IT + Биләр форум = җиде көнлек цифрлы дөнья

19.07.2024

Bilär tarixi-arxeologik muzey tıyulıgı territoriyasendä XIII Xalıkara yaşlär uku-ukıtu forumınıñ dürtençe smenası başlandı.

Mäglümati texnologiyalär Bilär Forumı 18 iyuldän alıp 24 iyulgä kadär ütäçäk. Biredä respublikanıñ törle töbäklärennän 800 gä yakın bala uku-ukıtu programmasında belem ala.

Mäglümati texnologiyalär Bilär Forum kısalarında geymifikatsiya aşa forumnıñ töp yunäleşlären: IT häm mägarif, IT-trendlar, IT häm biznes, digital-hönärlär açuçı profille ostaxanälär häm uku-ukıtu mäydançıkları gamälgä aşırılaçak. 

Belgeçlär katnaşında uzaçak diskussiya mäydançıkları katnaşuçılarnı eşmäkärlek yunäleşe belän dä tanıştıraçak. Şulay uk, smenada forum kısalarında el saen ütkärelä torgan maxsus «EkoSälät» proektı gamälgä aşırılaçak. Anıñ kısalarında «Ekologiya» temasına bagışlangan lektsiyalär, ostaxanälär, treninglar, uennar häm başka çaralar ütkäreläçäk.

Forumnıñ räsmi açılu tantanası härwakıttagıça märtäbäle kunaklarnıñ süzennän başlanıp kitte. Balalarnı Tatarstan Respublikasınıñ Fännär akademiyaseneñ Gamäli semiotika institutı direktorı Rinat Gıylmullin häm «Tattelekom» oeşmasınıñ däülät sektorı buença eşlär citäkçese Gölnaz  Nurtdinowa sälamläde. Alar Sälät berläşmäsenä räxmät süzlären belderdelär, älege moxitneñ zarurilıgı xakında tagın ber kat bilgeläp üttelär.

«Bügenge köndä Tatrstanda bik zur mömkinleklär bar. Törle şartlar bar, törle däülät programmaları eşläp kilä. Minem teläklärem şul: şundıy ähämiyatle smenanı toep kalırga, yaña duslar tabarga, üzegezgä zur maksatlar kuep, şularga ireşergä tırışırga» – dip, biredä uzaçak cide köngä üz teläklären belderde Rinat abıy. Şulay uk teläklären Gölnaz Nurtdinowa da östäde: «Keşelärneñ ber-berse arasında bulgan mönäsäbätläre – iñ kaderle kıymmätlär. Şuña kürä bu mönäsäbätlärne saklagız».

Smenada katnaşa almagan keşelär öçen üz eşen «Canlı Sälät» turı efirlar studiyase däwam itäçäk. WKontakte häm YouTube forumınıñ räsmi akkauntlarında translyatsiyalär härkemne Bilärgä alıp kaytaçak häm biredäge moxitkä çumarga yardäm itäçäk. Älege efirlarnı smenadan soñ da, telägän wakıtta kararaga mömkin.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla, dip xäbär itte «Sälät»neñ matbugat üzäge.

Tulırak: https://idel.top/news/novosti-tt/it-bilar-forum-ide-konlek-cifrly-donia