Дамир Фаттахов: «Сәләт» - брендовый проект Татарстана»

Damir Fattaxow: «Sälät» - brendowıy proekt Tatarstana» 11.03.2019

Tatarstan başkalasında talantlı balalarnı häm yaşlärne üsterü ölkäsendä birelä torgan «Sämrux-2018» el premiyaseneñ büläkläü tantanası uzdı. Premiya «Sälät» oeşması tarafınnan oeştırıla häm sälätle yaşlärne üsterü, oeşma belän bergä eşläüçe ostazlarnı, partnerlarnı, awtorlarnı häm oeştıruçılarnı büläkläüne küzdä tota.

Bıelgı premiya Sälätneñ 25 ellıgına bagışlangan ide. Tamaşaçılar sanı 700gä citte. Alar arasında «Sämrux-2018» premiyase katnaşuçıları, alarnıñ äti-äniläre, Sälätneñ profille smenaları oeştıruçıları häm katnaşuçıları bar ide. Tantananıñ märtäbäle kunakları arasında RF Däülät Dumasınıñ VII çakırılış deputatı, «Sälät»neñ Popeçitellär sowetı räise Marat Bariew, Tatarstan Respublikası Premer-ministrı urınbasarı Läylä Fazlıewa, TR Yaşlär eşläre ministrı Damir Fättaxow, yazuçı, dramaturg Rabit Batulla häm başkalar bar ide.

Tatarstannıñ mägarif häm fän ministrı Rafis Borhanow Tatarstan Prezidentı Röstäm Miñnexanownıñ sälamen citkerde häm: «Sez – bezneñ terägebez, bez sezgä bik zur ömetlär baglıybız», – dip belderde.

Läylä Fazlıewa: «Sezneñ bik zur baylıgıgız bar – tugan telegezne beläsez. Üz xalkıgıznıñ mädäniyaten saklıysız. Min sezgä şunıñ öçen bik räxmätle. Tagın ber sıyfatıgız oşıy – komandada eşli beläsez häm härwakıt ber-beregezgä teräk bulasız», – dip söyläde.

«25 el däwamında Sälät gadäti yaşlär xäräkätennän cämgıyatne sälamätländerü texnologiyasenä äylände. Ul üz kanatı astına tugan yaknıñ mädäniyaten, tugan tellären yarata häm saklıy, belemgä omtıla torgan sälätle yaşlärne häm osta belgeçlärne tuplıy. Sälät – ul sıyfat bilgese», – dip söyläde Damir Fättaxow.

Premiya üz eçenä 8 nominatsiyane aldı: «El sälkeşe», «El äydamanı», «El ölkän äydamanı», «El direktorı», «El alanı», «El kuldaşları», «El klubı» häm «Sälät cırlıy».

Konkurs etapları şäxsi häm komanda kazanışlarınnan torgan portfolio tuplaudan, ekspertlar soraularına cawap birüdän häm intellektual wiktorinadan tordı. Ekspertlar bularak ministrlık häm wedomstwo wäkilläre, galimnär häm mädäniyat ölkäsendä eşläüçelär, şulay uk tanılgan cämägat eşlekleläre häm yaşlär oeşmaları citäkçeläre çakırılgan ide.

Premiyaneñ üzençälege – fund.selet.biz kraudfanding platformasında bitaraf bulmagan keşelär tarafınnan akçalata büläk fondı formalaşa, anda teläge bulgan här keşe üz öleşen kertä ala.

2018-nçe el ciñüçeläre:

- «El äydamanı» - Zärinä Xälilowa, 20 yaş (Alekseewsk rayonı);

 

- «El ölkän äydamanı»– Güzäl Äxmätcanowa, 21 yaş (Kazan);

 

- «El direktorı» - Bulat Gaynetdinow, 24 yaş (Kazan);

 

- «El kuldaşları» - Azat Bulatow, Alinä Näbiullina («Sälät – Eşmäkär» alanı);

 

- «El klubı» - «Sälät Aksubay klubı» (klub räise – Läylä Moratşina, Aksubaynıñ 3-nçe gomumbelem birü mäktäbe»);

 

- «El sälkeşe» - Ence Äxmätcanowa, 16 yaş (Kazan);

 

- «El alanı» - «Sälät – Samara» (Samara);

 

«Sälät cırlıy» - «Sälät - Aznakay» (Süzlär:Batır Xarisow, muzıka: Möxämmät Zinnätullin, başkaruçılar: Batır Xarisow, Elena Koşelewa);

 

- «El partnerı» - «Tübätäy» xäläl tiz tuklanu çeltäre, PAO «Ak Bars Bank»;

 

- «Sälät stipendiyase» - Ilyas Zäynullin, Aygöl Wäliullina, Timur Nazarow, Bulat Wäliullin.


Wozwrat k spisku