IX Töbäkara «Bolgar–Tugan tel» forumı başlandı! ← kire kaytirga

Tatarstan Respublikası Yaşlär eşläre ministrlıgı, Tatarstan Respublikası Mägarif häm fän ministrlıgı, «Sälät» yaşlär üzäge häm Tatarstan Respublikası «Sälät» Yaşlär ictimagıy fondı yardäme belän ütkärelüçe IX Töbäkara «Bolgar–Tugan tel» alanınıñ açılu tantanası uzdı.

«Bolgar–Tugan tel» alanı berençe tapkır 2014 nçe elda oeştırıldı häm inde 9 el däwamında sälätle balalarnı berläşterä. Bolgarda barlıkka kilgän alan öçençe tapkır Izge Bilär cirendä cıeldı. Bıel berençe smenaga 500dän artık sälätle bala kilde, alar arasında Tatarstan Respublikası rayonnarınnan tış Udmurtiya, Orenburg, Tömän, Ulyanowsk, Samara h.b Räsäy töbäklärennän katnaşuçılar bar. Alar 7 kön däwamında tatar telen, mädäniyaten öyränügä, telneñ törle ölkälärdä gamäli kullanışın arttıruga yunältelgän tarix, tatar, ingliz tele, ritorika, akterlık ostalıgı häm tagın bik küp üzençälekle ostaxanälär häm däreslärdä katnaşaçak. Bıel forumda Idel bue Bolgarında Islam dinen kabul itelüneñ 1100 ellıgına bäyle çaralar da ütkäreläçäk.

Açılu tantanasına xörmätle kunaklar da kilde: Bilär däülät tarix, arxeologiya häm tabigat muzey-tıyulıgı direktorı Şakirow Zöfär Gomär ulı; Tatarstan Respublikası Fännär akademiyaseneñ A.X. Xalikow isemendäge Arxeologiya institutı direktorı Sitdikow Ayrat Gabit ulı; Tatarstan respublikası Mägarif häm fän ministrlıgı töbäkara xezmättäşlek sektorı mödire häm Bötendönya tatar kongressı Başkarma komitetı citäkçese urınbasarı Musina Göliya Färgat kızı; «Sälät» proektları citäkçese Cäüdät abıy Söläymanow; «Sälät» yaşlär üzäge direktorı Aygöl apa Gabdraxmanowa.

Alan eşçänlege «Tatarstan Respublikası däülät telläre häm Tatarstan Respublikasındagı başka tellärne saklau, öyränü häm üsterü buença Tatarstan Respublikası däülät programması»n tormışka aşıru kısalarında Mägarif häm fän ministrlıgı belän berlektä oeştırıla.

«Bolgar–Tugan tel» cäyne faydalı häm onıtılmaslık itep ütkärergä teläüçelär öçen!