Sälkeş ul – ...

- Sälkeş ul – almaz. Kayberläre şunda uk yaltırıy, bütännärenä ostaz kulları häm wakıt taläp itelä. Läkin sälkeşneñ balkıy torgan küzlären, añlauçı karaşın kürmiçä kalu mömkin tügel.

- Äydaman ul – ...

- Äydaman ul – ilhamlandıruçı. Äydäp baruçı, añlıy, yarata, därte belän urtaklaşa torgan keşe. (Näk menä şul ostaz)

- Üzeñneñ berençe äydamannarıñnı xäterliseñme?

- Älbättä! Min, xätta, üzemneñ berençe törkememne dä xäterlim – #altınçıtörkem ! Minem iñ berençe äydamannarım – Alsu apa Söläymanowa häm Marat abıy Ismagıylow. Alar – çiksez gayrät, zur mäxäbbät häm cılılık xise kuşıluı.

- Sineñçä, bezgä nindi proektlar citmi?

- Belgänebezçä, Sälät zur adımnar belän alga taba atlıy häm biredä, härber keşe dä üzenä yakın bulgan yunäleşne taba ala. Şäxsän miña, bik tä «Sälät»neñ ŞTK ligası oşıy ide. Älege ligadan üzlären respublika däräcäsendä häm annan çittä tanıta torgan kızıklı komandalar tuplandı. Şuña kürä, älege proektnıñ üsüen, üzenä yaña wäkillär cälep itüen telim.

- Sälättäge bulgan eşçänlektän tış, närsälär belän şögıllänäseñ?

- Xäzerge wakıtta Räsäy Däülät gadel xökem uniwersitetın tämamlıym, cırlıym, biim häm ŞTKda uynıym.

- Tatar telendä bulgan iñ yaratkan süzläreñ yaki gıybarä.

- Ilham, wägdä, gayrät.

- Sälkeşlärgä teläkläreñ.

- Üzegezgä räxät bulgan moxittän çıgırga kurıkmagız! Üzegezne härwakıt nindider yaña yunäleşlärdä sınap karagız. Härber mizgelneñ kadären belep, elmaep yaşägez!

tulısınça ukırga

Dilärä Kärimullina

«TALKış kalewe» ingliz telendä uzuçı diskussion klubınıñ citäkçese

- Sälät oeşmasına niçek kilep eläkteñ?

- 2013-nçe elda abıem Tahir Kärimullin kanikullarga «Sälät-Rauşan» alanına bardı. Smenadan, ul bik ilhamlangan, yaxşı xis-kiçereşlärgä bay bulıp kayttı. Mine bu bik tä kızıksındırdı. Şuña kürä, 2014-nçe elda min dä älege alanga barırga buldım. Häm şunı äytäsem kilä – ber dä ükenmim! (Elmaya)

- Sälätneñ 3 iñ yaratkan smenası.

- «Sälät-Rauşan», «Sälät-Rauşan» häm tagın ber tapkır «Sälät-Rauşan». Minem başka ber alanda da bulganım yuk. (Kölä)

- Bügenge häm elekke Sälätne çagıştırıp närsä äytä alasıñ?

- Sälättä min barı tik 4-nçe genä el. Şuña kürä, elek oeşmanıñ nindi bulganın, kızganıçka, äytä almıym. Läkin, anıñ progress belän ber adımda barganın küräm! Sälätneñ dönya buylap taralganın bik telim!

- Sälkeş ul – ...

- Gamsez keşe.

- Äydaman ul – ...

- Näticälek.

- Üzeñneñ berençe äydamannarıñnı xäterliseñme?

 -  Älbättä! Robert abıy häm Elza apa. Läkin, ul wakıtta min bik oyalçan idem, häm alar belän bik az aralaşuıma min nık ükenäm. (Moñsulandı)

- Bügenge köndä Sälättä närsä belän şögıllänäseñ?

- Xäzerge wakıtta min «TALKış kalewe» dip isemlängän ingliz telendä uzuçı diskussion klubınıñ citäkçese wazıyfasın başkaram.

- Sineñçä, bezgä nindi proektlar citmi?

- Sälättä törle illär biyuläre däresläre barlıkka kilsä, bik şäp bulır ide dip uylıym.

- Sälättäge bulgan eşçänlektän tış, närsälär belän şögıllänäseñ?

- Älege oeşmadagı eşçänlektän tış, üzemne aktiw räweştä student tormışında kürsätergä tırışam, fakultetımda studentlar fänni cämgıyate citäkçese rolen başkaram. Törle bäygelärdä dä katnaşırga yaratam.

- Tatar telendä bulgan iñ yaratkan süzläreñ yaki gıybarä.

- Talkış kalewe, Sälät, mäxäbbät.

- Sälkeşlärgä teläkläreñ.

- Barıgızga da üzegezne häm üz urınıgızna tabarga telim!

 

tulısınça ukırga

Säydäş Kamaliew

«Sälät-Kandrakül 2018» smenası direktorı

- Sälät oeşmasına niçek kilep eläkteñ?

- Äbiemneñ tırışlıgı belän 2006-nçı elda älege oeşmaga kildem. Ul wakıtta miña barı tik 13 yaş ide. Ul, minem Sälätneñ nindi dä bulsa ber alanına elägep, kızıklı, üzençälekle şäxeslär belän aralaşuımnı bik tä teläde.

- Sälätneñ 3 iñ yaratkan smenası.

- Minem iñ berençe smenam «Sälät-Rauşan 2006»; «Sälät-Rauşan 2009». Biredä, min üzemne 100% kürsätep, sarı galstukka iya buldım. Soñınnan, «Sälät-Kandrakül 2015». Älege alanda min üzemne citäkçe rolendä sınap karıy aldım.

- Bügenge häm elekke Sälätne çagıştırıp närsä äytä alasıñ?

- Sälätne 2006-2008-nçe häm 2017-2018-nçe ellarda çagıştırsak, gomumän, atmosfera üzgärmäde diyargä bula: ul haman da cılı, yaktı, pozitiw gayrätkä bay! Läkin täkdim itelä torgan mömkinleklärgä küz salsak, kollosal bulgan alga ırgılunı küzätä alabız. 2006-nçı elda bez alannarnıñ sanın 25 kilep citäçägen añlamıy da idek. Bezneñ wakıtta alar barı tik 5-6 gına buldı. Bilär forumınıñ da cäygä 6 tapkır, ä katnaşuçılarnıñ 500 tügel, ä 10 000 bulaçagın küz aldına da kitermädek! El däwamında oeşmada bulu mömkinlegenä berniçek tä ışanıp bulmıy ide. Çönki ul wakıtta internet anıñ kadär taralmagan, telefonnar barı tik knopkalı. Sälät Yortı da bügenge köndäge kebek küp funktsiyalärgä iya bulmadı. Şuña kürä, smena axırında küz yaşlärennän, çınnan da, «diñgez» cıela ide! (Elmaya)

- Sälkeş ul – ...

- Bik bäxetle keşe! Läkin, kızganıçka, ul küp oçrakta monı añlap betermi.

- Äydaman ul – ...

- Sälkeşlärne bäxetle itüçe, bu eştän läzzät aluçı.

- Üzeñneñ berençe äydamannarıñnı xäterliseñme?

- Äye, Yoldız apa belän Gölşana apa. Ul wakıtta alarga 21 häm 19 yaş ide. Bik şäp apalar! Min haman da älege smenanı iskä töşeräm. Bu smena minem tormışım öçen iskitkeç üzgäreş buldı disäm, ber dä yalgış bulmas.

- Bügenge köndä Sälättä närsä belän şögıllänäseñ?

- Xäzerge wakıtta üzemneñ şäp komandam belän üzençälekle «Sälät-Kandrakül» smenasına äzerlek alıp baram.

- Sineñçä, bezgä nindi proektlar citmi?

- Şäxsän min, biyu proektı kertep cibärer idem, çönki üzem biergä bik nık yaratam. Älege proektta zur mägnä küräm. Minemçä, ul Sälätne yaña baskıçka kütärer ide. Üzebez öçen küp kenä yaña sälätle keşelärne açıp, räxätlänep läzzätläner idek. (Elmaya)

- Sälättäge bulgan eşçänlektän tış, närsälär belän şögıllänäseñ?

