Представили новую песню форума Сәләт

«Tatar-inform» mäglümat agentlıgındagı matbugat konferentsiyasendä «Sälät» X Xalıkara yaşlär belem birü forumınıñ bıelgı cırın täkdim ittelär.

«Här elnı forumga bagışlap cır yazıla, şundıy ber matur traditsiya. Anı küp ellar Ilnaz Safiullin yazdıra ide. Bıel da cır „Sälät“ öçen maxsus yazıldı. Anıñ köen min yazdım, Ilgiz Şäyxraziew häm Zärinä Wildanowa başkara. „Sälät“ öçen alar öç el däwamında cırlıy inde», — dide forumnıñ art-direktorı Islam Wäliew «Tatar-inform» xäbärçesenä.

Oeştıruçılar cırnı «Sälät» forumınıñ räsmi gimnı tügel, ä cäyge gimn bularak täkdim itä. Anıñ isemen forumnıñ berençe könendä äytäçäklär.

«Räxät, ciñel cäyge gimn kilep çıktı. Cırnı forumnıñ berençe kiçendä täkdim itäçäkbez. Annan soñ anı här kiç işetergä mömkin bulaçak. Bu cırga turı kilä torgan maxsus biyu dä äzerlädek. Fleşmobnı sotsial çeltärlärdäge muzıkal platformalarda da urnaştıraçakbız», — dide art-direktor.


Islam Wäliew äytüençä, Xalıkara yaşlär belem birü forumı bügenge artistlarnıñ çıgışı belän genä çiklänmi. «Forumda „Sälät radiosı“ digän proektta Ilham Şakirow, Älfiya Awzalowa, Zöhrä Şärifullina kebek legendar cırçılarnı da işetergä mömkin bulaçak. Törle cır, törle rubrikalar bula», — dide ul.

Monnan tış, forumda Tatarstannıñ atkazangan artistı Elena Kalaganowa, «Altın bitlek» milli teatr premiyase iyase Nurbäk Batulla, Bolaktagı teatr akterı häm rejisserı Iskändär Nuricanow häm başkalar katnaşaçak. Çaraga «Çto? Gde? Kogda?» telewizion uenı belgeçläre dä çakırulı.

19 iyun-2 awgustta Tatarstannıñ Bilär tarixi-arxeologik muzey tıyulıgında «Sälät» X Xalıkara yaşlär belem birü forumı uzaçak. Anda 18 meñgä yakın bala katnaşır dip kötelä. Bıel da forumda onlayn katnaşıp bulaçak.