Şäxes

- Sälätkä elägü tarixın söyläp uz äle. 

- Min Älmät şähäreneñ tatar gimnaziyasendä ukıdım. Bezneñ mäktäptä kübese Sälät balaları ide. Klasstaşım Rezeda mine 2012-nçe elda «Sälät-Ruxiyat» alanına çakırdı. Şulay itep Sälät belän tanıştım.

- Berençe kürgän häm bügenge Sälätne çagıştır.

- Bez sälkeş çakta Sälät forumı mondıy macştabta uzmıy ide. Ä bügenge köndä Tatarstanda Sälät turında belmägän keşe kalmadı, anıñ eşçänlege tañ kaldıra.

- Berençe äydamannarıñnı xäterliseñme? 

- Äye. Minem berençe äydamannarım ikäü tügel, öçäü ide: Yosıf abıy, Ruslan abıy häm Elwira apa.

- Sarı galstugıñ barmı soñ? 

- Bar, «Sälät-Sanak»ta 2012-nçe elda laek buldım.

- Sälättän tış ni belän şögıllänäseñ? 

- Kübesençä KWN belän mawıgam. Ul küp wakıtnı taläp ütä.

- Sälättä tatar tele däräcäsen niçek bäyaliseñ? Ä başka tellärneken?

- Sälät, minemçä, tatar telen üsterü öçen iñ şäp urın. Çönki monda barlık äydamannar saf tatarça söyläşä häm balalarga härçak yardäm itärgä äzer. Başka tellär belän dä problemalar bulganı yuk.

- Sineñçä Sälätkä nindi proektlar citmi?

- Miña Sälät KWN Ligası citmi. Min üzem şul ligada uynap üskän idem, KWN dönyası serlärenä biredä töşendem.

- Sälkeşlärgä teläkläreñ? 

- Fänil, Sälätkä elägü tarixın söyläp uz äle. 

- Sälät dönyası belän min 2012-nçe elda tanıştım. Äti-äniem kiñäşe buença «Sälät-Sanak» smenasına bardım. Sälät alarnıñ igtibarın tatar moxitle buluı belän cälep itkän ide. Ul wakıtta min Sälät turında berni belmi idem, işetkänem dä yuk ide. Sälätkä kilü belän aldımda mömkinleklär dönyası açılıp kitte. 

- Berençe kürgän häm bügenge Sälätne çagıştır. 

- Minem öçen xäzerge Sälät elekkedän aerılmıy: şulay uk «Yoldızlı» sälamätländerü balalar üzäge, Sälät yortı, Izge Bilär. Duslarımnıñ şul uk tanış yözläre, küñelle wakıt ütkärü, jır-biyulär. Sälät üz däräcäsen ber mizgelgä dä töşermi, şul uk wakıtta, zamana belän bergä atlıy. 

- Berençe äydamannarıñnı xäterliseñme? 

- Döresen äytkändä, här äydaman minem öçen berençe kebek ide, barısı da miña üzençälekle tärbiya birde. Bügenge köndä nindi buluım belän min alarga räxmätlemen. Küpme genä ellar ütsä dä alar haman da minem öçen ikençe äti-äni bulıp kalalar. 

- Sarı galstugıñ barmı soñ? 

- Äye, ul Bua şähärendä, törle medallär belän bergä gorurlık taktasında elenep tora. 

- Sälättän tış ni belän şögıllänäseñ? 

- «Närsä? Kayda? Kayçan?» uenın yaratam. Futbol uynıym. Kalgan wakıtımnı tulısınça Sälätkä häm ukuga bagışlıym. 

- Sälättä tatar tele däräcäsen niçek bäyaliseñ? 

- Tatar tele däräcäse yugarı dip uylıym, çönki här könne Sälät mine berär yaña süzgä öyrätä. 

- Sineñçä Sälätkä nindi proektlar citmi? 

- «Sälät-Arşan»nıñ kire kaytuın kötäm. 

- Sälkeşlärgä teläkläreñ? 

- Yaratkan sälkeşlärebez! Sälamätlek, ak bäxetlär, saf mäxäbbät telim sezgä! Samimi bala bulıp kalıgız, olıgaerga aşıkmagız!

- Albina, Sälätkä elägü tarixın söyläp uz äle.

- 2008-nçe elda klasstaş kızım bik şäp cäyge lagerturında söyläde. Ul wakıtta «Sälät-Bögelmä» aerım lager bularak yuk ide äle, delegatsiya bularak Bilärdä uzuçı Sälät forumına gına baralar ide. 2008-nçe alan buldırıluga min dä täwäkällärgä buldım.

- Berençe kürgän häm bügenge Sälätne çagıştır.

- Alar bik aerılalar. Ul wakıtta bit äle min bala bulganmın, xäzer inde olırak karaş belän karıym. Bilärdä uzuçı forumnıñ formatların gına alıyk: ul wakıtta keçkenä masştablı festiwal ide. Miña kalsa, ikese dä üzençä äybät.  Şul festiwal çorınıñ da tämen tatıp kala alganıma şatmın. Üzebez ük palatkalar kuyabız, «Dubok» bazasına kiçke çaraga yöri idek... Ä xäzer forumga kilgäç anıñ masştabın kürep tañ kalasıñ! Sälät şähäre tözelep kilgän kebek xätta.

- Berençe äydamannarıñnı xäterliseñme?

- Äye. Niyaz abıy häm Alsu apa. Alsu apa bik söykemle ide, gitarada uynıy, räxät şämçeklär ütkärä ide. Tik ni säbäpleder aña smenadan irtäräk kitärgä turı kilde.  Ä Niyaz abıy matur elmayuı belän xäterdä kalgan, bik küñelle häm pozitiw ruxlı eget ide. Ni kızganıç, smenadan soñ min alar belän aralaşmadım.

- Sarı galstugıñ barmı?

- Äye, berençe sälkeşlegemdä ük aldım.

- Sälättäge tatar tele däräcäsen niçek bäyaliseñ? Ä başka tellärneken?

- Tatar tele däräcäse eldan-el üsä. Tik kamillekkä çiklär yuk dibez. Biregä kilgän här keşe tatar telen öyränergä omtıla, şunısı xak.

- Sineñçä Sälätkä nindi proektlar citmi?

- Miña kalsa, Sälätkä keçe yaştäge balalar öçen cäyge lager citmi. Bala berençe sıynıftan uk Sälät moxitendä üssä niçek şäp bulır ide. Sälätkä nikadär irtäräk kilsäñ, şunıñ kadär äybäträk.

- Sälättän tış ni belän şögıllänäseñ?

