Kiläçäk hönärläre ← kire kaytirga

Uku häm belem alu aşa bez şäxsi potentsialıbıznı üsteräbez, tege yaki bu ölkädä tieşle gıylem bazası tuplıybız, kiläçäk hönärebezgä yakınayabız. Şuşı maksat belän Sälät Forumınıñ 1-nçe smenasında katnaşuçılar öçen hönär saylarga yardäm itüçe mäydançıklar eşläde.

«Kazanskiy otkrıtıy uniwersitet talantow 2.0» oeşması wäkilläre palatkalı şähärçek territoriyasendä «Kiläçäk hönärläre» dip ataluçı kampus kordı. Älege mäydançıkta balanıñ indiwidual üseş planı, anıñ kompetentsiyaläre karaldı. Spikerlar sälkeşlärne kiläçäktä kiräk bulaçak hönäri sıyfatlar belän tanıştırdı. Bu, berençe çiratta, Hard Skills – turıdan-turı hönäri ostalıklar; ikençedän, Soft Skills – şäxsi sıyfatlar. Biregä balalar belän eşli belü, üzlektän belem aluga öndäü kerä. Häm, nihayat, öçençedän – Digital Skills – täcribä, eşçänlek häm networking (aralaşu dairäse).

Treninglar uen formatında bardı. Balalar törle törkemnärgä bülenep, hämmäse dä üz yaşendäge ideal bala biografiyasen uylap tabarga tieş buldılar.  Töp şart bulıp östä kürsätelgän ostalıklarnı da kertü tordı. Uen barışında alarnı härdaim kamilläşterergä häm yañaları turında uylıy başlarga kiräk digän näticägä kildek.

Tagın kampus Forum katnaşuçılarına törle hönärlärne üzlärendä sınap kararga yardäm ittelär. Misalga, elektr cihazları montajnigı, awtomobillär citeşterüçe tsexnıñ buyauçısı, injener-texnolog, mexanika eşläre slesare, h.b.

«Texnokratiya» kompaniyase wäkile Bulat Ganiew belän berlektä Forum katnaşuçıları kiläçäk hönärläre xakında fiker alıştılar. 

Spikerlar töp aktsentnı kiläçäk hönärlärenä yasadı. Kosmobiolog häm kosmogeolog hönärläre änä şundıylardan. Alar fikerençä, bu ölkädä eşlärgä teläüçelär biologiya häm ximiya belän mäktäp eskämiyasennän ük mawıgırga tieş. Kosmoturizm menedjerı bulırga teläsäñ dä şuşı fännärne öyränü kiräk. Ä ekologiya belän kızıksınuçılarga spikerlar ekologiya katastrofaların ciñärgä yardäm itüçe belgeç, urbanist-ekolog kebek hönärlärne täkdim itte.

Orator gumanitariylarnı da töşenkelekkä birelmäskä çakırdı. Mäsälän, tsifrlı lingwist yaki psixolingwist hönärläre, robototexnika alga kitkän cämgıyattä bik tä kiräkle bulaçak. Texnik hönärlär arasında yuristlar da üz urının tabaçak. Alar çeltärle yurist yaki intellektual milekkä bäya birüçe yurist bularak atalaçaklar. Wirtual dönya dizaynerı, robopsixolog, implantlar dizaynerı, yañartıluçı energiya injenerı, zur biremnär analitigı, molekulyar dietolog, genetik konsultant kebek hönärlär dä alga kitäçäk.

Yomgaklap Bulat Ganiew IT-texnologiyalär, innowatsiyalär häm yasalma intellektnıñ härdaim üzgärep toruçı dönyasına yaraklaşa belergä kiräklegen añlattı. Ixtıyaclı belgeç bulu öçen belemnärne kamilläşterep toru möhim. Sälkeşlärgä ul tormışta üz urınnarın tabıp, kiläçäk hönärlären döres bilgeläülären teläp kaldı.

Bügenge cämgıyatneñ taläplären öyränüne Forumnıñ 2-nçe smenasında da däwam itäçäkbez. Ul Bilärdä 25-30-nçı iyul aralıgında uzaçak. Katnaşuçı öçen garizalar biredä kabul itelä.