«Sanak-lab» näticälär yasadı ← kire kaytirga

Uzgan şimbädä Sälät Yortında «Sanak-lab» belem birü Laboratoriyase proektların täkdim itü häm 2017-2018-nçe uku elına näticä yasau kiçäse buldı.

Yomgaklau çarasınıñ niçek uzuı turında proekt citäkçese Läysän Sabitowadan soraştık.

– Bu uku elına nindi maksatlar kuelgan ide? Alarga ireşä aldıgızmı?

– Bıel bez belem birüneñ şartların yaxşırtunı, balalarnıñ belem däräcälärenä turı kiterep, IT ölkäse buença tagın da kübräk yunäleşlär buldırunı maksat itep kuygan idek. Bez balalarga üseş häm kiläçäktä tormışta üzlären kürsätä alsınnar öçen moxit tudırabız. Konkurs häm kontestlarnı karap barabız, balalarnı olimpiadaga äzerlibez, üz saytların, uennar, modellär yasarga öyrätäbez. Bu belemnär balalarga kızıksınuların bilgelärgä häm IT ölkädä äydäp baruçı wuzlarga kerergä yardäm itä.

– Bıelgı uku elı uzgan elgısınnan närsä belän aerılıp tordı?

– Bıel sxemotexnika, sayt yasau häm informatikadan BDIga äzerlänü kebek yaña yunäleşlär barlıkka kilde häm bez moña çiksez şat.

– Tagın nindi yunäleşlär bar ide? Gomumän, balalar ni belän şögıllände, nindi uñışlarga ireşte?

– Laboratoriyadä «Sayt yasau», «Sxemotexnika», «Olimpiada programmalaştıruı», «S++da programmalaştıru nigezläre» «3d-modelläşterü», «Sistemalı administratsiyaläü», «Wirtual häm östämä çınbarlık öçen kuşımtalar yasau» yunäleşläre buença däreslär ütte. Ukuçılar programmalaştıru buença olimpiadalarga äzerlände, üzläre saytlar häm kompyuter uennarı yasadı, 3d modelle «akıllı yort» tözede.

– Balalarga oşadımı soñ?

– Barısı da bik kanägat kaldı. Däreslärgä zur kızıksınu belän yördelär, intensiw programma utırışlarına da bik teläp kildelär häm kiläçäktä dä Laboratoriyadä belem aluların däwam itäseläre kilä.

– Kiläse elga nindi maksatlar kuydıgız?

– Üsärgä häm tagın da kübräk balanı bäxetle itärgä, alarga yaña mömkinleklär, belem häm, älbättä inde, Sälät dönyasın açarga.