- Sälättän tış eşlim, balalarga akterlık ostalıgı däreslären biräm, KFUnıñ Geologiya häm neft-gaz texnologiyaläre institutı öçen Studentlar yazı häm Berençe kurslılar könen äzerlim, «Injenerı buduşçego» üseş üzägeneñ proektlarında katnaşam.

- Sälkeşlärgä teläkläreñ?

- Olıgaerga aşıkmagız! Här wak kına detaldän dä şatlık tabıgız. Sälätle könnäregezneñ kaderen belegez! 

- Nazlıgöl, Sälätkä elägü tarixın söyläp uz äle.

- Sälät turında küptän işetep belä idem, bik barasım kilä ide. Läkin mondıy mömkinçelek 2010-nçı elda gına tudı. Mine «Sälät-Şäxes 2010» alanı  direktorı Ilmir abıy Xäbibullin üze çakırdı. Kil di, kötep kalabız di. (Kölä). Bu mömkinçelekne ıçkındırmas öçen şul uk könne «Sälät-Şäxes» alanına gariza cibärdem. Mondıy bäxet tudırganı öçen Ilmir abıyga räxmätemne belderäsem kilä. Şunnan başlap  min Sälät belän yakınnan tanışa başladım.

- Berençe kürgän häm bügenge Sälätne çagıştır.

- Älbättä, üzgäreşlär bar: alannar kübäyde, yaña yaşlär Sälätkä tartıla, yaña proektlar açıla. Ber süz belän äytkändä, Sälät könnän-kön üsä.

- Berençe äydamannarıñnı xäterliseñme?

- Äye, alarnı onıtıp bulmas inde ul. Yomşak küñelle Alisä apa häm koyaş sıman elmayuçan  Lenar abıy. Alar xäzer dä minem öçen ürnäk bulıp toralar.

- Sarı galstugıñ barmı?

- Kızganıçka karşı, sarı galstugım yuk.

- Sälättän tış ni belän şögıllänäseñ?

- Xäzerge mizgelde KazGIiKta teatral fakultetnıñ Säxnä tele buença aspiranturada ukıym. Institutta ukıtırga kalırga cıenam.

- Sälättä tatar tele däräcäsen niçek bäyaliseñ? Ä başka tellärneken?

- Sälät – tatar telle moxit, bez yaşlärgä Sälättän tış ta tatar telendä aralaşırga kiräk ikänen inandırırga tieşbez dip uylıym. Xäzerge yaşlär ingliz telen öyränergä aşkınalar. Älbättä, bu bik şäp küreneş.

- Sineñçä Sälätkä nindi proektlar citmi?

- Eldan-el Sälättä yaña proektlar sulış ala. Minemçä, Sälät yaña däräcägä kütärelde. Miña kalsa, älegä barısı da citä.

- Sälkeşlärgä teläkläreñ?

-  Awırlıklarga bireşmägez, yaña ürlärgä omtılıgız! Bernidän dä kurkıp kalmagız! Tormışıgızda yañgır yawa başlasa da, borçılmagız: dimäk, tizdän göllär çäçäk ataçak. 

- Sälätkä niçek kilep eläkteñ? Şul tarixnı bäyan it äle, Aliya.

- Uniwersitetta Sälät aktiwistı Albina apagız Kadirowa belän ber törkemdä ukıdık. Ul mindä Sälätkä dä, KWNga da mäxäbbät tärbiyaläde.

- Berençe kürgän häm bügenge Sälätne çagıştır.

- Sälät bik tiz üsä. Elek Sälät ul aerım däülät digän mäzäklär yöri ide. Xäzer bu çınbarlıkka äwerelä başladı. (Kölä) Balalarım şuşı däülättä yaşäwen tälär idem.

- Sarı galstugıñ barmı soñ?

- Ex, ni kızganıç, sälkeş bula almadım şul. Tik minem 2-nçe häm 3-nçe däräcäm, şämäxä futbolkam bar.

- Berläşmädäge tatar tele däräcäsen niçek bäyaliseñ? Ä başka tellärneken?

- Smena direktorı bularak, tatar telen belmägän balalar da anı öyränergä tırışkanın beläm. Äti-änilär äytüençä, öydä balaları tatar telendä aralaşsın öçen alar küp köç kuya. Ä biredä aralaşu ber-bersenä ürelep tatar telendä bara.

- Sineñçä, berläşmägä nindi proektlar citmi?

- Elek keçkenä balalar öçen proekt yuk ide. Xäzer «Bäläkäç» eşläp kilä.  Ul balalarda keçe yaştän tatar telenä, mädäniyatenä mäxäbbät tärbiyali. Üz radiobız, TW, gazetabız bulsa da naçar bulmas.

- Sälättän tış ni belän şögıllänäseñ?

- Ukıtuçı bulıp eşlim. Säyaxät itärgä tırışam.

- Sälkeşlärgä teläkläreñ?

- Olıgaerga aşıkmagız! Wakıt bik tiz uza, iñ matur sälkeşlek çorınıñ kaderen belegez! 

-         Bulat, Sälätkä niçek kilep eläkteñ? Şul tarixnı söyläp uz äle.

-         2011-nçe el ide ul. Tatarça KWN uynıy idem, gomumän, KWN belän kızıksına idem. Şunda Sälät turında işettem häm «Sälät-Ruxiyat» alanında yal ittem.

-         Berençe kürgän häm bügenge Sälätne çagıştır.

-         Sälät kiçä häm bügen – üzara nık aerılalar. Bilärdäge çişmä yagına alıp çıguçı küperne genä alıyk. Şayaram, KWNçı bit min! (Kölä) Gailä moxite saklanıp kaldı. Miña kalsa, bu iñ möhime.

-         Berençe äydamannarıñnı xäterliseñme?

-         Äye. Minem berençe äydamannarım Alinä apa Sadriewa häm Samat abıy Yuzeew. Ikençe elnı Sälätkä kilgäç tä äydamanım tagın Alinä apa buldı. Tik kuldaşı gına üzgärgän ide: Samat abıynı Ilham abıy Ibrahimow alıştırdı. Şuşı elnı tulısınça açıla aldım. Äydamannarıma monıñ öçen çiksez räxmätlemen!

-         Sarı galstugıñ barmı soñ?

-         Bar, ikençe elnı aldım, «Sälät-Ruxiyat»tä. Küräseñ, şul galstuk artınnan kire kaytkanmın. (Kölä)

-         Sälättäge tatar tele däräcäsen niçek bäyaliseñ?

-         Yugarı. Üzem dä tatar telen äybät beläm. Tugan telem bit ul!

