Айгуль Габдрахманова:«В прошлом году мы собрали более 700 тысяч в призовой фонд»
18.02.2025
17 fewral könne «Sälätle cäy - 2025» häm «Sämrux» el premiyasen tapşıruga bagışlangan matbugat konferentsiyase uzdı. Biredä Tatarstan Respublikası yaşlär eşläre ministrı urınbasarı Aygöl Sabirowa, «Sälät» yaşlär üzäge direktorı Aygöl Gabdraxmanowa, «Sälät» yaşlär üzäge direktorı urınbasarı, «Sälätle cäy» üzäge citäkçese Ayaz Xanafin, «Sämrux» premiyase finalistı Söläyman Möxämmätcanow häm bloger, küp ellar «Sälät» smenalarında katnaşkan Alinä Gimaltdinowa katnaştı.«Sälättä eşläüçelärneñ töp missiyase – tatar telen üsterü häm saklau. Şunıñ öçen dä bez ana telenä karata kızıksınu uyatırga tırışabız. Anda alar tatarça cırlar cırlıylar, üzläre dä yazıp karıylar. Törle yaklap şäxesneñ sälätlären üsterergä tırışabız», – dip süzen başladı Aygöl Sabirowa.
2025 elda barlıgı 26 profille alan planlaştırıla. Alar Tatarstanda gına tügel, kürşe respublikalarda da üz eşlären başkaraçak. Äytik, Çuwaşiyadä häm Başkortstanda. Şulay uk, härwakıttagıça Izge Bolgar Cirendä 6 forum uzaçak. El däwamında törle yunäleştäge proektlar tormışka aşıralaçak. Ciñüneñ 80 ellıgı bulu säbäple, balalarga patriotik tärbiya häm däreslär dä bireläçäk.
«Sämrux el premiyase – el däwamında «Sälät»ne, sälätle yaşlärne üstergän keşelärne, komandalarnı barlau, tanıtu. Bıel ul 10nçı tapkır uzdırıla. Eldan-el premiyaneñ nominatsiyaläre üsä bara. Bez härber ciñüçegä akçalata premiya büläk itäbez. Bez anı däülättän soramıybız. Härber keşe, sälätle yaşlärne büläkläü forsatınnan, üz öleşen kertä ala. Bezneñ közdän başlap, maxsus mäydançık eşläp kilä. Uzgan el bez 700 meñnän artık büläkläü fondı tupladık. Häm anı härber ciñüçe arasında tigez itep büldek. Bıel da şulay eşläyaçäkbez», – dip söyläde Aygöl Gabdraxmanowa.
19 fewral könne 17:00da «Bäşir Rämiew isemendäge IT-park»ta tantanalı räweştä ciñüçelärneñ isemnäre bilgele bulaçak. Turı efirnı «Sälät»neñ sotsial çeltärlärennän karau mömkin.
Tulırak: https://yalkyn.ru/news/belmi-kalma/aigol-gabdraxmanova-uzgan-el-bez-700-mennan-artyk-bulaklau-fondy-...