- Hönärem geofizik- seysmorazwedki buença, kır eşkärtüçese bulıp eşlim. Çiksez respublikabıznıñ törle ölkälärenä barıp yörim. Şulay uk sport belän şögıllänügä dä küp wakıtımnı yunältäm. Akrobatika, sugışçan sängat (boewıe iskusstwa), jumpstyle biyu töre belän kızıksınam. Baş mien dä tonusta totırga onıtmıym. Monıñ öçen tellär öyränäm, matematika, fizika, seysmorazwedkaga, geologiyagä bagışlangan kitaplar ukırga yaratam.

- Tatar telendä bulgan iñ yaratkan süzläreñ yaki gıybarä.

- Bügenge köngä iñ yaratkan gıybarä – «Sälät Kandrakül, bez buldırabız».

- Sälkeşlärgä teläkläreñ.

- Sälkeş bulganıgızga, täkdim itelgän mömkinleklär belän kullana alganıgızga şatlanıp yaşägez. Balaçak ber tapkır gına bula, läkin, barısın da döres eşläsägez, şul 1 tapkır da citä. Şunı istä totıgız!

tulısınça ukırga

Dilärä Xaewa

«Sämrux-2017» el premiyaseneñ «El klubı» nominatsiyasendä ciñüçe «Sälät-Zäy» klubınıñ räise

- Sälät oeşmasına niçek kilep eläkteñ?

- Minem olı abıem «Sälät-Zäy» alanında başta sälkeş bulıp yal itte, soñınnan äydaman bulıp eşläde. Härber smenadan kaytkannan soñ, üzeneñ barlık xis-kiçereşläre, bulgan barlık çaralar, Sälät oeşması turındı söyli ide. Minem dä älege oeşmaga bik elägäse kilä ide, läkin, ul wakıtta min bik keçkenä idem. Nihayat, 2015-nçe elda bäxet miña elmaydı! Mine mäktäp aktiwistı bularak Sälät klubları seminarına çakırdılar. Älege seminardan soñ, min tulısınça Sälät dönyasına kerep kittem.

- Sälätneñ 3 iñ yaratkan smenası.

- Minem iñ berençe yal itkän smena – «Sälät-Rauşan». Soñınnan, «Sälät-Samara»da buldım. Ä inde iñ yaratkan – «Sälät-Iske Kazan».

- Bügenge häm elekke Sälätne çagışıtırıp närsä äytä alasıñ?

- Eldan-el Sälättäge tormış üzenä bik kızıklı, üzençälekle formatlar tabıp yaşi. Biredä yaña alannar, yaña şähärlär, şäxeslär belän tanışular, mömkinleklär barlıkka kilä.

- Sälkeş ul – ...

- Sälkeş ul – gadi bala tügel. Ul – härwakıt üzeneñ säläte, üseşe östendä eşli torgan şäxes. Sälkeş berkayçanda ber urında tormıy, wakıt belän ber adımda bara, üze öçen härwakıt nindider yañalıklar aça. Anıñ öçen dönya – ilham ala torgan moxit.

- Äydaman ul – ...

- Äydaman ul – balanıñ üseşe öçen härwakıt döres yul tabarga yardäm itüçe, üzeneñ belemnäre belän urtaklaşuçı.

- Üzeñneñ berençe äydamannarıñnı xäterliseñme?

- Älbättä! Minem berençe äydamannarım – Aliya apa Äxmätowa häm Tahir abıy Kärimullin. Alar bik sälätle, pozitiw, eçkersez häm iñ kaygırtuçan keşelär!

- Bügenge köndä Sälättä närsä belän şögıllänäseñ?

- Sälättä bügenge köndä «Sälät-Zäy» klubınıñ räise wazıyfasın ütäp kiläm. Älege klubnı min 2016-nçı elda oeştırdım. Klub belän aktiw räweştä mäktäp bazasında inde 2 el däwamında eşçänlegebezne alıp barabız. Bu eş belän räxätlänep şögıllänäm, läkin, yaratkan eşem belän saubullaşırga turı kiläçäk, min bu elnı mäktäpne tämamlıym, şunısı kızganıç. Äle küptän tügel genä bez «Sämrux-2017» premiyaseneñ «El klubı» nominatsiyasendä ciñüçe isemenä laek buldık. Bu – bezneñ iñ zur kazanışıbız!

- Sineñçä, bezgä nindi proektlar citmi?

- Sälättä şaktıy gına proektlar bar. Bu sorauga cawap birergä awırsınam.

- Sälättäge bulgan eşçänlektän tış, närsälär belän şögıllänäseñ?

- Minem tormışım bik eçtälekle! 7 yaştän başlap biyu, ŞTK belän kızıksınam, törle şähär çaralarında katnaşam. Ber atna elek Zäy rayonı başlıgı aldında klubıbız eşçänlegenä bagışlangan doklad belän çıgış yasadım.

- Tatar telendä bulgan iñ yaratkan süzläreñ yaki gıybarä.

- «Bez berdäm, bez köçle, Sälätkä bez räxmätle», «Tırışkan tabar, taşka kadak kagar»!

- Sälkeşlärgä teläkläreñ.

- Kuelgan maksatlarıgızga härwakıt ireşegez! «Bez buldırabız» dewizı belän yaşägez!

tulısınça ukırga

Alsu Ganiewa

«Sälät-Ostalar bistäse 2018» alanı direktorı, «Sälät-Şäxes 2018» alanı ölkän äydamanı.

- Sälät oeşmasına niçek kilep eläkteñ? 

- 155-nçe nomerlı tatar gimnaziyasen tämamladım. Berençe sıynıflardan uk yugarı sıynıflarda ukuçılardan Sälät oeşması turında bik eş işettem. Läkin, anda niçek kerep elägäsen añlamıy idem. Şulay itep, min 8-nçe sıynıfta ukıgan çakta bezgä oçraşuga bezneñ mäktäpne tämamlagan Emil Şaydullinnı çakıralar. Sıynıf sägaten ütkärgännän soñ, anıñ östendä Sälät simwolikasın kürep, oeşma turında soraşa başladık. Näk menä anıñ yardäme belän min Sälät dönyası belän tanıştım. Ä inde berniçä el ütkännän soñ, Emil minem kuldaşıma äylände. 

- Sälätneñ 3 iñ yaratkan smenası. 

- Min yal itkän, eşlägän smenalar da minem öçen bik kaderle! 

- Bügenge häm elekke Sälätne çagışıtırıp närsä äytä alasıñ? .
 
- Miña kalsa, bügen mömkinleklär şaktıy kübräk. Sälät eldan-el üsä. Biredä alannar, proektlar, xätta, forumnar sanı da arta bara. Härber keşe bu oeşmada üzenä yakın yulnı saylap, anıñ buença atlıy ala. 

- Sälkeş ul – ... 

- Bezneñ kiläçäk. 

- Aydaman ul – ... 

- Härwakıt yardämgä kilüçe dus, ostaz. Näk menä ul barlık köçlärne döres yakka yunälderergä bulışuçı keşe. 

- Üzeñneñ berençe äydamannarıñnı xäterliseñme? 

- Älbättä, xäterlim! Minem berençe äydamannırım – ul da bulsa, minem küptänge tanışlarım, bezneñ gimnaziyane tämamlagan ukuçılar buldı. Alarnı kürergä genä tügel, bergä eşläp kararga da bik şat idem. Berençe äydamannarım miña Sälät dönyasına tulısınça kerep kitärgä yardäm ittelär. 

- Bügenge köndä Sälättä närsä belän şögıllänäseñ? 

- 2011-nçe eldan başlap Sälät Yortınnan kitmiçä genä yaşim diyargä dä bula. Barlık çaralarda, proektlarda katnaşırga tırışam. Xäzerge wakıtta ike cäyge alan programması östendä eşlim – «Ostalar bistäse» häm «Şäxes» smenaları. 

- Sineñçä, bezgä nindi proektlar citep betmi? 

- Sälät zur adımnar belän alga atlıy. Kaywakıt kayber yañalıklar artınnan ölgerep tä bulmıy. (Kölä) Minemçä, biredä proektlar citärlek. Alarnıñ sıyfatı östendä tagın da köçleräk eş alıp barılsa, bik şäp bulır ide! 

- Sälättäge bulgan eşçänlektän tış, närsälär belän şögıllänäseñ? 