-         Sineñçä, Sälätkä nindi proektlar citmi?

-         Citä. Eldan-el yaña proektlar barlıkka kilep tora. Artlarınnan ölgerä almıym xätta.

-         Sälättän tış ni belän şögıllänäseñ?

-         Ukıym. Bıel KFUnı tämamlıym. Min – bulaçak iktisadçı. Eşlim. Buş wakıtımda icadi yaktan üsärgä tırışam.

-         Sälkeşlärgä teläkläreñ?

-         Sälkeşlär! Wakıtıgıznı yukka äräm itmägez. Küñelegezgä oşagan eş belän şögıllänegez. Ä Sälät sezgä härçak yardämgä kiler! 

-         Aynur, Sälätkä niçek kilep eläkteñ?

-         Sälätkä mine duslarım alıp kilde. Alar gel bik şäp cäyge lager turında söyläp kızıktıralar ide. 2011-nçe elda çakırsalar da, 2012-dä genä Sälätkä barıp citä aldım. «Sälät-Rauşan» alanın sayladım.

-         Berençe kürgän häm bügenge Sälätne çagıştır.

-         Alay ozak wakıt ütmäde äle, şuña çagıştırırga awır. 2012-nçe eldagı sälkeşlär bügenge köndä üzläre äydaman, proekt citäkçeläre. Monı kürü bik kuanıçlı. Sälät ber urında tormıy, wakıt belän bergä atlıy.

-         Berençe äydamannarıñnı xäterliseñme?

-         Äye: Elmira Garaewa häm Rafael Şamilow.

-         Sarı galstugıñ barmı soñ?

-         Äye. Berençe smenada uk aldım.

-         Sälättäge tatar tele däräcäsen niçek bäyaliseñ?

-         Yugarı, älbättä. Tik kamillekkä çiklär yuk ikänen onıtmıyk.

-         Sineñçä, Sälätkä nindi proektlar citmi?

-         Bügen berläşmädä kızıklı proektlar bik küp. Miña barısı da citä. Bulganınnın bik känägatmen.

-         Sälättän tış ni belän şögıllänäseñ?

-         KFUda, 3-nçe kursta ukıym, min – bulaçak tabib. Üz ölkämdä yugarı kwalifikatsiyale belgeç bulasım kilä.

-         Sälkeşlärgä teläkläreñ?

-         Yaulagan ürläregezdä tuktalıp kalmagız, kuygan maksatlarıgızga ireşegez!

- Yaznur, Sälätkä niçek kilep eläkteñ?

- Kızganıçka karşı, miña sälkeş bulu bäxete elmaymadı. Sälättä berençe adımnarımnı 2009-nçı elnıñ «Äydamannar mäktäbe»nnän başladım. Bezne Arça pedagogiya kölliyatennän täcribä, belem tuplarga yulladılar. Berençe tapkır äydaman bularak üzemne «Sälät-Tel» alanında sınadım. Bu alan belän bik küp kızıklı häm istälekle wakıygalar bäyli. Smena başlanır aldınnan miña 17 yaş kenä ide, ä smena wakıtında 18 tuldı. Balalarnıñ şakkatkanı istä. (Kölä)  

- Berençe kürgän häm bügenge Sälätne çagıştır.

- Berençe kürgän Sälät minem öçen yaña bertörle açış ide, aerım ber dönya bulıp toeldı. Sälättäge mäxäbbät, jılılık, yaktılıkka, şul atmosferaga soklanıp tañ kaldım. Bik küp duslar taptım Sälät dönyasında. Şunıñ öçen bik räxmätlemen.

Bügenge Sälät balanı şäxes bularak formalaştıra, äydäp baruçı liderlar tärbiyali. Bik küp yunäleşlär buença eş alıp barıla. Üzen üsterergä, sınap kararga, nıgırga teläüçelär öçen bar mömkinleklär dä bar. Teläk kenä kiräk.

-Sarı galstugıñ barmı soñ?

-Sarı galstugım yuk. 3-nçe, 2-nçe däräcädäge Sälät bilgelärenä iya buldım.

- Sälättäge tatartele däräcäsen niçek bäyaliseñ? Ä çit tellärneken?

- Sälättä tatar tele däräcäse yugarı. Häm bu bik kuanıçlı xäl. Tatar telen öyränergä, üsterergä teläüçelär öçen dä mömkinleklär buldırılgan. Başka tellärgä kilgändä, yaşlärneñ kızıksınuı yugarı häm bu bik unay küreneş.

- Sineñçä, Sälätkä nindi proektlar citmi?

- Bügenge köndä Sälättä proektlar sanı bik küp. Bulgan proektlarnı kamilläşterep, yañartıp, yana formatta täkdim itsäñ genä.

- Sälätän tış ni belän şögıllänäseñ?

- Ällä ni bn şögıllänmim. Eşlim. Elek şigırlär yaza idem, jırlarga yaratam.

- Sälkeşlärgä teläkläreñ?

- Tormışnıñ här mizgelennän läzzät alıp yaşägez. Alga kuelgan maksatlarıgıznı tormışka aşırıp, üzegezgä yañalık ezläp, biek ürlär yaulap alga atlagız. 

- Timur, Sälätkä niçek kilep eläkteñ?

- Berençe tapkır berläşmä turında 2011-nçe elda işettem, tik 2014-nçe elda gına Sälätlelär safına kuşıla aldım. Küp kenä olimpiadalarda katnaşıp ciñü yauladım, şunnan soñ mine «Sälät-Rauşan» alanına çakırdılar. «Rauşan» – miña nigez salırga yardäm itkän smena. Älege 18 könneñ kızulıgın min berkayçan da onıtmam. Hawa torışınıñ monda katnaşı yuk, xis-kiçereşlär kızulıgı ide ul. Bu minem sälkeş rolendä berençe häm soñgı smenam buldı.

- Berençe kürgän häm bügenge Sälätne çagıştır.

- Xm, awır sorau. Çagıştıru digän närsä bolay da ciñel tügel ul. Berläşmädä min 3 kenä el äle, bu bik az wakıt aralıgı. Şunısın beläm: bez barıbız da döres yunäleştä barabız. Urtak maksatıbız, nizamätlärebez bar.

- Berençe äydamannarıñnı xäterliseñme?

- Älbättä! Räsül abıy Wäliew häm Aliya apa Äxmätcanowa. Bügen dä alar belän elemtäne özmäskä tırışam. Smenabıznıñ küñelle mizgellären iskä alabız. Aliya apa bezneñ öçen ikençe äni bula belde, ul – iñ yagımlı äydamannarnıñ berse. Härwakıt yanäşäbezdä buldı, nazın kızganmadı, xällärebezne gel beleşep tordı. Ä Räsül abıy bik citdi keşe. Kiräkle wakıtta kırıs, tieş urında maktıy belde. Alar minem öçen bügen dä çın äydaman ürnäge. Alarga oxşarga tırışam.

