Юбилейный форум «Сәләт» соберет в Биляре более 8 тысяч одаренных детей

Forum respublikanıñ iñ märtäbäle yaşlär proektlarınıñ berse bulıp tora. Anıñ turında Rossiya genä tügel, çit illärdä dä yaxşı belälär. Ul ruxi häm mädäni yaktan baerga telägän yaşlärne berläşterä.

– El saen bez forumnı Bilärdä uzdırabız. Balalar öçen bu – bik kötep alıngan wakıyga. Anda törle rayonnardan, töbäklärdän cıelgan balalar xalkıbıznıñ tarixı, mädäniyate belän tanışa. Altı forumnıñ härberseneñ üz yunäleşe, läkin anıñ asılı bulıp “Sälät” moxite tora. Anı añlatıp bulmıy, ul moxitne üz küzeñ belän kürergä, üzeñä toyarga kiräk, – dide Tatarstannıñ Yaşlär eşe buença ministrınıñ berençe urınbasarı Timur Söläymanow.
Monnan tış, traditsion formatta “Sälät”neñ profille smenaları da uzaçak. Bıel alarnıñ sanı – 22. Härber forumga şul smenalarda katnaşkan balalar da kiläçäk.

Forumga el saen 30 dan artık töbäktän wäkillär kilä. Altı forumnıñ härbersendä 1200 bala katnaşa. Bıelgı üzgäreşlär turında “Sälät” yaşläre üzäge direktorı Aygöl Gabdraxmanowa söyläde.

– Forumda respublikanıñ härber rayonınnan, Rossiyaneñ başka töbäklärennän, xätta Belgiya, Germaniyadän dä katnaşuçılar bulaçak. Bilärgä 8000 meñgä yakın keşe cıelaçak. Uzgan eldagı kebek, bıel da onlayn katnaşıp bula, – dide ul.
Forumga “Çto? Gde? Kogda?” telewizion uenı belgeçläre Nikolay Krapil, Wera Rabkina, Denis Galiäkbärow häm Olga Bıkowanı da çakırgannar. Şulay uk kunaklar arasında cırçı AYGYUL, kompozitor, “ART Wektor” icadi initsiatiwalar üzäge citäkçese Marat Taturas, biyuçe, “Altın bitlek” milli teatr premiyase iyase Nurbäk Batulla, Tatarstannıñ atkazangan artistı Elena Kalaganowa, Bolaktagı Teatr akterı häm rejisserı Iskändär Nuricanow, xoreograf Anna Şçekleina, “Altın bitlek” milli teatr premiyase ekspertı Wita Xlopowa h.b. tanılgan şäxeslär bar.

Awtor: Läysän Safina

Tulırak: https://vatantat.ru/2021/06/56357/