- Sport, biyu, kul eşläre, cämägat eşçänlege. 

- Tatar telendä bulgan iñ yaratkan süzläreñ yaki gıybarä. 

- Aş bulsın, bergä bulsın! Bezdä Alga digän genä süz bar! Afärin! Döresen genä äytkändä, barlık tatar süzläre dä bik matur. Alar arasınnan aeruça – min sine yaratam, bäxet, çıñ küñeldän, maturım, koyaşım digän süzlärne işetü bik räxät. 

- Sälkeşlärgä teläkläreñ. 

- Berkayçanda üzegezne yaña ölkälärdä sınarga kurıkmagız. Tormıştagı barlık mömkinleklär belän kullanırga aşıgıgız. Sez – tormışıgıznıñ xucaları. Barlık mizgellärdän dä läzzät alıgız.
tulısınça ukırga

Arman Kostanyan

«Sälät-Tel 2018» alanı direktorı

- Sälät oeşmasına niçek kilep eläkteñ? 
- 2014-nçe elda smenalar başlanır aldınnan «Sälät» yaşlär üzäge direktorı Aygöl Gabdraxmanowa mine «Sälät-Rauşan» ga xoreograf bularak çakırdı. Älege alanda bulgan cılı moxit mine üzenä şunda uk gaşıyk itte. Şul eldan başlap min Sälät dönyasında yaşim. Nihayat, bu elnı «Sälät-Tel 2018» alanınıñ direktor wazıyfasın başkaram. 
- Sälätneñ 3 iñ yaratkan smenası.
- Sälättä bulgan wakıt eçendä min barı tik «Sälät-Rauşan» da gına bulganım bar. Näk menä anı iñ yaratkanı dip äyter idem. Läkin şul uk wakıtta, xäzer küñelemä «Sälät-Tel» alanı häm «Sälät-Olimp» mäktäbe dä bik yakın. 
- Bügenge häm elekke Sälätne çagışıtırıp närsä äytä alasıñ?
- Kızganıçka karşı, min älege oeşmada barı tik 4 kenä el bulu säbäple, elek bulgan häm bügenge Sälätne berniçek tä çagıştıra almıym. 2000-nçe ellarda anıñ nindi buluın min barı tik küz aldına gına kiterä alam. 
- Sälkeş ul – … 
- Ul – çınnan da bik sälätle bala. Sälkeş, gadi alanga baruçı gadi baladan şaktıy aerılıp tora. Minem fikeremçä, Sälättä portfolio buença ütä torgan bäyge, bezgä sälätle balalarnı kübräk tuplarga, alarnı onıtmaska yardäm itä. 
- Äydaman ul – ...
- Sälkeşneñ «öçençe äti-änise». (Kölä) Ul – sälkeşne üz balasın kebek saklauçı, yaklauçı, üsterüçe dip sanıym. 
- Bügenge köndä Sälättä närsä belän şögıllänäseñ?
- Xäzerge wakıtta «Sälät-Tel 2018» alanınıñ direktorı häm «Sälät-Olimp» mäktäbeneñ yardämçese wazıyfaların başkaram. 
- Sineñçä, bezgä nindi proektlar citep betmi?
- Älbättä, Sälättä törle proektlar şaktıy küp. Läkin, minemçä, biredä biyu häm KWN kollektiwları barlıkka kilsä, bik şäp bulır ide. 
- Sälättäge bulgan eşçänlektän tış, närsälär belän şögıllänäseñ? 
- Sälättän tış Innopolis litseenda matematika fänen ukıtam, TNW telekanalında çıga torgan «W seti» tapşıruınıñ awtorı häm alıp baruçısı, KXTInıñ 1 kurs magistraturasında belem alam häm şulay uk wideobloger bulıp ta sanalam. YouTube saytında üzemneñ «Arman-gurman» dip isemlängän kanalım bar. 
- Sälkeşlärgä teläkläreñ.
- Sälkeşlär, sezgä maksimal räweştä produktiw buluıgıznı telim. Cäyge alannarda gına tügel, tormışta da şundıy bulıp kalıgız. Ä menä inde smenalarda sezne, barlık mäglümatnı «yotıp baruçı» «gubka» formatında kürergä bik şat bulır idem. Iñ möhime, kürenekle keşe bulıp üsegez! 

tulısınça ukırga

Rufat Kıyamow

«Sälät-Ruxiyat 2018» smenası direktorı

- Sälät oeşmasına niçek kilep eläkteñ?
- Sälätkä 2010-nçı elda kilep eläktem. Iñ berençe tapkır «Sälät-Kol Şärif onıkları» alanına barırga mömkinlek tudı. Biregä mine mäktäptä häm başka yunäleşlärdä aktiw bulganım öçen çakırdılar. 
- Sälätneñ 3 iñ yaratkan smenası.
- Xäzerge wakıtta minem öçen alar: «Sälät-Kol Şärif onıkları», «Sälät-Ruxiyat», «Sälät-Saba». 
- Bügenge häm elekke Sälätne çagışıtırıp närsä äytä alasıñ? 
- Älbättä, bik küp äyber üzgärde. Misal itep alan häm forumnarnıñ sanın kiterep bula (25 häm 6). Bu elnı alar rekord däräcäsenä kilep citte diyargä dä mömkin. Şäxsän minem fikeremçä, xäzerge wakıtta balalarga bezgä karaganda mömkinleklär kübräk birelä. Bu, älbättä, oeşmanıñ zur adımnar belän alga baruın kürsätä.
- Sälkeş ul – …
- Minem öçen ul – koyaş nurı. 
- Äydaman ul ... 
- Abstrakt yaktan karasak, ul – koyaş nurına cirdä urın tabırga yardäm itüçe, döres yul kürsätüçe. 
- Üzeñneñ berençe äydamannarıñnı xäterliseñme?
- Älbättä! Berençe äydamanımnıñ iseme Kayrat. Bälki, ul Sälättä bik tanılmagan da, läkin alanda ul bik möhim rol uynıy ide. Kübesenä ul çın ürnäk bulıp tordı diyargä bula. Monıñ öçen aña aerım räxmät süzläre äytäse kilä. 
- Bügenge köndä Sälättä närsä belän şögıllänäseñ?
- Xäzerge wakıtta «Sälät-Ruxiyat 2018» smenasınıñ direktor wazıyfasın alıp toram, cäygä äzerleklär belän yanıp yörim. Şul uk wakıtta R.Bikmullin isemendäge muzıkal-şigriyat festiwaleneñ başkarma direktorı bulıp sanalam. 
- Sineñçä, bezgä nindi proektlar citep betmi?
- Bez barıbız da oeşmanıñ aktiw räweştä üsep baruın, üze belän küp kenä mömkinleklär alıp kilgänen härwakıtta küz aldında totabız. Läkin kamillikkä omtılunıñ çige yuk! Miña kalsa, xäzerge wakıtta biredä sport yunäleşenä igtibar birelmi. Sport çaraları kabattan oeşma eşçänlegenä kertelsä, älege yunäleş belän kızıksınuçı balalar sanı da artır ide. 
- Sälättäge bulgan eşçänlektän tış, närsälär belän şögıllänäseñ?
- Min törle yaklap üsergä, ictimagıy eşlär belän şögıllänergä yaratam. Zur tırışlık belän Kazan Federal uniwersitetınıñ Xalıkara mönäsäbätlär, tarix häm könçıgışnı öyränü institutında studentlarnıñ törle yunäleşlär buença üseşe belän mawıgam. Studentlar sowetınıñ citäkçese, profsoyuz oeşmasınıñ räise wazıyfaların ütäp kiläm. Döresen äytkändä, studentlarnıñ xokukların häm mänfägatlären yaklarga yaratam. Şulay uk yaratkan şögıllärneñ berse – studentlar kuya torgan kontsertlarga rejissura yagınnan yardäm itü. Häm kübese beläder, ŞTKda uynau minem iñ yaratkan şögılem. Kabattan älege uenga kaytırga, säxnägä menergä cıenam. 
- Tatar telendä bulgan iñ yaratkan süzläreñ yaki gıybarä.
- «Xäräkättä-bäräkät!» Tormışımnıñ dewizı: «Härwakıtta keşe bulıp kal!» 
- Sälkeşlärgä teläkläreñ.
- Sälkeşlärgä küñeldä härwakıtta da bala bulıp kaluın, dönyaga, äylänä-tirägä açık küzlär belän karaunı telär idem! Bernindi mömkinlekne dä kulıgızdan ıçkındırmagız! Täwäkkäl bulıgız!

tulısınça ukırga

Kamilä Hadiewa

«Sälät-Bua (Gayrät) 2018» smenası direktorı

- Sälät oeşmasına niçek kilep eläkteñ? 

