Биләрдә «Сәләт» форумының медиа сменасы ачылды

Bilärdä XIII Xalıkara «Sälät» yaşlär uku-ukıtu forumınıñ iñ ozın häm iñ küp sanlı katnaşuçılı smenalarınıñ berse – Media Bilär Forum start aldı. Ul 2 awgustka kadär däwam itäçäk. Bu xakta «Tatar-inform» xäbärçesenä «XIII Xalıkara «Sälät» yaşlär uku-ukıtu forumınıñ mäglümät üzäge citäkçese Gölnaz Gatina xäbär itte.

6 kön däwamında Bilär cire interwyular, foto häm wideoga töşerülär, podkastlar, trendlar, icat belän tulaçak.

«Bişençe smenada Samara, Orenburg, Mäskäü ölkäläre, Çuwaşiyadän, Sankt-Peterburgtan häm Tatarstannıñ barlık rayonnarınnan 823 bala katnaşa. Katnaşuçılar arasında – fän olimpiadaları, konferentsiyalär ciñüçeläre häm prizerları, töbäk «Sälät» klubları liderları häm Tatarstan Respublikası rayonnarı häm mäktäpläre aktiwistları», – dide Gölnaz Gatina.

Media Bilär Forum – sotsial mediaresurslar belän eşläü öçen kiräkle bulgan aktual instrumentlarga bagışlangan smena. Smenada eş 6 yunäleştä alıp barıla: foto häm wideoprodakşn, sotsial çeltärlärne alıp baru, telewizion jurnalistika, bloging häm podkastlar.

«Smena kısalarında Tatarstan häm Rossiyaneñ äydäp baruçı belgeçlärennän ostaxanälär uza. Forumda katnaşuçılarnıñ treninglar, maxsus proektlar häm lektsiyalär tıñlau barışında spikerlar birgän biremnärne ütäü, algan belemnärne şunda uk gamäldä kullanu, üzlären jurnalistlar häm media ölkäse keşeläre bularak sınau mömkinlege bar. Däreslärdä zamananıñ aktual häm faydalı koralların kullanuga basım yasala», –dip belderde forumınıñ mäglümät üzäge citäkçese.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.

Tulırak: https://tatar-inform.tatar/news/bilarda-salat-forumynyn-media-smenasy-acyldy-5891183