Юбилейный форум «Сәләт» соберет в Биляре более 8 тысяч одаренных детей

19 iyun-2 awgustta Tatarstannıñ Bilär tarixi-arxeologik muzey tıyulıgında «Sälät» X Xalıkara yaşlär belem birü forumı uzaçak. Anda 18 meñgä yakın bala katnaşır dip kötelä. Bıel da forumda onlayn katnaşıp bulaçak.

«Forumda Tatarstannıñ här rayonınnan, Rossiyaneñ başka töbäklärennän, xätta Belgiya, Germaniyadän dä katnaşaçaklar. Bilärgä 8 meñgä yakın keşe kiläçäk. Uzgan eldagı kebek, bıel da onlayn katnaşıp bula. Onlayn räweştä 9-10 meñ keşe katnaşır dip kötäbez. Şul räweşle barlık katnaşuçılar sanı 18 meñgä yakın bulırga tieş», — dide «Sälät» yaşlär Üzäge direktorı Aygöl Gabdraxmanowa.

Forum 6 profille smena formatında uza. Smena barışında Tatarstan häm Rossiyaneñ aldıngı ekspertları, galimnäre, mädäniyat häm sängat xezmätkärläre ostaxanälär, laboratoriyalär häm tematik mäydançıklar ütkäräçäk.

«Üzemneñ Bilärgä berençe tapkır kilüemne xäterlim. Anda 20-25 çatır ide. „Sälät“ 1997 eldan cıen bularak ütkärelä başladı. Tatarstan Prezidentı Röstäm Miñnexanow Bilärgä kilep, bäyrämneñ energetikasın toep, cıennı kiñäytergä kiräk, digän fikeren belderde. Xäzer 10 el däwamında forum ütep kilä», — dide Tatarstan yaşlär eşläre ministrınıñ berençe urınbasarı Timur Söläymanow «Tatar-inform»da uzgan matbugat oçraşuında.

«Sälät» Xalıkara yaşlär belem birü forumı — Tatarstannıñ iñ märtäbäle yaşlär proektlarınıñ berse. Anıñ turında Rossiya genä tügel, çit illärdä dä yaxşı belälär. Ul — mädäniyat, sängat, belem birü, media häm IT ölkälärendäge ideyalär, yañalıklar belän büleşü platforması. 

Awtor: Gadel Äxmätcanow

Tulırak: https://clck.ru/Wt3st