- Berläşmädäge tatar tele däräcäsen niçek bilgeliseñ?

- Tatar telen Sälättä öyränä başlagannarnı kürep çın küñeldän soklanam. Üze dä üsä, başkalarnı da üseşkä omtıldıra. Andıy misallar şaktıy. Gel küzätep yörim, söenäm.

- Sälättän tış ni belän şögıllänäseñ?

- Älegä «FairPlay» mini-futbol ligasın oeştıruda katnaşam, Sälät kısalarında da şundıy çempionat buldırasım kilä. FIFA17 buença da şundıy çempionat oeştırsañ şäp bulır ide. Teläüçelär dä küpter, miña kalsa. Kızık öçen instagramda dustım belän @timur.aydar  akkauntın buldırdık, tormışıbızdagı kızıklı wakıygalarnı töşerep şunda kertäbez.

- Sälkeşlärgä teläkläreñ?

- Smenalardan läzzät alıgız! Sälät berläşmäse moxitendä el däwamında bulıgız! Monıñ öçen Sälät yortı,  Sälät klubları bar. Üz rayonıgızda da Sälät klubı açıgız. Bezneñ belän bulıgız!

- Elwira, Sälätkä niçek kilep eläkteñ?

- 2011-nçe elda respublikaküläm olimpiadada katnaştım. Biredä «Sälät-Marafon» proektı kısalarında Sälätneñ aktiw, maksatçan yaşläre cäyge alannar turında söylädelär. Min bu oeşma turında,  aeruça  Bilärdäge forum turında TNW kanalınnan küp işetkän idem inde. Bik kızıksam da almaslar dip kurıktım. Olimpiadada katnaşuçılar arasında Ilham Ibrahimow ta bar ide, ul mine «Sälät-Ruxiyat» alanı belän yakınnan tanıştırdı. Anıñ kiñäşläre belän min şuşı alannı sayladım da. Bügenge köngä kadär ike äyberne añlıy almıym: nik irtäräk barırga uylamaganmın häm Sälätne niçek lager dip atıy alganmın. (Kölä) Anıñ formatı da ikençe bit! Balaçagımda min bik küp lagerlärdä bulırga ölgerdem, tik Sälätkä kilgäç kenä üzemneken taptım. Biredä min üz öemdä şikelle.

- Berençe kürgän häm bügenge Sälätne çagıştır.

- Sälätne bezneñ härberebez belän çagıştırıp bula. Härkönne közgegä küz salgaç, bez zur üzgäreşlär kürmibez. Tik moña karap kına üsmi, üzgärmi tormıybız. Fotosurätlärne barlaganda da şuşı üseş yulın uylap elmayabız. Sälät tä şulay. Anıñ üseşe, çınnan da, bik zur bit. Bügenge köndä dä ul şuşı yulda äle: bezgä härdaim yaña ofıklar açıp tora. Tik anıñ ruxı, moxite haman şul uk.

- Berençe äydamannarıñnı xäterliseñme?

-  Äye, älbättä! Adelina Nurullina häm Danil Şäymullin. Şämçeklärne dä, «Berezka» bazasın, gitaralı cırlarnı da xäterlim. (Kölä)

- Sarı galstugıñ barmı soñ?

- Äye. 2012-nçe elda «Sälät-Ruxiyat»tä aldım. Şatlıgımnı äytep-añlatıp betergesez ide.

- Berläşmädäge tatar tele däräcäsen niçek bäyaliseñ? Ä çit tellärneken?

- Sälättäge kebek küpläp tatar telendä irken söyläşüçe yaşlärne  tagın kayda oçratırga bula mikän? Başka millät balaları da bik teläp tatarça öyränä. Ä çit tellärgä kilgändä här Sälät aktiwistı 3-tän artık tel beläder, minemçä. Bu inde üzenä kürä ber tendentsiya, çönki küp tellär belü – modada.

- Sineñçä, Sälätkä nindi proektlar citmi?

- Miña kalsa, çit ildä yaxşılap urnaşırga kiräk. «Sälät-Awstraliya», «Sälät-Praga» yaki «Sälät-Monreal» proektların el saen uzdırıla torgan itsäk yaxşı bulır ide.

- Sälättän tış ni belän şögıllänäseñ?

- KGASUda ukıym, diplom yazam, kiläçäkkä plannar koram. Ekstrim, säyaxätlär yaratam. Kitap ukıym, tämle äyberlär peşeräm.

- Sälkeşlärgä teläkläreñ?

- Üzegezgä ışanıgız, bireşmägez, ber mömkinçelekne dä kuldan ıçkındırmagız. Bu kagıydä här oçrakta da eşli. Tormışıgıznıñ här sekundınnan, här keşesennän läzzät alıp yaşägez. Ä Sälät sezgä bäxetle mizgellär büläk itär!  

- Sälätkä kilep elägü tarixın söyläp uz äle.

- 2005-nçe elda äni mine cäyge lagergä cibärergä uyladı. Minnän olırak abıy-apalarım, tugannarım törle statuslarda Sälät smenalarında bulgannar ide inde. Şuña da Sälätne sayladı. Minem genä barası kilmäde, kireländem. Moñarçı cäyge lagerlärdä bulganım da yuk ide. Tik axır çiktä rizalaştım. Sälät dönyası belän duslıgım şulay başlandı.

- Berençe kürgän häm bügenge Sälätne çagıştır.

- Sälät wakıt belän bergä atlıy. Bez yugarı texnologiyalär çorında yaşibez, Sälät bu planda da kalışmıy. Tatarstanıbız da äydäp baruçı respublikalardan bit. Ä biredäge yaşlär – Tatarstannıñ kiläçäge.

- Berençe äydamannarıñnı xäterliseñme?

- Äye, älbättä: Nurbäk abıy Batulla häm Dilärä apa Söläymanowa.

- Sarı galstugıñ barmı?

- Äye. Berençe bargan elnı uk «Sälät-Rauşan»da aldım.

- Sineñçä, Sälätkä nindi proektlar citmi?

- Awır sorau. Şäxsän min «Sälät-Arşan» smenasın kaytarır idem. Miña kalsa, Sälätkä diñgez yarı buendagı smena kiräkter. Andıy alannıñ üzenä kürä ber räxätlege, ciñellege bar. Timur abıy Söläymanow belän dä bu xakta söyläştem äle. Üzem dä räxätlänep tagın ber kat «Sälät-Arşan»ga barıp kaytır idem.