- Iñ berençe bulıp 2009-nçı elda «Sälät-Sanak» alanına barırga mömkinlek tudı. Häm menä inde 8-nçe el rättän Sälät moxitenä kümelep yaşim. 

- Sälätneñ 3 iñ yaratkan smenası. 

- Barısın da yaratam! (Kölä) Minemçä, härber smena üzençälekle. Şuña kürä barı tik berniçäne genä saylarga bik kıen. Sälättä yaratmagan, oşamagan smenalar berniçek tä bula almıy! (Kölä) 

- Bügenge häm elekke Sälätne çagışıtırıp närsä äytä alasıñ? 

- Töp-tögäl şunı äytä alam, Sälät üskän saen, anıñ keşeläre dä arttan kalışmıyça üsä bara. Biredä icadi yaşlärneñ üseşenä törle mömkinleklär karalgan: forumnar, yaña smenalar häm proektlar. 

- Sälkeş ul - ... 

- Icadi bala. 

- Äydaman ul - ... 

- Ber ük wakıtta abıy da, apa da, äti-äni dä. Bu keşe sälkeşlärne üsterä, tärbiya häm yaña belemnär birä. 

- Üzeñneñ berençe äydamannarıñnı xäterliseñme? 

- Älbättä! Berençe äydamannarım Rinaz abıy belän Almira apa ide. Bügenge köndä dä alar belän bik yaxşı mönäsäbätlärdä. Küreşkän saen, äydamannarıma Sälätkä karata mäxäbbät uyatkan öçen räxmätläremne äytäm. Çönki, näk menä alar yardäme belän min haman da bu moxittä. 

- Bügengä köndä Sälättä närsä belän şögıllänäseñ? 

- Xäzerge wakıtta «Gayrät» smenasına äzerlek alıp baram, kayber çaralarda häm «Sämrux» premiyasendä katnaşam. 

- Sineñçä, bezgä nindi proektlar citep betmi? 

- Sälät belem birü mäktäbe häm şulay uk Sälät uniwersitetı! 

- Sälättäge bulgan eşçänlektän tış, närsälär belän şögıllänäseñ? 

- Xäzerge wakıtta rus tele ukıtuçısı belemen alır öçen magistraturanıñ berençe kursında ukıym, eşlim häm, älbättä, törle yaklap üsergä tırışam. 

- Tatar telendä bulgan iñ yaratkan süzläreñ yaki gıybarä. 

- Xörriyat, omtılış, sizger, dägwä. Älege dürt süz – «Gayrät» smenasınıñ törkem isemnäre. 

- Sälkeşlärgä teläkläreñ. 

- Sälkeşlärgä barı tik ber urında tormaska häm härwakıt elmaep yaşärgä telär idem.

tulısınça ukırga

Färid Sadriew

«Sälät-Bögelmä 2018» alanınıñ direktorı

- Färid, niçek sin Sälät xäräkätenä kuşıldıñ?

- Min Sälätkä 2012-nçe elda kildem. Äti-äniem mine «Sälät-Sanak» smenasına cibärde.

- Sineñ Sälättä 3 iñ yaratkan smenañ.

- «Bögelmä», «Tel» häm «Fänsar» mäktäbe sessiyase. 

- Sälätne ütkän häm bügenge Sälät belän çagıştır äle.

 - Elek Sälät kübräk yabık, atmosferalı xäräkät ide. Xäzer inde ul yañadan-yaña proektlar aça, üsä, yugarıga kütärelä.

 - Sälkeş – ul… 

- Üzeneñ mömkinlekläre çiklärennän çittä yaşärgä laeklı keşe.

 - Äydaman – ul... 

- Döres yulga yunältüçe, küp kenä keşelärneñ üzeneñ gamälläre belän dönyaların üzgärtüçe. 

- Berençe äydamannarıñnı xäterliseñme?

- Älbättä. Bik yaxşı keşelär – Adelya apa Garipowa häm Bulat abıy Näcipow.

- Sin xäzer Sälättä närsä belän şögıllänäseñ?

- Bez, balalarnıñ küñellärendä istä kala torgan şäp smena östendä eşlibez.

Sineñçä, bezgä tagın nindi proektlar citmi?

 - Sälät häberber ildä bulsın ide, çönki illär yañalıklarga öyrätälär.

 - Sälät eşçänlegennän tış, närsä belän şögıllänäseñ?

- 4-nçe kursnı tämamlıym, diplom yazam, futbol uynıym, tormışnıñ här mizgelennän räxätlek tabıp yaşim.

- Tatar telendä iñ yaratkan süzläreñ, gıybarälär.

 - Miña «tırışkan tabar, taşka kadak kagar» digän äytem bik oşıy.

- Sälkeşlärgä teläkläreñ.

- Sälät – mömkinleklär moxite ikänen añlarga kiräk, ä mömkinleklär keşelärdä – çiksez. Fantaziyagezne eşkä cigegez, uylagız, uylap tabıgız, xıyallarıgıznı tormışka aşırıgız!

tulısınça ukırga

Läysän Sabitowa

«Sanak-lab» uku-ukıtu laboratoriyaseneñ citäkçese

-         Läysän, Sälätkä niçek kilep eläkteñ?

-         Mäktäp ellarında matematikadan olimpiadada katnaştım, şunda Sälät turında işettem. Berençe tapkır «Sälät-Rauşan 2006» alanına eläktem.

-         Berençe äydamannarıñnı xäterliseñme?

-         Äye, älbättä. Lyutsiya apa belän Albina apa. Lyutsiya apa Zakircanowa bügen dä Sälät proektlarında katnaşa äle: törle psixologik treninglar, däreslär ütkärä.

-         Sarı galstugıñ barmı soñ?

-         Yuk, min bik tıynak sälkeş idem. Berençe tapkır äydaman bulgaç, balalarnıñ mäxäbbäten toydım, alar öçen üsäse, üzgäräse kilde. Üzem dä balalarnı bik yarattım: bolar barısı da mine bügenge xalätemä kiterde. 3 el äydaman buldım, 2 tapkır ölkän äydaman, annarı direktor däräcäsenä kütäreldem. Eşlärgä teläü häm balalarnı yaratu miña açılırga yardäm itte. Äydaman bulgaç sin tınıç häm tıynak kına bulıp kala almıysıñ, bu isemne gorur yörtü kiräk.

-         Berençe kürgän häm bügenge Sälätne çagıştır.

-         Awır bu. Berençe tapkır äydaman bulu xislären äytep-añlatıp beterü mömkin tügel. «Sälät-Rauşan 2006» min bulgan iñ kızu smenalarnıñ berse buldı. «Sanak 2016» da xis-kiçereşlär däräcäse buença şuşı smenaga tiñ. Çagıştırırga awır: elek bala küzlegennän çıgıp karasam, xäzer cawaplı direktor bularak küzätäm.

-         Berläşmädäge tatar tele däräcäsen niçek bäyaliseñ?

-         Ul gel xäräkättä. Berläşmädäge tatar tele däräcäse härwakıt «möhim» statusında buldı. Ellar belän anıñ ähämiyate tagın da üsä bara.

-         Sineñçä, Sälätkä nindi proektlar citmi?

-         Äle küptän tügel genä «Sälät-Bäläkäç» citmi ide. Iñ keçkenä katnaşuçılar öçen mondıy proekt bik kiräk. Ul miña bik oşıy, anıñ aşa Sälätkä iñ keçe yaştän elägep bula.

-         Sälkeşlärgä teläkläreñ?

-         Elmaegız, gel üseştä, xäräkättä bulıgız, maksatlarıgızga ireşegez. Sälätne yaratıgız! 

tulısınça ukırga

Miläüşä Safina

Sälät weteranı, «Bikafest2017» festiwalendä «Awtor-başkaruçı» nominatsiyasendä 1-nçe urın

Sälätkä niçek kilep kerdeñ? Söyläp üt äle.

