Fänneñ kiläçäge – tarix belän kızıksınuçı yaşlär kulında! ← kire kaytirga
1 - 3 dekabr könnärendä «Fänsar» üzägendä VIII «Änwär Xäyri ukuları» fänni-gamäli konferentsiyase uzdı. Biredä katnaşuçılar üz fänni eşlären märtäbäle jyuri ägzalarına täkdim itte, kazıylar isä, ciñügä laeklı iñ yaxşı eşlärne bilgeläde.
Tarixın belgän xalıknıñ kiläçäge bar. Çınnan da tarix belän kızıksınuçı, fänni eşlär yazuçı yaşlär bulganda, xalkıbıznıñ kiläçäge ışanıçlı kullarda. «Änwär Xäyri ukuları» Respublikaküläm yaşlär fänni-gamäli konferentsiyase katnaşuçıları näk şundıy. Bilär kalası tarixın fänni öyränügä häm Bilärne dönyaga tanıtuga zur öleş kertüçe, tatar dönyası tarixında cuelmas ez kaldıruçı galim, sälkeşlärneñ Dustı häm Ostazı Änwär Xäyri isemen mäñgeläşterü maksanda «Sälät» Tatarstan Respublikasınıñ yaşlär ictimagıy fondı, «Sälät» yaşlär üzäge yardäme belän, Tatarstan mägarif häm fän ministrlıgı, Tatarstan Respublikası mädäniyat ministrlıgı, Tatarstan Respublikasınıñ yaşlär eşläre ministrlıgı belän berlektä, KFU xalıkara mönäsäbätlär institutı, Alekseewsk munitsipal rayonı administratsiyase katnaşında bıel älege konferentsiya sigezençe tapkır oeştırıla.
Respublikabıznıñ törle rayonnarınnan kilgän ukuçılar häm studentlar konferentsiyadä fänni eşlären täkdim itep kenä kalmadı kızıklı uku-ukıtu programmasında, kiçke çaralarda da katnaştı. Yaşlär törek teleneñ üzençälekläre, KFUdagı tyurkologiya yunäleşe belän tanışsa, alarnıñ fänni citäkçeläre mäktäp ukuçıları öçen fänni proektlar äzerläüdä metodik täemin itü buença ostaxanädä katnaştı.
Bıel konferentsiyagä gariza cibärgän 100dän artık katnaşuçınıñ 60sı ikençe etapka uzdı, 21e ciñügä laeklı dip tabıldı. «Änwär Xäyri ukuları» Respublikaküläm yaşlär fänni-gamäli konferentsiyase ciñüçelären ixlastan kotlıybız, barlık katnaşuçılarga fänni eşçänleklärendä zurdan-zur uñışlar telibez!