- Sälättäge tatar tele däräcäsen niçek bäyaliseñ? Ä çit tellärneken?

- Kamillekneñ çige yuk dilärme äle? Bezneñ balalar bik sälätle bit, tatar häm ingliz telläreneñ däräcäläre ber tirädä diyar idem xätta. Äydamanlık çorımda awılda yaşäüçe balalarnıñ tatar tele däräcäsenä gel şakkata idem. Bügen dä tatar telen awıldan öyränergä kiräk dip sanıym.

- Sälättän tış ni belän şögıllänäseñ?

- Törle ictimagıy häm yaşlär proektlarında katnaşam. Tüzemsezlek belän «Sälät-Tel 2017» smenasın kötäm. Täcribä tuplar öçen çit ilgä barıp kaytasım kilä. Gomumän alganda, min irekle, tormıştan läzzät alıp yaşim.

- Sälkeşlärgä teläkläreñ?

- Kaderle sälkeş! Berär kayçan sin dä äydaman bulırga teläk beldererseñ. Üzeñeñ sälkeşeñ öçen bar yaklap ta ürnäk bul! Anıñ tormışka karaşları sineke tösle bulaçak, ellar uzgaç añarda üzeñneñ küñel közgesen kürerseñ.  

- Sabir, Sälätkä kilep elägü tarixın söyläp uz äle.

- 2014-nçe elda mäktäbebezgä Tatarstan Respublikasınıñ Bolgar muzey-tıyulıgında «Bolgar-Tugan tel» forumı ütäçäge xakında mäglümat kilde.  Cäygä plannar kormagan idem äle, urınnar sanı da çikle ide, mäktäbebez aktiwistı bulgaç bezgä şunda barırga täkdim yasadılar. Başta närsä ikänen bötenläy belmädek. Tik forumnıñ 3-4 köne citä kaldı, min bütän Sälättän aerılmayaçagımnı añladım. Sälättäge moxit äytep-betergesez räxät yuit ul.

- Berençe kürgän häm bügenge Sälätne çagıştır.

- Uylap karasañ, 2014-nçe eldan ällä ni küp wakıt ta uzmagan kebek. Tik aerma küzgä kürenerlek. Berläşmäbez yaş buın arasında tanılgannan-tanıla bara. Min monı proektlarnıñ sıyfatı yaxşı buludan, auditoriya belän eşli belüdän häm mawıktırgıç çaralar törlelegennän küräm. Çınnan da, Sälät bügenge köndä yaşlär arasında brendka äwerelde.

- Berençe äydamannarıñnı xäterliseñme?

- Äye, Ilsöyar apa Nuretdinowa häm Fänil abıy Xäsänow. Alar büleşkän energiyaneñ köçe bügengä kadär yörägemdä. Çın mägnäsendä ilhamlandıruçılarım buldılar, aktiw tormış pozitsiyale bulunıñ ni ikänen añlattılar.

- Sarı galstugıñ barmı soñ?

- Äye, bar, «Sälät-Baltaç» alanında tapşırdılar. Min anı Sälättäge berençe kazanışım dip sanıym.

- Sälättän tış ni belän şögıllänäseñ?

- Sälättän tış ictimagıy eşçänlek belän şögıllänäm, Samara tatarları tormışında aktiw katnaşam. Ölkäbezneñ «Tugan tel» tatar cämgıyateneñ ägzası bulıp toram, mäktäp eşlärendä  üz öleşemne kertep, KWN uynıym. Ozın süzneñ kıskası, küñelemä läzzät birerlek şögıllärem baytak. Täcribä tuplarga yardäm itüçe, yaña mömkinleklär açuçı çaralardan çittä kalmaska tırışam.

- Sineñçä, Sälätkä nindi proektlar citmi?

- Awır sorau bu. Proektlar sanı bolay da bik küp, törle yunäleşlärne kolaçlıylar. Miña kalsa, innowatsion, yaña formatlı restoran gına citmi. (Kölä) Monıñ belän yaşlär eşläre bazarı tulısınça Sälät kulında bulır ide.  

- Sälättäge tatar tele däräcäsen niçek bäyliseñ?

- Kübese tatarça yaxşı söyläşä. Äle bezneñ arada başka millät wäkilläre, çit töbäklärdän kilgän katnaşuçılar buluın da onıtmaska kiräk. Kamillekneñ çige yuk, öyränüne, alga barunı tuktatmıybız.

- Sälkeşlärgä teläkläreñ?

- Bernidän dä kurıkmagız! Kurku xise keşene ber urında tuktatıp tora, açılırga irek birmi. Üzegezgä ışanıgız! Sezneñ barısı da şäp kilep çıgaçak!   

-         Ilüsä, Sälätkä niçek kilep eläkteñ?

-         2012-nçe elda Bolgarga ekskursiyagä kittem. Şunda sarı futbolkalardagı balalarnı kürep soraştırdım. Kaytıp Sälät turında internettan ukıdım. Tik Sälätlelär safına elägü öçen tagın 2 el kötärgä turı kilde, Sälätkä 7-nçe sıynıftan soñ gına alalar bit. 2014-nçe elda min dä Sälät gailäsenä kuşıldım.

-         Berençe kürgän häm bügenge Sälätne çagıştır.

-         Şuşı 3 el eçendä Sälät bik nık üzgärde. Älege üzgäreşlär «Fänsar» fän häm mägarif üzäge açılgannan soñ aeruça da sizelde. Alannar sanı da arttı, garizalar kaldıru sisteması da küpkä ciñeläytelde. Proektlar sanı da üsä, alar belän bergä Sälät tä üsä. Sälkeşlärneñ mömkinläre dä artkannan arta bara. Sälättä xıyalıñnı tormışka aşırası bik ciñel.

-         Berençe äydamannarıñnı xäterliseñme?

-         Minem berençe alanım – «Sälät-Sanak». Berençe äydamannarımnı, älbättä, xäterlim: Rawil abıy belän Rezedä apa. Bügen dä Sälättä gel oçraşıp torabız. Rawil abıy KWN uynıy, anıñ çıgışların bik yaratıp karıym.

-         Sarı galstugıñ barmı soñ?

-         Kızganıçka karşı, sarı galstugım älegä yuk. Anıñ turında här sälkeş xıyallanadır.

-         Sälättäge tatar tele däräcäsen niçek bäyaliseñ? Ä çit tellärneken?

