ARTS BILER FORUM: icadi laboratoriyalär häm «SeletLive»tan turıdan-turı efirlar ← kire kaytirga

26 iyundä Bilär muzey-tıyulıgında X Xalıkara «Cälät» yaşlär uku-ukıtu forumınıñ ikençe smenası start ala. ARTS BILER FORUM-da uzaçak laboratoriyalärdä balalar häm ostazlar 5 kön däwamında muzıka, biyu, teatr yunäleşläre buença yaña proektlar buldıraçak. Şulay uk turıdan-turı efirda forum yañalıkları belän tanıştıra torgan «SeletLive» studiyase dä üz eşen başlap cibärä.

ARTS BILER FORUM-da 12dän 22 yaşkäçä bulgan icatçılar – muzıkantlar, biyuçelär, näfis süz ostaları häm akterlar katnaşa. Barlıgı 2 meñnän artık gariza kabul itelde. Ekspertlar komissiyase alar arasınnan iñ yaxşıların saylap aldı häm katnaşuçılar Bilär cirlegendäge smenaga çakıru aldı.

ARTS BILER FORUM programması üz eçenä zamança belem birü formatların, mädäni çaralarnı häm TR häm RF ekspertları belän berlektä ütkärelä torgan tematik laboratoriyalärne ala. Forum tarixında berençe tapkır smenada icadi laboratoriyalär eşläyaçäk. Yaş buın wäkilläre üz ostalıkların kamilläşterä häm yugarı däräcälärgä ireşkän ostazlar belän bergäläp eşläp karau mömkinlegenä iya bulaçak. 3 yunäleştä 9 laboratoriya bulaçak. Muzıka yunäleşe ostazları – Marat Taturas, Sergey Kostyujow, Miläüşä Xäyrullina. Teatr sängate belän balalarnı Bulat Minkin, Regina Sattarowa häm Dinara Säyfetdinowa yakınnanrak tanıştıraçak. Biyu yunäleşendä ostaz bularak Nurbäk Batulla, Anna Şçekleina häm Nadejda Appolonowa katnaşa. Alar kasting näticäsendä tuplangan komanda belän berlektä ör-yaña proekt äzerläyaçäk. Sälätle yaşlärneñ häm ostazlarnıñ icat cimeşen gala-kontsertta kürä alaçakbız. Ul smenanıñ yabılu tantanası könendä, yagni 30 iyundä uzaçak.

Şulay uk smenada lektsiya, master-klasslar da kötelä. Alar barlık icadi yunäleşlärne dä kolaçlıy. Spikerlar arasında Tatarstannıñ atkazangan artistı Elena Kalaganowa, «Golos-2» häm «Pobeditel» proektlarında katnaşuçı, «Üzgäreş cile» tatar cırı festiwale laureatı Rumiya Niyazowa, Tatarstan Respublikası Yaşlär xökümäte räiseneñ mädäniyat mäsäläläre kiñäşçese Gölfiya Motıygullina, dramaturg Zoya Ruter, biyu tarixın öyränüçe, «Altın bitlek» milli teatr premiyase ekspertı Wita Xlopowa, muzıkant Bulat Gabidullin (BubbleGum), biyuçe, xoreograf Marat Kazixanow h. B. bulaçak. «Millionnan artık karauçı sanın niçek cıyarga?», «Teatrga SMM belän niçek döres eşlärgä?» dip atalgan Internettagı kontentnı populyarlaştıru ısullarına bagışlangan aerım master-klasslar ütkäreläçäk. Şäxsi häm räsmi bloglarnı alıp baru serläre belän rejisser, kliplar yasauçı, «Gromkie rıbı» icat törkeme stsenaristı Ämir Sadıykow häm «Jiwoy gorod» zamança sängatne üsterü Fondınıñ piar-direktorı, dramaturg, Zoya Ruter urtaklaşaçak.

Bıel Sälät moxitenä öydän çıkmıyça gına da çumarga mömkin. «SeletLive» proektı forumdagı wakıygalarnı karap barırga, onlayn-rejimda yañalıklar belän tanışırga mömkinlek biräçäk. Translyatsiyalär forumnıñ räsmi akkauntlarında: Instagram, WKontakte häm YouTube wideoxostingında alıp barılaçak.

«Sälät» media üzäge citäkçese Almaz Sämigullin süzlärenä karaganda, proektnıñ maksatı – başka illärdä yaşäüçe watandaşlarıbız belän aralaşu mäydançıgı buldıru.

«SeletLive» turı efirlar studiyase berençe tapkır uzgan elgı forumda gamälgä aşırıldı. Ul wakıtta bez 6 smena däwamında 21 çıgarılış äzerlädek. Härbersen yakınça 2500 tamaşaçı karıy ide. Bıel translyatsiyalär sanın 26ga kadär arttırdık, – dip bilgeläp ütte proekt citäkçese. – Barıgıznı da bezneñ translyatsiyalärgä kuşılırga, Xalıkara däräcädä ütkärelä torgan wakıyganıñ şahitı bulırga çakıram».