Sälkipüşlär «Fänsar» üzägendä üsälär ← kire kaytirga
Uzgan yal könnärendä Bilärdä urnaşkan «Fänsar» BSÜ Sälät gailälären kunakka kabul itte. Biredä «Bäläkäç» proektı tarafınnan täkdim itelgän belem birü, küñel açu däresläre häm çaraları tormışka aşırıldı.
«Bäläkäç» proektı – äti-äniläre Sälättä tärbiyalängän mäktäpkäçä yaştäge balalarnı cıyuçı häm üsterüçe proekt.
Älege küçmä çara turında proekt kuratorı Alsu Salawatowa belän aralaşıp alırga buldık.
Şundıy küçmä çaranı buldıru kemneñ initsiatiwası?
- Älege çaranı buldıru «Bäläkäç» klubı initsiatiwası diyargä kiräk. Kübese belgänçä, älege klub eşçänlege kısalarında eş kına şundıy küçmä çaralar ütkärelä. Täkdim itelgän formal bulmagan cıelular, minem fikeremçä, ata-analar öçen dä, balalar öçen dä bik möhim häm kızıklı. Çönki näk menä biredä äylänä-tirä moxitne öyränü öçen mawıktırgıç çaralar häm ukıtu öçen barlık mömkinleklär tudırıla.
Älege çaranıñ töp maksatı närsä?
- Iñ berençe çiratta, balanıñ potentsialın açu häm häryaklap üsterü şartların buldıru. Ikençedän, balalarnıñ häm ata-analarnıñ formal bulmagan moxittä aralaşu. Öçençedän, balalarnı häm ata-analarnı ber-bersenä törle yaktan kürsätü. Minemçä, mondıy küçmä çaralar yardämendä küp kenä balalar üzläreneñ yaña sıyfatların kürsätä alalar. Soñınnan, älege sıyfatlarga tayanıp, ata-analar aldagı tormışta balaların döres yunäleş buença üsterä alalar.
Kaysı maksatlarnı aeruça bilgeläp ütär ideñ?
- Iñ başta cılı häm dustanä atmosferanı äytep kitär idem. Älege atmosferanı buldıru – balanı emotsional tınıçlık belän täemin itü digänne añlata. Tagın berse – biredä küptelle moxit buldıru.Çaralarda balalarga tugan tatar telendä, däülät tele – rus telendä, çit tellärdä dä aralaşu mömkinlege tudırıla. Minemçä, älege uen formatında täkdim itelgän tel ölkäsendä belemnär bala belän küpkä yaxşırak kabul itelä.
Barlıgı küpme gailä/keşe katnaştı?
- Bu yullı küçmä çarada 11 gailä katnaştı. Ä bolay urtaça alganda, mondıy formattagı çaralarda 10-15 gailä katnaşıp bara.
Programma närsädän gıybarät?
- Programma küpkırlı buldı. Däreslär, törledän-törle ostaxanälär, saf hawada uzdırılgan uennar, timerayaklarda, taudan şuu barısına da bik oşadı. Aeruça kiç belän uzdırılgan kontsertnı bilgeläp ütär idem. Älege kontsert balalar häm ata-analar köçläre belän oeştırıldı.Bik cılı, gailä moxite belän tulgan çara kilep çıktı. Bu yallarnıñ tagın ber yañalıgı – sport estafeta. Biredä balalar da, ata-analar da saf hawada räxätlänep küñel açtılar.