- Sälät belän min 2005-nçe elda tanıştım. Şunnan soñ ber el uzgaç «Sälät-Rauşan» smenasına sälkeş bulıp kildem. Berniçä el «Äydamannar mäktäbe» proektında aktiw katnaştım, şunnan 2 el rättän «Sälät-Ruxiyat»kä äydaman bulıp bardım. Sälät tarixında wokal däresläre alıp bargan kızçık bularak ta belälärder mine küpläre. 2009-nçı elda «Selet Prague School» proektında katnaştım.

- Sälätneñ öç yaratkan smenası.

- Minem öçen «Sälät-Ruxiyat» iñ yakını!

Sarı galstugıñ barmı?

- Bar. 2006-nçı elda aldım.

Bügenge köndä Sälättä nilär belän şögıllänäseñ.

- Inde 8 el Sälät belän aralaşkanım bulmadı, üzemneñ telägem belän kitmädem, tormış üze xäl itte. Läkin Sälätne, andagı duslarımnı gel sagınıp yaşädem häm menä bügen  R.Bikmullin festiwale aşa Sälätke yaña adımımnı yasadım. Kiläçäktä Sälät proektlarında katnaşırga telägem bik zur.

- Sälätkä nindi proektlar citmi dip uylıysıñ?

- Balalar öçen «Sälät-Bäläkäç» proektı bar ikänen beläm. Minem telägem -  mömkinlekläre çikle bulgan balalar öçen kiläçäktä ber yunäleş başlap cibärsälär, räxätlänep katnaşır idem.  

- Sälättän tış närsä belän şögıllänäseñ?

- Soñgı ellarnı min tormışımnı kızım Märyamgä bagışladım, tormış awırlıklarına bireşmim. Xäzer äkrenläp eşli dä başladım inde, allaga şöker, icat mäktäbendä wokal ukıtam, yañadan säxnägä kaytırga tırışam, kıskası, icat belän şögıllänäm, yaña cırlar östendä eşlim, «Yaña däwer» muzıkal proektında katnaşam.

- Tatar telendä iñ yaratkan süzläreñ, bälki cömläläreñ.

- «Minem matur kızım». Köngä 50 tapkır kabatlıym.

- Sälkeşlärgä teläkläreñ.

- Sälättä bulgan wakıtıgıznı maksimal räweştä faydalı itep uzdırırga öyränegez. Kurıkmagız, oyalmagız. Minem tormışımda da Sälät bar dip söenep yaşägez.

tulısınça ukırga

Roman Strelnikow

Sälät proektlarında katnaşuçı


- Sälätkä kayçan häm niçek kilep kerdeñ, söyläp üt äle.

- Ber dä uylamaganda buldı ul.  2015-nçe elda Rezeda apa Safina (bez anıñ belän KWNda uynagan idek) «Sälät-Tel» alanına äydaman bulıp barırga täkdim itte. Min şunda uk anıñ fikeren xuplap rizalaştım, çönki Sälät turında bik küp işetkänem buldı. Kızganıç, ul elnı «Tel»gä bara almadım,  läkin  «Bolgar-Tugan tel 2015»  forumına Ruslan Zakirow komandasına eläktem

- Sälätneñ öç yaratkan smenası.

- Älbättä, «Sälät- Şäxes», 2015-2017-nçe ellarda katnaştım, här elnı yañalık häm üzençälek bar bu smenada.  KWN küñelemä yakın bulgaç, «Şäxes» tä yakın. «Sälät-Aznakay» smenasın şulay uk bu rätlärgä kertä alam. Bu smenada keşe az, läkin bez bertugan kebek yakın. «Sälät-Sanak 2016» isä mine oeştıruçı  rolendä sınap karadı.  Seremne açam: «Fänsar»da şäp, läkin «Zwezdnıy»da räxäträk! (Kölä)

- Uzgan ellardagı Sälät belän bügengesen çagıştırıp kara äle.

- Min KWN uennarı fanatı, läkin küp keşedän xäzerge KWN inde ul elekkege tügel digän süzlär işetäm. Sälät turında mondıy süzlär yörmi. Çönki monda härkem üzen yaña yaktan aça ala.

- Sälkeş – ul…

- Sälkeş –  üz aldında bik küp mömkinleklär aça torgan  şäxes.

- Berençe äydamannarıñnı xäterliseñme?

- Albina apa Kadirowa häm Albina apa Mirmiewa. Näk menä alar minem äydamanlık kareramda yardäm kulın suzdılar, min alarga räxmätle.

- Äydaman – ul…

- Äydaman ul  – karañgıda yaktırtıp toruçı şäm. Äydaman aldında bik küp cawaplılık tora. Ul sälkeş öçen dä, sälkeşneñ säläten açu öçen dä cawaplı. Äydaman – ürnäk bulırday şäxes.  Äydaman wägdäse härwakıt ütälergä tieş. Öçençedän, äydaman – gailäneñ ber ägzası.  

- Bügenge köndä Sälättä nilär belän şögıllänäseñ. 

- 2018-nçe elnıñ kızu cäenä äzerlänäm.

- Sälätkä nindi proektlar citmi dip uylıysıñ?

- Sälät KWN ligası citmi.

- Sälättän tış närsä belän şögıllänäseñ?

- KWN uynıym, ukıym häm eşlim. Täülektä 30 sägat bulsın ide dip xıyallanıp yaşim.

Uñışlarıñ turında da söyläp uzsañ ... 

- KFUnıñ KWN ligasında katnaşıp öç tapkır finalist buldım, «Respublika» ligasında yarımfinalga çıktım, şaxmat uenı buença küp kenä kazanışlarım bar.


- Tatar telendä iñ yaratkan süzläreñ, bälki cömläläreñ.

- «Şäxes» smenasında eş kabatlana torgan süz: «kanägatländerü». (Kölä) Ä bolay Abdulla Aliş icatın yaratam

- Sälkeşlärgä teläkläreñ.

- Dus bula belegez, duslıknı saklıy  belegez. Sälätegezne kürsätergä häm açarga oyalmagız. Här keşe – şäxes, şuña ışanıgız häm üz östegezdä eşlägez. Sälät sezgä yardäm itäçäk!

 

 

 

tulısınça ukırga

Dinä Gabdraxmanowa

Sälät proektları katnaşuçısı

- Sälätkä niçek kilep kerdeñ, söyläp kit äle

- 2010-nçı elda apam «Sälät-Tel» alanına bargan ide, änilärem kızıgıp isä mine «Sälät-Şäxes»kä cibärdelär. Şul elnıñ awgustınnan başlap min Sälät moxitendä. 

- «Sälät-Tel», «Sälät-Şäxes» yaisä «Sälät-Rauşan»? 

- RAUŞAN! Üsterde, öyrätte, yarattırdı, mömkinleklär birde, ışandırdı, elattı häm köldertte. #rauşanyorekte

- Uzgan ellardagı Sälät belän bügengesen çagıştırap kara äle? 

- Sälät, älbättä, üzgärde. Kaysı yakka ikänen härkem üze belä. Sälät üsä. Bez üzebez dä üskäç, ul da üsä. Minem öçen ul küñelle smena, tanışular, duslaşular...

Sarı galstugıñ barmı?

- Äye, bar. 2011-nçe elda «Sälät-Şäxes» aldım. Bu minem gomeremdä öçençe smena ide. Äydamannarım – Almaz abıy Sadıykow häm Gölçäçäk apa Gafarowa ide. Wakıt uzgannan soñ min şunı añladım: sarı galstukka min ul wakıtta äle barıber iya bulırga tieş tügel idem, üsep citmägän idem. 2015-2016-nçı ellarda «Sälät-Rauşan» smenasında alırga tieş idem kebek. 

Sälkeş – ul ....

- Sälkeş – kiñ küñelle, açık yöräkle, maksatçan, läkin kaywakıt yukka borçıla torgan keşe. Bu oçrakta alarga äydaman yardämgä kilä.

Berençe äydamannarıñnı xäterliseñme?

- Äye. Aygöl apa häm Elmira apa. Elmira apanı berniçä el elek kürgän idem, ä Aygöl apanı, kızganıç, küptän kürgän yuk.

Äydaman - ul ...

- Supergeroy. Äydaman – ukıtuçı, sensey. Bilgele ber ölkä buença gına tügel, häryaklap talantlı şäxes.

