«ARTS BILER FORUM-da ilhamlanasım häm ilhamlandırasım kilä!» ← kire kaytirga

Bıel ARTS BILER FORUM-ga art-direktor itep MalsiMusic –elektron muzıkant, didjey, 2019-nçı elda Los-Andjelesta uzgan Ballet Beyond Borders festiwale laureatı Islam Waleew çakırıldı.

Islamga berniçä sorau birdek.

– Islam, sineñ öçen ARTS BILER FORUM närsä ul?

– Min 2014-nçe eldan birle Sälät Forumına art-direktor bulıp baram, läkin ARTS BILER FORUM-da eşlägänem yuk ide. Şuña kürä çittän karaşımnı äytäm. Minemçä, ARTS BILER FORUM-ga tagın da kübräk icadi keşelär cıela. Bu minem öçen bik zur energiya. Foto häm wideolarnı karap bardım: barısı da şundıy ilhamlandıra torgan ide. Bu minem üzem öçen dä «wızow» bulaçak. Şulay uk bu zur cawaplılık ta. Forumda katnaşuçılardan ilham alasım häm üzem dä alarnı ilhamlandırasım kilä.

– Niçek uylıysıñ, kem bu forumda hiçşiksez katnaşırga tieş?

– Üzendä icat potentsialı bar dip uylauçılar katnaşırga tieş! Älbättä inde, teatr, cır yaki biyune yaratuçı bulırga tieş ul. Üzendä şuşı yunäleşlärneñ berärsenä tartılu köçe toyuçı. Üzen kayda da bulsa kürsätergä telägän, läkin moñarçı kıyulıgı citmi yörgännär öçen dä bu bik şäp mömkinlek! Annan soñ, bu bit nindider yarış, sport çarası tügel. ARTS BILER FORUM ul berençe çiratta aralaşu, yaña tanışular, duslar häm saf hawa. Barıbız da üzizolyatsiyadä utırdık. Uramga çıgarga, palatkalarda yaşärgä, saf hawa sularga häm tämle rizık aşarga, icat itärgä wakıt!