«ВикиШкола Сэлэт» организует марафон статей в честь 75-летия Великой Победы
(Kazan, 27 aprel, «Tatar-inform», Zilä Möbäräkşina). Böek Ciñüneñ 75 ellıgı uñaennan Tatar Wikipediyasendä Böek Watan sugışında katnaşkan keşelär turında mäkalälär yazu marafonı oeştırıla. Bu xakta «Tatar-inform» xäbärçesenä «Sälät» klubı prezidentı Timerxan Şäyxetdinow xäbär itte.
«Burıçıbız — xalık arasında, berençe çiratta — yaşlärdä, Böek Watan sugışında katnaşkan şäxeslär turında tarixi xäter däräcäsen kütärü, tatar telendä iñ zur irekle onlayn-entsiklopediyadä — Tatar Wikipediyasendä bu şäxeslär belän bäyle açık mäglümatnı arttıru, üz xalkınıñ häm tugan töbägeneñ tarixı belän kızıksınuçı aktiw katnaşuçılarga yardäm itü», — dide ul.
Marafonda Tatar Wikipediyasendä (tt.wikipedia.org) terkälgän 14-30 yaşlek härkem katnaşa ala. «Marafon öç etapta ütkärelä. 23 apreldä start birelde, Tatar Wikipediyasendä mäkalälär yazu häm bastırıp çıgaru. Alar 20 — 25 may könnärendä tikşereläçäk. Älege etapta jyuri ägzaları barlık yazılgan mäkalälärne tikşerep, ciñüçelär isemlegen tözi», — di «Sälät» prezidentı.
«Ciñüçelärne büläkläü IX Xalıkara „Sälät“ yaşlär uku-ukıtu forumı kısalarında ütkäreläçäk. Marafon „Iñ yaxşı möxärrir“ häm „Iñ yaxşı awtor“ nominatsiyalärendä ütäçäk. Katnaşuçınıñ garizası Tatar Wikipediyasendä Marafon bitendä tutırılgan tablitsada häm selet.biz saytında tutırılgan formada terkälergä tieş. Marafonga garizalar birü 2020 elnıñ 20 maenda 23:59 sägattä tämamlanaçak», — di ul.
Marafonda katnaşu öçen Tatar Wikipediyasendä tübändäge törkemnärgä kergän mäkalälärgä tözätmälär kertergä yaki yaña mäkalä yazarga kiräk: Sowetlar Soyuzı kaharmannarı, «Ciñü» ordenı iyaläre, Kızıl Bayrak ordenı iyaläre; I, II, III däräcä Suworow ordenı iyaläre; I, II, III däräcä Kutuzow ordenı iyaläre, Aleksandr Newskiy ordenı iyaläre; I, II däräcä Watan sugışı ordenı iyaläre, Kızıl Yoldız ordenı iyaläre
Şulay uk älege isemlekkä «Şäxsi batırlık öçen» ordenı iyaläre, «Batırlık öçen» medale iyaläre, «Sugışçan xezmätläre öçen» medale iyaläre, Frontta yaş kileş wafat bulgannar (utızdan yaşräklär) da kerä. Tatar Wikipediyasendä marafon bite şuşı sıltamada. Beleşmälär öçen telefon: (798-74) 05-18-84 — Xäbil Säxäbiew, «Sälät WikiMäktäbe» proektı citäkçese.