Sälättä bügenge köndä nilär belän şögıllänäseñ?

- Buanıñ ike klub kuratorı, smenalarda äydaman bulıp katnaşam. Äle menä bu könnärdä genä «Fänsar» mäktäbeneñ közge sessiyasendä äydaman bulıp kayttım.

Sälätkä nindi proektlar citmi, sineñçä?

- Miña kalsa, muzıkaga kagılışlı ostaxanälär uzdırsak şäp bulır ide. Bitbokska öyrätü, mikşer belän eşläü, iñ möhime, zamança yunäleştä. Kiläçäktä bälki bäyge formatına da üzgärtep bulır ide.

Sälättän tış närsälär belän kızıksınasıñ?

Bankir hönären sayladım. 3-nçe kursta ukıym.

Ireşkän uñışlarıñ?

- Belmim dä inde.... Başıma kilgän iñ berençe uy – min xäzer üstem, keşe bularak üstem. Min äti-äniläremneñ süzen tıñlasam da, min xäzer möstäkıyl. Äydaman bulıp eşlägän smenalarda tanışkan balalarım miña üz kazanışları turında yazsalar, min bik şatlanam. Alar öçen gorurlanam. 

- Tatar telendä yañgıragan yaratkan süzläreñ, bälki tsitatalarıñ? 

- «Neçkäbil», «Färeştäm», «Sin minem canımnıñ yartısı», «Kiläçäk bügennän häm sinnän başlana».

Sälkeşlärgä teläkläreñ?

Ber eştän dä kurıkmagız. Barlık eşkä dä alınıgız. Üz östegezdä eşlägez, belemegezne başkalar belän dä urtaklaşıgız. Ber urında tuktalıp kalmagız. 

tulısınça ukırga

Aydar Yakupow

Sälät proektları katnaşuçısı

- «Sälät»kä kilep kerü tarixıñnı söyläp üt äle? 

- «Sälät»kä min uylamaganda gına kilep kerdem. Ul wakıtta 10-nçı sıynıfta ukıy idem. «Sälät» xakında gomumän işetkänem yuk ide. Könnärdän ber könne dustım Timur Nazarow gariza tutırırga täkdim itte. Şulay itep mine «Sälät-Rauşan» smenasına aldılar.

- «Sälät»neñ 3 yaratkan smenası?

- «Sälät-Rauşan», «Izge Çişmä», «Bolgar Tugan-Tel» häm «Sälät-Bögelmä». Soñgısında bulganım yuk, läkin ul smena miña oşıy.

- Uzgan ellardagı «Sälät» belän bügenge «Sälät»ne çagıştırıp karasañ.

- Kayberäülär äytä: «Sälät» inde elekkege tügel, «Sälät» xäzer başka.  Min monıñ belän kileşäm. Bez ber urında basıp tormıybız, härkön yañalıkka omtılabız. Sälät bezneñ belän , bez Sälät belän üsäbez!

- Sälkeş  ul – … 

- Sälkeş ul – säläten üsterergä  teläge bulgan bala. Sälkeş başka balalardan bik nık aerılıp tormasa da, anıñ  nindider ber üzenä genä xas üzençälege bulırga tieş. Sälkeş ul çäçäk kebek. Şul çäçäkkä su sibep torsañ, ul üsä, tagı da maturaya. Min balalarnı yaxşı häm naçarlarga bülmäs idem. Kem belä, bälki äle anıñ şul çäçäge şıtıp çıkmagandır. Bez äydamannarşundıylarga yardäm itärgä tieş.

- Berençe äydamannarıñnı xäterliseñme? 

- Robert Abıy Mortazin häm Elza Apa Bulatowa. Alar miña Sälät moxitenä kerep kitärgä yardäm ittelär, min alarga çiksez räxmätle.  

- Äydaman ul – …

- Sälkeşläre öçen cawap birä torgan keşe. Äydaman – äti-äni rolen ütäüçe. Awır minutlarda da, küñelle mizgellärdä dä härwakıt yanda buluçı.

- Bügenge köndä «Sälät»tä nilär belän şögıllänäseñ?

- Ike «Sälät» klubınıñ kuratorı bulıp toram: «Sälät-Aksubay» häm «Sälät-Yaşel Üzän». El däwamında törle proektlarda da aktiw katnaşam: «Rauşan» häm «Samara» alannarında äydaman buldım, «Bikafest 2016»  häm «Bolgar-Tugan Tel 2017»dä oeştıru komitetı sostawında buldım.

- «Sälät»kä nindi proektlar citmi dip uylıysıñ

- Minemçä, sportka kagılışlı çaralar. Woleybol, florbol kebek turnirlarda räxätlänep katnaşır idem. «Sälätneñ futbol ligası», yaisä  «Sälät yögerä» kebek proektlar buldırır idem.  

- «Sälät»tän tış nilär belän şögıllänäseñ

- Küp närsälär belän (Kölä). Min Böek Watan Sugışında katnaşıp ezsez yugalgan soldatlarnı barlau xäräkätendä aktiw katnaşam. Törle ekspeditsiyalärgä yöribez. Awtosportka da mäxäbbätem köçle.  3 el karting belän şögılländem. Kış köne çañgıda, snoubortta, cäy köne ciñel atletika kebek sport törlären üz itäm. Prizlı urınnar da yaulaganım buldı.

- Ireşkän uñışlarıñ turında söyläp üt äle. 

- Min maktanırga bik yaratmıym.  Läkin ber dä ikelänmiçä äytä alam: äydamannıñ uñışı – sälkeşlärne yaratu. Sin uñışlı sportsmen, biyuçe, cırçı bula alasıñ, läkin sine balalar yaratmasa, sineñ uñışlı äydaman min dip äytergä xakıñ yuk. Başka uñışlarıma kilsäk, uzgan cäydä min ciñel atletika buença 2-nçe urın yauladım.

- Tatar telendä iñ yaratkan süzläreñ yaisä tsitatalarıñ? 

- «Bulmas dimä!», «Äytkänseñ ikän eşlä!», «Äydä inde tizräk! Küp yoklap gomer ütä!»

- Sälkeşlärgä teläkläreñ?

- Ber urında tuktalıp kalmıyça, yañalıkka omtılıgız. Şunı belegez: sezneñ mömkinlekläregez çiksez. Uñışlar! 

tulısınça ukırga

Ilnaz Nasrtdinow

Sälät aktiwistı

- Sälätkä kilep kerü tarixın söyläp üt äle. 

- 2011-nçe el ide ul. Min ul wakıtta welosport belän kızıksına idem. Könnärdän-ber könne miña abıem şaltırata: «Welosiped otasıñ kiläme?» - di. «Älbättä!» - didem.  Şartı: «Kol Şärif onıkları» smenasına elägü öçen bäygedä katnaşırga kiräk ide. Min ul wakıtta bik oyalçan eget idem, bar närsädän dä kurka idem. Şunda min Sälät turında beldem dä inde. Bäygedä katnaştım häm ottım! Şunnan soñ dustım Rufat Kiyamow belän «Sälät-KŞO»nıñ prezidentı häm ministrı bulıp kittek. (Kölä) 

- Ul eldagı Sälät belän bügenge Sälätne çagıştırıp kara äle. 

- Bik awır eş bu. Sälät ul wakıtta da yugarıda ide. Bügen  isä ul üskännän-üsä. Fänni yunäleştä eşläüçe sälätle yaşlär kilä berläşmägä. Bez monda üzebezgä yaña mömkinleklär açabız.

- Sarı galstugıñ barmı? 

- Äye. Min anı berençe elda uk aldım. Ä 2012-dä 3-nçe däräcägä laek buldım. El däwamında min «Sälät-Yar Çallı» klubı aktiwistı buldım. Rufat belän barlık proektlarda da diyarlek katnaşıp kildek häm kiläbez.

- Sälkeşul 

- Awır sorau... lkeş ul etalon. Ilneñ kiläçäge. Minem fikeremçä, Sälättä ber genä tapkır bulgan bala äle ul sälkeş tügel. Ber smena eçendä genä lider bulıp betep bulmıy.

- Berençe äydamannarıñnı xäterliseñme? 

