Sälät Bilärdäge forumnıñ icadi smenasında yaş talantlarga üsärgä mömkinlek birä ← kire kaytirga

Bu könnärdä Bilärdä XII Xalıkara «Sälät» yaşlär uku-ukıtu forumınıñ ikençe smenası — Icat Bilär Forum (Tworçestwo /Arts) uza.

Öçençe el rättän smena öç yunäleş buença: teatr, muzıka häm biyu laboratoriyalär formatında uza. Alarda katnaşu öçen kastinglar ütkärelde. Saylap alu etabın ütkän yaşlär laboratoriyalärdä şögıllänä, kalgan balalar Tatarstannıñ häm Rossiyaneñ äydäp baruçı belgeçlärennän ostaxanälärdä belem ala.

Bez yunäleş citäkçeläre: G. Kariew isemendäge Tatar däülät yaş tamaşaçı teatrı aktrisası häm rejisserı Liliya Nurel (teatr), cırçı, aktrisa häm wokal buença pedagog Zärinä Wildanowa (muzıka) häm xoreograf-kuyuçı, biyuçe Wenera Galimowa (biyu) belän aralaştık.

Liliya Nurel (teatr yunäleşe):

«Bıel garizalar aldagı ellarga karaganda kübräk buldı. Bu bezne bik söenderde. El saen bez kızıklı uku-ukıtu programması tözergä häm üz ölkäläreneñ çın ostaları bulgan törle belgeçlär alıp kilergä tırışabız. Artistlar gına tügel, rejisserlar, rässamnar, konferanse, prodyuserlar häm balalarga aralaşırga häm kıymmätle täcribä tuplarga kızıklı bulırday barısın da.

Bıel bez teatr häm akterlık sängateneñ barlık yunäleşlären kolaçlarga tırıştık: ideyadän başlap, tormışka aşıru häm tanıtuga kadär.

Bez algan garizalardan kürengänçä, balalarnıñ icadi eşçänlek däräcäse arttı. Alarnıñ tırışuı, üsüe häm uñışka omtıluı kürenä. Bez dä moña yardäm itäbez dip ışanası kilä.

Laboratoriyalär kısalarında balalar rejisser Ilnur Garifullin citäkçelegendä G.Tukaynıñ «Su anası» äkiyatenä eskiz äzerläyaçäklär. Rejisser Regina Sattarowa «Romeo häm Djuletta» pesasın uku buença çıgış täkdim itäçäk. Rejisser Kamil Gataullin balalar belän bergä «Sak-Sok» tatar legendası buença teatral eskiz äzerläyaçäk».

Zärinä Wildanowa (muzıka yunäleşe):

«Bez katnaşuçılarnıñ sanına basım yasadık häm yaş çiklären beraz kimettek. Bıel bez 14 yaştän olırak balalarnı kabul ittek: kölliyat häm yugarı uku yortlarınnan wokalistlar häm muzıkantlar. Monnan tış, bıel katnaşuçılar kastingka tatar telendäge cırlar gına tügel, ä başka tellärdägelärne dä cibärü mömkinlege aldı — şulay itep bez alarnıñ wokal mömkinleklärenä döresräk bäya birä aldık.

Bıel bezdä öç laboratoriya: elektron muzıka, etno-folk yunäleşe häm kino muzıkası. Sergey Kostyujow citäkçelegendä balalar elektron eşkärtüdä «Xäerle kön, Sälät alanı» cırınıñ yaña yañgıraşlı wariantın äzerli başladı. Nikita Sawelew häm Dmitriy Balakin katnaşuçılar belän bergä multfilm öçen tatar motiwları belän muzıka äzerläyaçäklär. «Etnomuzıka» laboratoriyase wakıtında Timur Milyukow citäkçelegendäge balalar «Ädrän diñgez» cırın zamança eşkärtäçäklär.

Uzgan el bezdä oxşaş yunäleşlär bar ide, läkin wakıt uzu belän laboratoriya produktları sıyfatlırak häm kızıklırak bula bara dip äytä alam. Gomumän, ellar uzu belän forum häm balalar belän eşläü yaxşı yakka gına üzgärä.

Sälättä bez yaş talantlarnıñ üseşenä yardäm itärgä tırışabız. Mäsälän, 2021 elda bez icadi konkurslar ütkärüçe «Tawrida» art-klasterı belän xezmättäşlek ittek. Forumda çıgış yasagannan soñ, balalar töbäk etabın uzıp, Rossiya turında katnaşu mömkinlege aldılar.

Uzgan el forumga «Yummi Music» leyblı wäkilläre kilde, alar katnaşuçılarnı Kazanda uzuçı muzıkal festiwallärgä, şul isäptän TatCultFestka häm başka bik küp çaralarga saylap aldı.

Bıel bez Älfiya Awzalowa isemendäge fond belän xezmättäşlek itäbez. Uñışlı çıgış yasagan oçrakta balalar fond ütkärgän wokal konkursınıñ soñgı etabına elägä alaçak».

Wenera Galimowa (biyu yunäleşe):

«Bezneñ yunäleş el saen başkaruçılarnıñ häm katnaşuçılarnıñ sıyfatlı üseşen kürsätä - monı ostazlar da, üzebez dä küräbez. Daimi räweştä yaña kriteriylar barlıkka kilä, ämma bu sıyfatka da täesir itä - balalar därtlänep kilälär häm ostaxanälärdä, icadi laboratoriyalärdä eşläügä añlırak karıylar.

Bıel öç törle yunäleş bulaçak: zamança biyu, wog-biyu häm tatar xalık biyue. Alarnı Kseniya Burmistrowa, Regina Lanwin häm Säydä Minubaewa ütkäräçäk. Smena axırına balalar, tatar mädäniyate häm sängatenä basım yasap, eskizlar, biyu miniatyuraları häm performanslar äzerläyaçäklär.

Xätta el saen kilgän balalar da yaña närsälär öyränä alsın öçen bez el saen belgeçlär isemlegen häm icadi laboratoriyalärne yañartabız.

Bez programmanı bala nindi genä katnaşu formatın saylasa da, smena aña maksimal fayda kitererlek häm ul küpkırlı belemnär ala häm yaña tanışular taba alırlık itep tözibez».

Smena näticäläre buença, 4 iyuldä 20.30da gala-kontsert bulaçak, anda icadi laboratoriyalär proektları täkdim iteläçäk. Sälätneñ YouTube kanalında häm «WKontakte» törkemendä kontserttan turıdan-turı translyatsiya oeştırılaçak.