-         Sälättäge tatar tele däräcäse äydamannardan tora, minemçä. Şuña da törle alanda tatar telen belü törleçä. Äydaman – sälkeş öçen ürnäk şäxes, anıñ misalında sälkeş tatar telen kamilläşterergä omtıla. Ä gomumiläşterep äytkändä, Sälättäge tatar teleneñ sıyfatı äybät. Miña kalsa, Sälät – yaşlär arasında tatar telen populyarlaştıruçı berdänber oeşma.

-         Sineñçä, Sälätkä nindi proektlar citmi?

-         Miña kalsa, Sälätkä xoreografiya belän bäyle proektlar citmi. Mäsälän, «BikaFest»ta cırçı da, kompozitor da üzen kürsätä ala, ä biyuçe yuk. Üzem biyu belän şögıllängäç bu soraune küñelemä bik yakın aldım.

-         Sälättän tış ni belän şögıllänäseñ?

-         Sälät berläşmäsennän soñ «Duslık» berlegendä dä räis bulıp toram.

-         Sälkeşlärgä teläkläreñ?

-         Sälättä sine tänkıytläüçe bulmas. Şuña da kurkıp kalmaska kiräk! Siña monda härkem yardäm itärgä äzer. Üsärgä tırışıgız, ä Sälät sezgä yardäm kulın suzar! 

- Albina, sin Sälätkä niçek kilep eläkteñ? 

- Min bu tarixnı bik küp tapkırlar söylädem inde, tik niçä söyläsäm dä tuydırmıy. 2007-nçe elda Bögelmädä «Sälät-Bögelmä» alanı uzdırırga uyladılar. Nibarı ber törkem olimpiada ciñüçelären cıydılar da, smena oeştırıp kuydılar. Minem başta ber dä barasım kilmägän ide, tik änigä karşı torıp bulmadı. Ul elnı bez Bilärdä uzuçı Sälät festiwalenä delegatsiya bularak kına bardık, ä inde 2008-nçe elda «Sälät-Bögelmä»neñ räsmi açılu tantanası uzdı. 

- Berençe kürgän häm bügenge Sälätne çagıştır. 

- Çagıştırırga awır, döresen genä äytkändä. Çönki elek min bala idem, küp närsä minem öçen yañalık bulgan, dönyaga karaşım da sabıylarnıkı. Äydamannar sälkeş öçen kumir, ürnäk keşelär. Üzemne äydaman rolendä küz aldına da kiterä almıy idem! Direktor bulunı äytep tä torası yuk. Sälät üsä, alga bara. Minem señlemä 9 yaş, ul inde Forumda da bulıp ölgerde. Balalarnı üsterergä yardäm itüçe mondıy moxit buluı şatlandıra. Tormış, wakıt alga barsa da, Sälätneñ nizamätläre üzgäreşsez kala. 

- Berençe äydamannarıñnı xäterliseñme? 

- Äye: Irşad abıy häm Aynaz apa. Alarnıñ şämçekläreneñ räxätlegen äytep-añlatıp betergesez! Irşad abıy gitarada uynasa, Aynaz apa bezgä akıllı fikerlären citkerde. 

- Sarı galstugıñ barmı soñ? 

- Bar, 2008-nçe elda aldım. 

- Sälättäge tatar tele däräcäsen niçek bilgeliseñ? 

- Kalgannarnıkı niçekter, mineke könnän-kön üsä. Şuña da yugarı däräcädä dip bäyalim.

- Sälättän tış ni belän şögıllänäseñ? 

- Sälättän tış tormışıma wakıt bik az kala. Bu Sälättä eşläwem belän bäyleder. Magistraturanı tämamlıym. Xätta ikene. (Kölä) Buş wakıtımda räsem yasarga, çigärgä yaratam. 

- Sälkeşlärgä teläkläreñ? 

- Instagramda kızık kına ber xeşteg bar: #wdıxayasçastekajduyuminutu dip atala ul. Menä şunı telim min sezgä! Här minutıgız bäxetle ütsen! Tormışıgızdan läzzät alıp yaşägez!

-         Güzäl, Sälätkä elägü tarixın söyläp uz äle.

-         Sälätkä min oçraklı räweştä genä kilep eläktem disäm dä yalgış bulmas. Klasstaş kızım «Sälät-Ruxiyat» turında işetkän häm şul alanga mine dä gariza tutırırga mäcbür itte. Näticädä mine aldılar, ä anı yuk. Başta barmaska uylagan idem, tik yazmışımnı sınap karıysım kilde.

-         Berençe kürgän häm bügenge Sälätne çagıştır.

-         Bıel Sälät dönyası belän tanışuıma 5 el bula. Bu wakıt aralıgında Sälät zur üzgäreşlär kiçerde. Tik bu äle soñgı nokta tügel, berläşmäbez tagın da zurrak ürlär yaulıy ala. Şunısın tögäl äytä alam: eldan-el Sälät üsä, üzgärä häm zurrak uñışlarga ireşä.

-         Berençe äydamannarıñnı xäterliseñme?

-         Xäterlämiçä! Şuña da berençe äydamannar bit alar: Alinä apa Sadriewa häm Ilham abıy Ibrahimow. Äydamannarımnıñ bersendä soñınnan 3 tapkır sälkeş buldım äle. (Kölä)

-         Sarı galstugıñ barmı soñ?

-         Bar. Soñgı tapkır sälkeş bulganda «Sälät-Ruxiyat»tä aldım.

-         Sälättän tış ni belän şögıllänäseñ?

-         Bügenge köndä töp igtibarnı häm wakıtımnı ukuga biräm. Bıel uniwersitetnı tämamlıym, şuña da bar uylarım imtixannar häm diplom turında. Şulay uk ingliz telen öyränäm.

-         Sälättäge tatar tele däräcäsen niçek bäyaliseñ? Ä başka çit tellärneken?

-         Üzemneñ şäxsi ürnägemdä inandım: Sälättä tatar telendä söyläşäse kilep tora. Bu, minemçä, küp närsä turında söyli.

-         Sineñçä Sälätkä nindi proektlar citmi?

-         Barlık proektlar da citä. Här keşe biredä küñelenä oşagan yunäleşne taba alaçak.

-         Sälkeşlärgä teläkläreñ?

- Sälätkä elägü tarixın söyläp uz äle.

-  Sälätkä min 2010-nçı elda kilep eläktem. Apam – Gölçäçäk – «Rauşan»da ul elnı jurnalistika ukıtkan ide, kayttı da, miña Sälätneñ böten üzençäleklären söyläp birde. Əlbättä, ul aña kadär dä belgän Sälät xakında, ä menä miña bik kızık buldı. Şul uk elnı «Sälät-Şäxes» alanına yul tottım. Kittem dä, haman kaytkanım yuk Sälättän. (Kölä) Bik räxmätlemen apama! Əle dä xäterlim «Räxmät äyterseñ» äle digänen.