- Berençe äydamanım Ayrat abıy ide. Kızıklı şäxes. 23 yaşlek egetneñ şul wakıtta uk inde 5 yugarı beleme bar ide.  Ikençe äydamanım  – «Sälät» klubınıñ elekkege witse-prezidentı  Kamil Şäripow. Anıñ belän bez 2013-nçe elda «Lider goda» bäygesendä katnaşkan idek. 

- Äydaman ul 

- Äydaman  şulay uk etalon. Ul sälkeş belän citäkçe arasında küper saluçı keşe. Ul  – ukıtuçı.  Min üz gomeremdä ber genä tapkır sälkeş buldım. Şunnan soñ küp tapkırlar äydaman yardämçese, äydamannıñ uñ kulı bulu bäxetenä ireştem. 

- Bügenge köndä Sälättä närsä belän şögıllänäseñ? 

- Atnaga 4 tapkır min Sälättä. «Mirax» uennarında eş katnaşam. Kiläse cäygä ike smena alırga isäp bar.

- Sälätkä nindi proektlar citmi, sineñçä? 

- Berläşmädä miña tışkı säyasät kızıklı. Cäyge alannar, icadi proektlar belän dä kızıksınam. Närsä citmi dip sorıysızmı?  Xokkey ligası. «Fänsar»da , mäsälän, 4 könlek turnir oeştıru şäp bulır ide. Min bu proektnı üz östemä alır idem. Berwakıt miña Timur abıy  Söläymanow bolay dide: «Mömkinlekne härwakıt kullanırga kiräk!».  «Lider goda» bäygesennän soñ mondıy fiker tudı: bezgä proektlar buldıru öçen Sälät laboratoriyase citmi ikän.

- Sälättän tış närsälär belän kızıksınasıñ? 

- Kazan Däülät Energetika uniwersitetında belem alam. Apple belän mäktäptän birle kızıksınam. Kışkı sport törlären yaratam.  Kiläçäktä isä küptänge xıyalımnı tormışka aşırasım kilä, ul – yaşlär säyasätenä kerep kitü.

- Ireşkän uñışlarıñ belän tanıştırıp kit äle. 

- Sportta bik küp uñışlarga ireştem. «Imänkäy» smenasınıñ citäkçese buldım. Küp kenä proektlarda katnaşırga yaratam. Miña kalsa, barlık cirgä ölgerü ul – uñış formulası.

- Tatar telendä iñ yaratkan süzläreñ. 

- «Maturım», «sälkeşlär, torabız», «Sälät-Saba» cırınıñ süzläre.

- Sälkeşlärgä teläkläreñ.

- Sälkeşlär, bernärsägä dä karamıyça, ixlas bulırga tırışıgız. Keşe bulıp kalıgız. Häm şunı onıtmagız: sez – Sälätneñ yöze! 

tulısınça ukırga

Aygöl Wäliullina

«Sälät-Zäy» klubı kuratorı

- «Sälät»kä kilep kerü tarixı belän tanıştırıp kit äle bezne? 

-  Berençe tapkır Sälät belän tanışuım 2013-nçe elda «Sälät-Bilär» Forumında buldı. Forumga min ber köngä kildem, şunda uk añladım – kiläse elda min Sälät smenasına baraçakmın! Kaysı smenanı saylarga ikänen bik ozak uyladım: «Sälät-Rauşan», «Sälät-Ruxiyat», «Sälät-Bilär kalası. Ozak uylagannan soñ, «Sälät-Rauşan»ga tuktaldım. Şunnan soñ min Sälätneñ başka proektları belän dä kızıksına başladım: «Bikafest» festiwale, «Sälätkä nur bulgan yoldızlar» h.b.

- Uzgan ellardagı häm bügenge «Sälät»ne çagıştırsañ. 

- 2013-nçe el härwakıt istä. Şul elda min ilhamlana-ilhamlana Sälätkä tagın da gaşıyk bulıp yaşädem. Sälättän dä yaxşırak moxit yuk ide kebek miña. Xäzerge köndä isä, Sälätneñ komanda wäkile bularak min şunı añladım:bez bergä üsäbez, yaxşılıkka omtılabız.

- Sälkeş – ul…

- Sälkeş ul bäxetle bala, çönki iñ yaxşı, yaktı, balaçak könnärendä yaşi. 

-Berençe äydamannarıñnı xäterliseñme? 

- Älbättä inde. Alar minem tormışta zur rol uynauçılar. 2014-nçe elda «Sälät-Rauşan»ga berençe tapkır kilgäç, min alarga karap soklanıp tuya almadım. Alar Aydar abıy Wäliew häm Ilsöyar apa Xismätowa ide. Näk menä alar mine Sälät dönyası belän tanıştırdılar. Bügenge köndä dä bez aralaşıp yaşibez. 

Äydaman – ul

- Äydaman ul bäxetle keşe, çönki sälkeşlär bexetle. Alar sälkeşneñ yaxşı dusları häm kiñäşçeläre.

- «Sälät»tän tış närsä belän şögıllänäseñ? 

- Kazan federal uniwersitetınıñ başlangıç sıynıf ukuçıların äzerläüçe fakultetta belem alam. Ingliz telen öyränäm. Uniwersitetta da min bik aktiw eş alıp baram: törle fänni konferentsiyalärdä katnaşam, tatar xalık cırların öyränäm, gitarada uynıym. Xobbilarım küp, alar Sälät belän bäyle.

Bügenge köndä Sälättä nindi wazıyfa ütiseñ?

- «Sälät-Zäy» klubı, Sälät aktiwı mäktäbe kuratorı, «Bikafest 2017» festiwalendä oeştıruçılar komandası wäkile.   

- Sineñçä «Sälät»kä nindi proektlar citmi? 

- Sälättä alar bik küp, alar eldan-el artıp kına tora. Minem iñ yaratkan proektlarım ul  – «Bikafest», «Sämrux», «Äydamannar yarışı», «Bezneñ fiker», «Mirax».

- Sälkeşlärgä teläkläreñ? 

Sälkeşlär, sezneñ barısı da alda. Härberegez dä Sälättä üz urınıgıznı tabaçaksız. Iñ möhime – teläk kiräk. 

tulısınça ukırga

Liya Kogan

Kazan şähäreneñ 9-nçı mäktäp bazasında oeşkan «Sälät» klubı räise


- Liya, sineñ familiyañ bik üzençälekle.

- Äniem – tatar, ätiem – ewrey, läkin min üzemne tatar dip sanıym.

- Liya, Sälätkä niçek kilep kerdeñ?

- Sälät turında min 2012-nçe elda işettem, şul elnı «Sälät-Bolgar» smenasına barası idem, kızganıç, bara almadım. Şul uk xäl 2015-nçe elda da buldı, «Sälät-Şäxes» alanı belän. Nihayat, 2016-nçı elda min «Bolgar-Tugan tel» forumında katnaşa aldım. Bügenge köndä min Sälätneñ 10 smenasında katnaşkanmın ikän. «Sälät-Ruxiyat 2016», «Fänsar» mäktäbe, «Bolgar-Tugan tel», «Sälät-Saba», «Sälät-Imänkäy», «Sälät» klubları seminarı...       

- Şulay da,  «Şäxes», «Bolgar -Tugan Tel», «Ruxiyat», «Saba» yaisä «Imänkäyme?

- SABA!

- Uzgan ellardagı Sälät belän bügenge Sälätne çagıştırıp karale.
- Sälättä elek 65 keşe tiräse bulsa, bügen sälkeşlär sanı meñlägän. Ike Forum, 25 alan, 50-dän artık proekt... Bu bik şäp! Sälät, çınnan da, mömkinleklär moxite.

- Sarı galstugıñ barmı?
- Bar. «Sälät-Saba 2017» smenasında aldım.

- Sälkeş – ul…

- Sälkeş – sälätle bala, säläten açarga oyalmagan häm kiläçäk turında uylangan keşe.

- Berençe äydamannarıñnı xäterliseñme?
- Älbättä! Landış apa häm Rifat abıy. «Sälät-Ruxiyat»tä – Zifa apa Miñnullina häm tanılgan bloger Bulat Brawo! 

- Äydamanul
- Äydaman smenada äti-äni rolen ütäüçe keşe. Aña härwakıt tayanırga bula.

- Bügenge köndä Sälättä nindi wazıyfa ütiseñ?
- Oktyabr başında üz mäktäbemdä Sälät klubı oeştırıp cibärdem. Şulay uk mädäni çaralarda da eş katnaşam.

