«Bikafest»ta yaña yoldızlar balkıdı ← kire kaytirga

18-nçe noyabr könne Sälät yortında R.Bikmullin isemendäge yaşlär cır-şigır «Bikafest» festiwaleneñ gala-kontsertı  uzdı. Bıel ul yaña formatta «fatirnik» formatında ütkärelde. Küñelle atmosferada, gailä bäyrämenä oxşagan çarada festiwalneñ 13 ciñüçese çıgış yasadı. Isegezgä töşeräbez, konkursnıñ saylap alu etabına respublikanıñ törle şähärlärennän kilgän 180-nän artık bala gariza birgän ide. Şularnıñ iñ-iñnäre genä bu könne üz sälätlären kürsättelär.  

«BikaFest» festiwale tübändäge nominatsiyalär buença ütkärelde:

- iñ osta awtor-başkaruçı;

- iñ osta kollektiw-başkaruçı;

- tatar xalık cırın iñ osta başkaruçı;

- tatar kompozitorlarınıñ akademik äsären iñ osta başkaruçı;

- üz äsären iñ osta yattan ukuçı (şigır, proza, ädäbi-muzıkal kompozitsiya);

- başka awtor äsären iñ osta yattan ukuçı (şigır, proza, ädäbi-muzıkal kompozitsiya).

Festiwalneñ tantanalı öleşen «Sälät» fondı başkarma direktorı Timur Söläymanow başlap cibärde, şunnan soñ Sälätneñ yakın dusları «Juna» muzıkal törkeme üz çıgışları belän söenderdelär.

Festiwalgä küp kenä möxtäräm kunaklar da çakırılgan ide. Şularnıñ berse – TR Ministrlar Kabinetı apparatınıñ sotsial üseş belän idarä itü bülege citäkçese urınbasarı, Sälätneñ oeşkan könnärennän ük bezneñ belän buluçı, Sälät weterannarı sowetı räise Almaz Xäbibullin.

Sälät weteranı, tanılgan cırçı Ilnaz Safiullin: «Äytep betergesez zur, olı räxmätlärem Sezgä – äti-äniem! Sezgä – tamaşaçılar! Yakınnarım häm tugannarım! Ikençe tugan yortım, icatımnıñ tormış yulın bilgelägän «Sälät» yaşlär üzägenä, Cäüdät abıyga, Timur dustıma, Almaz abıy Xäbibullinga, ministrlar kabinetına häm, älbättä, Premer-ministrıbız Aleksey Waleriy ulı Pesoşinga meñ räxmätlemen!»

Zal sälätle yaşlär belän tulı ide. Şunısı kuanıçlı, alar arasında bügenge Sälät tormışında üzen aktiw kürsätkän yaşlär belän berrättän, Sälätneñ yakın dusları, ostazları häm partnerları da bar ide. Sälät proektlarında aktiw katnaşuçı, Sälät sandugaçı, dotsent Läysän Arsentewa, mäsälän, sälkipüşlär belän bergäläp Sälätneñ yaratkan cırın başkardılar. Sälät weteranı, şagıyrä Yoldız Minnulina isä gitarada üze ük uynap, «Bikafest»nıñ tarixın iskä töşerep tamaşaçını şatlandırdı.

Här bäygedä ciñüçelär isemlegen belü aeruça dulkınlandırgıç mizgel. Menä alar ciñüçelär: wokal blogında Gran-pri isemenä Elwira Zakirowa citäklägän «Al Zaynäbem» muzıkal kollektiwı, ä şigriyat blogında isä bu isemgä Güzäl Zakirowa laek buldı. Kotlıybız!

Güzäl Zakirowa – Gran-pri ciñüçese:

- Sälät proektları belän min 2014-nçe elda tanıştım. Şul uk elda «BikaFest»ta katnaştım. Festiwal minem öçen ul – cılı, dus-tatu atmosfera. Monda kilgäç kitäse dä kilmi. Kilügä ük duslarımnı oçrattım. «BikaFest» – küreşü, tanışu mäydançıgı. Ciñärmen dip sizgän idem, läkin mondıy däräcäle isem alırmın dip küz aldıma da kiterä almadım. Şigriyat belän 2-3-nçe sıynıflarda tanışıp, şul wakıtta uk berençe icat cimeşlärem dönya kürde. Icatımda küñeldä bulgannarnı çagıldırırga tırışam.

Elwira Zakirowa – «Al Zäynäbem» törkeme citäkçese:

- «Al Zäynäbem» törkeme 2011-nçe elda KFU karşında oeşkan ide. Döresen äytäm, el saen uk bulmasa da törkemebez yaña keşelär belän tula. Ukıp beterüçelär kitä, yaña gına ukırga kerüçelär kilä. Bügenge törkemdäge kızlar Sälät proektlarında aktiw katnaşalar, cäyge smenalarda äydamannar buluçılar da bar aralarında. Bu festiwaldä öçençe el rättän katnaşabız. Başta 2-nçe urın, annarı 1-nçe, ä bıel isä Gran-priga laek buldık. Talantlı, däräcäle, üz eşläreneñ ostaları bulgan keşelärneñ fikerläre bezneñ öçen bik möhim. Döresen äytkändä, ciñügä ışangan idek. Uzgan el bezneñ çıgışnı bik küplär maktagan ide, bıel şul plankadan töşkän bulsak, älbättä, borçılır idek. Här başkargan nomerıbız turında bik ozaklap uylap, stsenariy tözep, cırlarnı tawışlarga bülep äzerländek. Minemçä, xalık cırlarına yasalgan zamança aranjirowkalarıbız şäp kilep çıktı. Bu da bezgä ciñärgä yardäm itkänder. Näk menä traditsiyalärebezne saklap kalıp, alarga zamança sulış erü bezneñ xalık moñnarın saklap kalaçak ta dip uylıym.  

Gulnaz Gatina – 2-nçe urın ciñüçese, şigriyat blogı:

- Xislärneñ, küñelneñ tulgan çagı! Güya ul xäzer yazgı taşkınnarday urgılıp dönyaga çıgar. Bäxetlemen! Räxmät, «BikaFest»! Şundıy cılı atmosfera häm mega şäp keşelär! Icat ruxı, duslık xökemsörgän urında, şuşı iskitkeç şaukımnıñ ber öleşe bulu – söeneç. Ä üzeñneñ ciñüçelär rätendä buluıñnı tıyu, tagı da läzzät birä! Içmasam, üzemneñ iñ yaratkan 2 nominatsiyamdä katnaştım! Cır - aeruça katlaulı häm cawaplı ölkä, çönki tatar xalık cırın bar taläplärgä turı kiterep, märtäbäle cyuri aldında yugarı däräcädä kürsätäse bar! Şigriyat – küñel awazı. Min üzem icat itkän äsärlär yugarı näticä birsä, bu iñ zatlı, kaderle ciñüläremneñ berse!