- Berençe kürgän häm bügenge Sälätne çagıştır. 

- Berençe kürgän Sälät xäzerge Sälättän nık aerıla. Gomumän alganda, Sälät bik nık üste! Xäzer nindi genä proektlar yuk, härber proektta küpme keşe katnaşa bit! Sälätne xäzer dönyanıñ törle poçmaklarında belälär. Geometrik progressiyadä üsä Sälätebez! Tagın 7 eldan soñ «Sälät-Ay» alanına garizalar kabul itelä disälär dä aptıramam.

- Berençe äydamannarıñnı xäterliseñme? 

- Berençe äydamannarımnı tönlä uyatıp sorasalar da äytep birä alam. Yaratkan Lenar abıy Siraciew belän Alisä apa Şäkürowa. Iñ berençe äydamannarı här sälkeşneñ küñelendä aerım urın alıp tora şul. Belmim, mine xäterlilär mikän, ämma minem öçen alar iñ-iñnäre!

- Sarı galstugıñ barmı? 

- Sarı galstugım bar. 2011-nçe elda aldım. Minem öçen bu Sälät dönyasında tagın ber baskıçka kütärelü bulıp tordı.

- Sälättän tış ni belän şögıllänäseñ? 

- Sälättän tış min bik küp närsä belän şögıllänäm. Futbol uynarga häm kararga, teatrga yörergä, törle temalarga bäxäs alıp barırga, kölergä, filmnar kararga, uemdagı ideyalärne çınga aşırırga, onıtılıp bargan tatar cırların tıñlarga, säyasät turında fiker alışırga yaratam. Keçkenädän balıkka yörim. Bu minem iñ yaratkan şögılem. Bu tormışta üzemne törledän-törle yunäleşlärdä sınap karıysım kilä.

- Sälättä tatar tele däräcäsen niçek bäyaliseñ? Ä başka tellärneken? 

- Sälät – tatar telle moxit dibez. Tatar telen min monda 8/10 dip bäyalär idem. Nigä 10 tügel disezme? Moña yaşlärneñ üzara aralaşuı komaçaulıy. Sälättän tış dönyası gel rus telendä ütä torgannarga, älbättä, kinät kenä tatar telenä küçü kıen. 

- Sineñçä Sälätkä nindi proektlar citmi?

- Sälät tatar dönyasın saklap kalırlık moxitlärneñ berse. Kiläçäktä Sälätneñ üzeneñ mäktäbe, uniwersitetı, teatrı, telewideniese häm başka törledän-törle kızıklı proektları hiçşiksez bulaçak. Barlık xıyallarnı çınga aşırır öçen mömkinleklär bik küp. Alar üzebezdä  – Sälättä.

- Sälkeşlärgä teläkläreñ? 

- Sälkeşlärgä telägem şul. Kurıkmagız! Häryaklap açılıgız! Üzegezne tagın da üsteregez! Sälättä barısın da näk menä sezneñ öçen oeştıralar, barısın da maksimal däräcädä alırga, Sälätneñ böten räxäten tatırga tırışıgız. Küpmeder wakıt uzgaç, soñ bulırga mömkin. 

- Sälätkä elägü tarixın söyläp uz äle.

- 2012-nçe elnıñ may kiçendä miña mäktäptäge berençe ukıtuçım şaltırattı. Törle yarışlarda katnaşıp, prizlı urınnar yaulauçı, aktiw balalar öçen  Sälät  lagere barlıgın äytte häm miña barırga täkdim itte. Üzemne sınap karap, gariza tutırırga buldım. Menä şulay başlandı da miña oçar kanatlar kuygan Sälät moxite belän tanışu.

- Berençe kürgän häm bügenge Sälätne çagıştır.

- Berençe kürgän Sälät ul - duslık, belem häm icat moxite. Kilü belän üzemä yaña mömkinleklär açtım, ana telebezne üsterü - bezneñ burıçıbız ikänlegenä inandım. Xäzerge wakıtta Sälät üsä, mömkinleklären kiñäytä, häm, minemçä, tatar milläteneñ yaktı kiläçäge öçen zur tırışlık kuya.

- Berençe äydamannarıñnı xäterliseñme? 

-  Älbättä! «Sälät- Bilär kalası » alanı äydamannarı -Aygöl apa Zakirowa häm Ilşat abıy Ismägıylew. Minem Sälät dönyası belän kızıksınuımda alarnıñ öleşe zur, şunıñ öçen zur räxmät alarga!

- Sarı galstugıñ barmı soñ? 

- Yuk, sarı galstugım yuk. Anı alırga telägem bar,  läkin «El sälkeşe» isemenä iya bulu minem öçen zur gorurlık häm sarı galstukka karaganda möximräk.

- Sälättän tış ni belän şögıllänäseñ? 

- Min Kazan Federal Uniwersitetı IT-litseenıñ 11-nçe sıynıfında belem alam häm bügenge köndä imtixannarga äzerlänü belän mäşgul. Läkin buş wakıtımda icat belän şögıllänergä yaratam: biim, jırlıym.

- Sälättä tatar tele däräcäsen niçek bäyaliseñ? Ä başka tellärneken? 

- Sälättä tatar tele däräcäse bik yugarı. Ul tagın da üsä, kiñäya häm balalar anıñ nikadär bay, matur buluı turında tagın da kübräk belä. Läkin şul uk wakıtta rus, ingliz telläre dä eş kullanıla, çönki sälätle balalar törle yaktan üsärgä tieş.

- Sineñçä Sälätkä nindi proektlar citmi?

- Bügenge köndä Sälät sälkeşlärenä küp mömkinleklär birä. Minemçä, Sälätkä sängat mäktäbe citmi. Anda el däwamında balalar cır, biyu, räsem yasau häm başka şögıllär belän mawıga alırlar ide.

- Sälkeşlärgä teläkläreñ?

- Sälkeş bulgan mizgellärneñ härberseneñ kaderen belegez. Oyalıp, kurkıp tormagız, üzegezne häryaklap açıgız. Bergäläp yaratkan Sälätebezne, tugan telebezne nıgıtu, üsterü östendä eşlik!

- Alisä, Sälätkä niçek kilep eläkteñ?

