Kön salkın bulsa da, aralaşuıbız – cılı ← kire kaytirga

Bez lagerda bulganda könnär bik kızu bulsa da, dürtençe kön bezne sınadı. Tabigat üzeneñ köçen kürsätte. Irtädän ük salkın häm cille buldı. Läkin bez bireşmädek sport uennarında katnaştık, kiçen diskotekaga cıeldık.  Könneñ  salkın bulasın küplär kötmägän ide. Kemnärder başkalarga cılılık büläk itte: üzeneñ kalınrak ös kiemen ciñel kienüçelärgä birep tordı. Duslık, berdämlek, küñel  cılısı bulganda, tabigat sınauları da kurkınıç tügel şul. Bez wakıtıbıznı buşka ütkärmädek: duslaşırga da, räxätlänep aralaşırga da ölgerdek.

LEADERS BILER FORUM-ga Tatarstannan gına tugel, xätta ilebezneñ başka ölkälärennän dä kilgännär ide. Biredä Kırımnıñ Bakçasaray şähärennän kilgän kunaklar da bar ide. Alarnıñ berse – törkemdäşem Angelina Kudlanowa belän aralaşırga, anıñ Sälät turındagı fikerlären soraşırga miña da nasıyp buldı.

 – «Sälät» smenası öçen şunıñ kadär erak aranı ütep kilüeñä ükenmädeñme?

– Älbättä, ükenmädem. Moña kadär minem ber dä şuşındıy lagerlarda bulganım yuk ide. Liderlar smenasınnan algan xis-kiçereşlärem äytep betergesez, monda duslık, berdämlek atmosferası xökem sörä. Minem uylawımça, şuşında bulgan könnäremne  berkayçan da onıtmamın. Sälätneñ atmosferası berläşterä häm berdämläşterä.

– Kırımda tatarça söyläşüçelär küpme?

– Bakçasarayda Kırım tatarları şaktıy küp häm alar, älbättä, üz tugan tellärendä söyläşälär.

– Bezneñ Idel buendagı tatar telebez kırımtatar telennän bik nık aerılamı?

– Kayberäülär äytüençä, alarnıñ urtak yakları küp, ämma bezgä kunakka kilgäç, duslarıma bezneñ söylämne añlau bik ciñel bulmadı.

– Bakçasarayda tatar telen öyränü öçen maxsus şartlar tudırılganmı?

 – Äye, bezdä tatar mäktäbe bar, anda tatar tele däresläre ukıtıla. Ä gadäti mäktäplärneñ kübesendä däreslärdän tış bulgan tatar tele kurslarına da yazılırga mömkin häm alar tüläüsez, atnaga ber-ike märtäbä ütkärelälär.

– Bakçasarayda tatar xalkınıñ  goref-gadätläre saklanamı?

– Älbättä, milli, dini bäyrämnär ütkärelä: Uraza, Korban bäyrämnäre. Bäyrämnärdä milli atmosfera saklana, tatar xalkınıñ törledän-törle rizıkların peşerälär: it bäleşe, çäk-çäk häm başka bik küp tatlı aşamlıklarnı awız itärgä mömkin.

– Bu smenanı sin nindi yakları belän iseñdä  kaldırdıñ?

 – Döresen äytkändä, isemdä barı tik yaxşı yakları belän genä kalaçak. Äydamannarnıñ cılı mönäsäbäte dä, älbättä, küñelemneñ türendä üz urının aldı. Törkemdäge balalarnıñ bik az wakıtta – 5 kön eçendä genä barlıkka kilgän aerılmas duslıgın, ütkärelgän kiçälärne mäñge onıtmamın. Sälätkä kiläse  elga tagın kilergä telim.