- Sälätkä nindi proektlar citep betmi? Niçek uylıysıñ?
- Xokkey uenına kagılışlı proekt açılsa min bik şat bulır idem. Şulay uk minem tagın ber fikerem bar, älegä ser itep saklıym. Ul proekt sälkeşlärgä törle alan biyulären öyrätügä bagışlana. Şäp bulır ide.

- Sälättän kala närsälär belän şögıllänäseñ?
- Xokkey belän. Fizika-matematika mäktäbendä belem alam, biologiya, ingliz tele fännäre belän kızıksınam.

- Uñışlarıñ belän bezne dä tanıştırıp kit äle.

- Min xatın kızlar arasında xokkey buença ike tapkır çempion bulgan kız. «Sälät-Saba»  alanında KWN kapitanı, Forumda isä «Sälät-Atilla» komandasında şulay uk KWN kapitanı buldım. 3-nçe urın aldık. Xokkey buença bik küp medallärgä dä laek min. 7 el biyu belän şögıllänäm.

Ingliz, rus tele häm rus ädäbiyatı olimpiadalarında küp tapkırlar ciñgänem buldı.

- Xokkey – kızlar öçen üzgä uen!

- Xokkey belän min 12 yaştä kızıksına başladım. Älege sport töre belän kızıksınuım minem abıem arkasında buldı. Ul – professional xokkeist. Min eş kına anıñ uennarın kararga yori idem. 11 yaşemdä xokkey buença Kazannıñ xatın-kızlar komandasına eläktem.

- Xokkey belän bäyle istälekläreñ.

- Iñ istä kalganı – egetlär belän xokkey uynau. (Kölä). Min şul wakıtta bik şatlandım. Egetlärneñ ostalıgına karap min härwakıt soklana idem. Mäktäptä dä öç el rättän xokkey komandası kapitanı buldım. Egetlär belän uynau  –  şäp, läkin kızlar belän ciñelräk.

- Tatar telendä iñ yaratkan süzläreñ.

- Äni. Xıyallanıp yaşä. Icat it. Sälät-mäxäbbät. Aş bulsın.

- Sälkeşlärgä teläkläreñ.
- Barlık smenalarda, Sälät uzdırgan çaralarda katnaşıgız. Sälättä talantıgıznı açıgız, kürsätegez häm här könnän täm tabıp yaşägez. 

tulısınça ukırga

Göldaniya Bulatowa

Sälät aktiwınıñ intellektual yunäleş häm «Atlant» şaxmat klubı kuratorı

- Sälätkä elägü tarixın söyläp uz äle.

- Sälätkä min 2013-nçe elda kildem. Elegräk ŞTK (Şayannar häm tapkırlar klubı) belän kızıksına idem, Leninogorsk şähäre ligasında katnaştım. Könnärdän ber könne «Wkontakte» gruppasında ber belderügä tap buldım:  «KWN belän kızıksınuçılar häm akterlık ostalıgın öyränergä teläüçelärne Sälätneñ cäyge alanına çakırıp kalabız». Bu xäbärne Albina apa Kadirowa yazgan bulgan ikän. Min aña bügenge köndä çiksez räxmätle. (Kölä

- Berençe kürgän häm bügenge Sälätne çagıştırıp karasak? 

- Bügenge köndä Sälät älbättä, elekkege Sälät belän nık aerıla. Masştablı Forumnar, Bilär kalasındagı «Fänsar» üzäge, könnän-kön tuıp toruçı yaña proektlar... Mäsälän, «Sanak-lab» uku-ukıtu laboratoriyasen genä alıyk. Bu bit menä digän proekt, 5-7 el elek balalar monıñ turında xıyallanıp kına yaşägännärder. Älege proekt el däwamında uza. Bügenge köndä inde ul awız tutırıp söylärlek şäp proekt. Äle min ber genä proektka tuktaldım, ä alar bit Sälättä bixisap küp. Läkin nindi genä proektnı alsak ta, töp äyber ul – Sälät moxite. 

- Berençe äydamannarıñnı xäterliseñme? 

- Albina apa Sadreewa häm Albert abıy Şakirow. Näk menä alar miña Sälätneñ häm çın äydaman yözen añlarga töşenderdelär.

Albina apa bügenge köndä dä minem kümirım, min aña karap soklanam, tagın da täcribä tuplıym. Anıñ arkada min berençe smenaga bargaç uk sarı galstukka iya buldım, bik gorurlandım, çönki anı aluı ciñel eş tügel.

- Sälättä tatar tele däräcäsen niçek bäyaliseñ? Ä başka tellärneken? 

- Sälättä tatar tele däräcäse bik yugarı. Üzem dä telne Sälättä kamilläşterdem. Başka tellär belän dä problema yuk monda, çönki Sälät dönyaküläm däräcägä çıga.  

- Sineñçä Sälätkä nindi proektlar citmi?

- Minemçä, Sälätkä kul eşlänmäläre proektı citmi.  Mäsälän, yaña gına oeşkan «Ostalar bistäse» smenasın bälki el däwamında  eşläüçe alan itep yasarga kiräkter

- Sälättän tış ni belän şögıllänäseñ?

- Ukuga bik zur igtibar itäm. Fizika institutında ukuım bik zur köç häm wakıt taläp itä. Sälät proektlarında isä katnaşuçı bularak ta, oeştıruçı bularak ta katnaşıp kiläm.

- Sälkeşlärgä teläkläreñ? 

- Sälkeşlärgä üzläre saylagan ölkädä üsärgä kiñäş itäm. Härber minutıgıznı kiläçäktä faydası bulırlık itep uzdırıgız.   

tulısınça ukırga

Timerxan Şäyxetdinow

«Sälät-Yaşel Üzän» klubı räise

- Timerxan, Sälätkä kilep elägü tarixın söylä äle.

- Sälät belän min 2015-nçe elda tanıştım. Ber yartı el anıñ eşçänlege belän tanışıp yörep, 2016-nçı elnıñ cäendä berençe märtäbä Töbäkara «Bolgar-Tugan tel» forumına bardım. Şunnan kaytkaç, ilhamlanıp, komandam belän «Sälät-Yaşel Üzän» klubın açıp cibärdem.

- Berençe kürgän häm bügenge Sälätne çagıştır.

-  Gomumän, Sälät belän tanışkaç, ul miña ber tatar berläşmäse kebek kürende. Läkin xäzerge wakıtta min menä niçek küräm: Sälät ul – yaşlär öçen faydalı ölkälärdä global eş alıp bara torgan oeşma.

- Berençe äydamannarıñnı xäterliseñme?

- Älbättä, Güzäl apa Gaynanowa häm Tahir abıy Kärimullin. Mine Tahir abıy belän tuganlık cepläre bäylägäne dä bilgele buldı äle! (Kölä)

-  Sarı galstugıñ barmı soñ?

- Äye, anı min bıel «Sälät-Samara»da aldım.

- Berläşmädäge tatar tele däräcäsen niçek bilgeliseñ? Ä çit tellärneken?

- Bilgele, Sälät ul – öç telle moxit. Läkin barıber tatar tele – nigez. Şul kagıydä Sälät proektlarında çagıla häm bu şäp küreneş.

- Sineñçä, Sälätkä nindi proektlar citmi?

- Minemçä, dönyaküläm çaralarga yöz totarga kiräk.

-  Sälättän tış ni belän şögıllänäseñ?

- Yaşel Üzän şähäre 16-nçı tatar mäktäbeneñ 10-nçı sıynıfında ukıym. Şulay uk balalar ictimagıy xäräkäte häm bala xokukların yaklau belän şögıllänäm. Tatarstan Respublikası Balalar oeşmaları sowetı räise urınbasarı, Tatarstan Respublikasında Bala xokukları buença wäkalätle wäkilneñ ictimagıy yardämçese bulam. Häm Yaşel Üzän şähäre Ukuçılar sowetın citäklim. Bu eldan Bötendönya tatar yaşläre forumı çaraların oeştıruda da aktiw yardäm itäm.

- Sälkeşlärgä teläkläreñ?

- Üzegezne ruxi yaktan üsteregez. Katı yañgırıy torgan «buş şeşälär» bulmagız.

tulısınça ukırga