- Sälätkä min berençe tapkır 2007-nçe elda olimpiadada ciñgäç sessiyagä kildem. Awıl mäktäbendä ukuçı gadi awıl balası idem. Şuña Sälät turında «Tamçı şou», «Yaşlär tuktalışı» kebek tapşırulardan gına işetkän buldı. Älbättä, sessiyagä çakıru algaç bik söendem. Ä menä sessiyaneñ üzenä kilgäç kurkıp kaldım. Monda barlık balalar, ukuçılar şundıy akıllı, nindider sörännär kabatlap yörilär, zur keşelärgä oçraşular wakıtında katlaulı soraular birälär, barısınnan da törle ideyalär taşıp tora. Bu minem öçen şakkatkıç xäl ide. Şuña sessiyaneñ berençe ike könendä miña bik awır buldı. «Monnan soñ başka Sälätkä barmıym, miña monda bik oyat!» – dip, änigä şaltıratkanımnı äle dä xäterlim. Tik şul wakıtta Sälättäge moxit, äydamannarnıñ köçlelege, mäktäp balaları arasındagı Sälät prezidentınıñ (ul wakıtta Ramazan ide) döres eşçänlek alıp baruı mindä üz-üzemdä ışanıç uyattı, Sälätkä tulısınça alıp kerep kitte häm sessiyaneñ azagında min alannarga da, kalgan sessiyalärgä dä yöriyaçäkmen dip süz birep, Sälätkä gaşıyk bulıp kaytıp kittem. 

- Berençe kürgän häm bügenge Sälätne çagıştır.

- Min berençe kürgän Sälät xäzergese kebek ällä ni zur tügel ide. Barısı da ber-bersen belä ide. Xäzer isä Sälät şul kadär zuraydı. Bez yaşägän, ukıgan urınnar bik gadi ide, ä xäzer barlık yaşäü, uku şartları küpkä yaxşırdı. Proektlar sanı iskitkeç küp! Elegräk «Min Sälättä buldım!», – digäç, «Ä närsä soñ ul?» – dip sorıylar ide. Ä xäzer isä: «O, min dä Sälättä buldım bit! Minem dustım Sälättän!»  digän cawap işetäseñ.

- Berençe äydamannarıñnı xäterliseñme?

- Äye. Berençe äydamannarım Aysılu apa Räxmätullina häm Änwär Tuykin ide. 

- Sarı galstugıñ barmı?

- Bar, berençe elnı uk «Sälät-Rauşan» alanında birdelär. 

- Sälättäge tatar tele däräcäsen niçek bäyaliseñ?

- Sälättäge tel däräcäsenä tel-teş tidererlek tügel, minemçä. Berara urıslaşu köçäya digän fiker tuıp algan ide, tik ul tiz onıtıldı. Bügen tatar telenä igtibar bik zur, tagın da nıgrak üsterdelär. Şäxsän üzem Sälätkä kilgän saen awız tutırıp tatarça söyläşäm, mine härwakıt añlıylar, minem belän dä tatarça söyläşälär.

- Sineñçä, Sälätkä nindi proektlar citmi?

- Minemçä, bügen Sälättä bar da citeş, bar da bar. Ayga menü proektı gına yuk kebek. (Kölä) Kem belä, bälki bu da inde uyda bardır.

- Sälättän tış ni belän şögıllänäseñ?

- «Tatar radiosı»nda eşlim, bügenge köndä dekret yalında. Rayana isemle kız üsteräbez. Anı da Sälät dönyası, «Sälät-Bäläkäç» klubı belän tanıştırırga telim. Yal belän berrättän eşne dä alıp barırga tırışam: «Muzıkal kaymak» tapşıruınıñ telewizion wersiyasen alıp baram, stsenariylar yazam. Äle küptän tügel genä kafe açu biznesı belän dä şögıllänä başladım.

- Sälkeşlärgä teläkläreñ?

- Sälätkä oçraşularga kilgän, zur ürlärgä ireşkän abıy-apalar tormış täcribälärennän çıgıp gel matur, akıllı teläklär telilär. Şularnı kuen däftärenä yazıp barıgız, gel istä totıgız. Ä minnän teläk: ukırga, eşlärgä, matur itep yaşärgä!

- Alimä, Sälätkä niçek kilep eläkteñ?

-  Sälätkä berençe kursta ukıganda eläktem, «Izge çişmä» alanına. Ni kızganıç, sälkeş bulu bäxete miña eläkmäde.

- Berençe kürgän häm bügenge Sälätne çagıştır.

- Sälät üzgärde. Elekkege häm xäzerge Sälätne çıgıştırıp ta bulmıy kebek. Ämma härkaysınıñ üz kıymmäte bar, minemçä. Elekkege taşıp torgan entuziazm, romantika, ideyalär, xäzerge wakıtta texnik mömkinçeleklär, şartlar, xökümät tarafınnan yardäm kürsätüläre belän berläşterelgän, tagın da köçlelängän. Äle alda tagın nilär kötäder! Läkin min ışanam, barısı da yaxşı bulaçak. 

- «Izge çişmä»däge berençe äydamannarıñnı xäterliseñme?

- Alar bezneñ alannarıbıznıñ direktorları ide, minem yöräktä gel ukıtuçılarım, äydamannarım, ürnäk aluçılarım – Bulat abıy Xäkimow, Röstäm abıy Musin.

- Sälättän tış ni belän şögıllänäseñ?

- Irem belän 3 bala üsteräbez, säyaxät itärgä bik yaratabız, illär gizäbez. Mäktäpkäçä yaştäge balalar belän eşlädem. Kazanda tatar telendä bişektän üsterü yunäleşen üsterergä tırıştık. Kanadaga küçkäç tä tatar balalarına däreslär oeştırdım. Xäzerge wakıtta üzem dä ukuçı min – kölliyattä frantsuz telen öyränäm.

- Sälättäge tatar tele däräcäsen niçek bäyaliseñ? Ä başka çit tellärneken?

- Soñgı ellarnı minem festiwalda (xäzer Sälät Forumı) bulganım yuk, şuña da bäyalärgä awırrak. Şäxsän üzemä Sälät tormışımda tatar telle dönya birde. Gomumän äytkändä, berläşmä tatar telen populyarlaştıruda zur rol uynıy. Alga taba şuşı yunäleştä eşläp, igtibarnı yugaltmawıgıznı teläp kalam.

- Sineñçä, Sälätkä nindi proektlar citmi?

- Härber proekt üz wakıtı, köçe, ixtıyacı belän tua. Sälättä bik köçle fänni proektlar tuaçak dip ışanam.

- Sälkeşlärgä teläkläreñ?

- Sälkeşlärgä gel aktiw bulırga, här könnären produktiw ütkärergä, xıyallanırga kiñäş itär idem.