Sälät aktiwistları XIX Bötendönya yaşlär häm studentlar festiwalendä Tatarstannı täkdim itä ← kire kaytirga

22-nçe oktyabrgä kadär Soçida XIX Bötendönya yaşlär häm studentlar festiwale uza. Festiwaldä 190 ildän 25 000 katnaşuçı, 8 000 wolonter, 200 cämägat eşleklese katnaşa. Şular arasında 5 Sälät aktiwistı da bar: Nadir Kuramşin, Rufat Kiyamow, Niyaz Murtazin, Ruslan Zakirow häm Arman Kostanyan.

Festiwal xalıkara mönäsäbätne nıgıtu, kiläçäktä yaña proektlar buldırunı üz eçenä ala.

Festiwal kısalarında diskussion, mädäni, sport çaralarına kagılışlı şäp programma äzerlängän.

Nadir Kuramşin, «Sälät-Olimp» proektı citäkçese:

- Festiwal – üzeñne häm yaşägän Tatarstan Respublikasın kürsätü öçen menä digän mäydançık. Monda çit il yaşläre belän aralaşıp, tagın da kübräk täcribä tuplap bula.  Här mäydançık üzenä  kürä original: tekä spikerlar aktual temalarga oçraşular ütkärä. Festiwaldä katnaşa aluıma bik şat. Min monda üzemneñ Respublikamnı, Sälätemne täkdim itäm.  

Rufat Kiyamow,  «Bikafest 2017» proektı koordinatorı:

- Festiwal – üz östeñdä eşlärgä mömkinlek tudıruçı mäydançık. Monda kilergä äzerlängändä bez kaya barasın belep kittek. Kızıklı master-klasslar, tanılgan spikerlar belän oçraşular gına da ni tora. Häm, älbättä, Soçinı kürü bäxetenä dä ireştek. Här könebez üzençä istä kalaçak. Aeruça XIX Bötendönya yaşlär häm studentlar festiwaleneñ açılu tantanası. Üzençälekle kontsert programması. Ä kürgäzmädäge yaña texnologiyalärne kürep min üzemä küp kenä yañalıklar aldım.

Niyaz Murtazin, Sälät Forumında sport yunäleşe citäkçese:

- Ni öçen min monda? Çönki bu törle millät wäkilläre, telläre, goref-gadätläre belän tanışa alu urını. Iñ istä kalganı ul – kürgäzmälär. Monda här millät üz telendä aralaşıp, üz mädäniyaten başka millätlärgä kürsätä. Panama, Braziliya, Tönyak Koreya, Yaponiyalärdä bulıp kaytkan kebek buldım. Gomergä istä kalırlık mizgellär. Festiwal bik kızıklı. Här katnaşuçı üzençälekle häm sälätlären törle yaklap açarga omtıluçı yaşlär.

Ruslan Zakirow, «Bolgar-Tugan tel 2016» forumınıñ programma direktorı:

- Festiwal xakında duslardan işetep beldem. Gariza tutırdım, barlık äñgämälärne uzdım häm min monda, bäxetlelär rätendä.  Tatarstan delegatsiyase sostawında bu Festiwalgä öçençe tapkır elägäm, bu minem öçen zur bäxet. Festiwal – bezneñ respublikabıznı kürsätü öçen zur ber platforma. Programma bik kızıklı. Barısı da istä kaldı: spikerlar, açılu tantanası...  RF-nıñ tışkı eşlär ministrlıgı wäkile Mariya Zaxarowa belän oçraşunı aerım äytep uzasım kilä. Ul şunıñ kadär açık keşe. Ber sägatlek lektsiya, xätta ike sägattän dä arttı. Oçraşudan soñ kümäk fotolarga töşep, här katnaşuçıga  diyarlek teläklären citkerde. Şunı da iskärtep uzıym äle: bezneñ Tatarstan delegatsiyase kienü häm üzlären totışı belän başkalardan nık aerılıp tordı. Bez – berdäm, şäp komanda! Barlık oeştıruçılarga häm Tatarstan Respublikası xökümätenä zur räxmät äytäsem kilä. Açılış tantanasına bezneñ prezidentıbız Röstäm Nurgali ulı  Miñnexanow ta kilgän ide. Bezneñ belän aerım aralaştı. Räxmät aña!

Arman Kostanyan, «Sälät-Rauşan 2016» smenası xoreografı:

Räsäydä mondıy festiwal uzaçagı xakında oçraklı räweştä genä beldem. Garizanı tutırgannan soñ gına añladım: monda katnaşu minem tormışımda zur rol uynayaçak. Başka millät keşeläre belän aralaşa alu mömkinlege tuaçak. Festiwaldä iñ oşaganı – däülät eşlekleläre, tanılgan sport ostaları, mädäniyat häm sängat ähelläre katnaşındagı plenar utırışlar. Festiwal miña bik oşıy. Tatarstan isemennän katnaşa alu mömkinçelege bulu belän ber dä ükenmim.