3-nçe awgust könne Sälät uku-ukıtu forumnarınıñ altınçı smenası – MEDIA BILER FORUM räsmi räweştä açıldı. 
Açılu tantanası oeştıru komitetı wäkillären säxnägä çakırudan başlanıp kitte. Annan soñ çaranı başlau öçen süzne TR Yaşlär eşläre ministrınıñ berençe urınbasarı Timur Söläymanow aldı. «Menä ul tere energiya! Ul – sez, ul – bez! Bez Bilärgä kaytuıbıznı däwam itäbez. Menä inde altınçı forumnı başlap cibärdek. Barıbız bergä bez bik köçle komanda, häm bergä bulganda gına zur näticälärgä ireşä alaçakbız», – dip söyläde ul. 
«MEDIA BILER FORUM – ul jurnalistika belän kızıksıngan balalar mäydançıgı. Forum barışında balalarnı radio, telewidenie, SMM serläre belän tanıştırırga cıenabız. Häm inde, älbättä, balalarnı Sälät dönyası belän tanıştıru, bezneñ oeşmabızga karata kızıksınu uyatu – töp maksatlarıbıznıñ berse», – dip belderde «Sälät» Yaşlär üzäge direktorı Aygöl Gabdraxmanowa. 
«Altınçı forumnan min onıtılmaslık kiçereşlär kötäm. Çönki bu bıelnıñ soñgı forumı, ul Sälätle cäyneñ zur matur noktası bulırga tieş!» – dip söyläde «Kodrak xan» alanı äydamanı Gölyusä Arikeewa. 
Açılu tantanası Sälät älämen kütärü belän tämamlandı. Annarı sälkeşlär «Sälät bii» digän konkursta katnaştı, soñınnan diskätük buldı.