«Sälät-Ostalar bistäse» xätta 5-nçe sıynıf ukuçıların da kabul itä ← kire kaytirga

Sälät berläşmäse – mömkinleklär moxite. Ä mömkinleklär bik küp: fän, sport, icat yunäleşe... Icat – tormışta yaña kıymmätlär tudıra, şäxesne yaña açışlarga ilhamlandıra. «Sälät-Ostalar bistäse» alanında üzeñne tulısınça  icat diñgezendä itep xis itärgä mömkin. Bıel älege smena «Fänsar» fän häm mägarif üzägendä (Bilär şähäre, Alekseewsk rayonı), 10-27-nçe iyun aralıgında uzaçak.

Smenanıñ programması balalarga kul eşläre, räsem häm arxitektura sängate, dizayn, 3d-modelläşterü, injeneriya grafikası, robototexnika kebek  däreslär birügä korılgan.

Älege alan uzgan el  gına oeşkan ide. «Ostalar bistäse» – Sälätneñ balalarnı üzendä 5-nçe sıynıftan uk (ä bu 11 yaşlek balalar) kabul itüçe smenası.

Alannıñ töp maksatı icadi yaşlärgä yardäm itü, alarnı intellektual häm ruxi yaktan üsterüdän gıybarät.

«Sälät-Ostalar bistäse» tübändäge burıçlarnı üz östenä ala:

- Sälätle yaşlärne tuplap, aralaşu moxite tudıru;

- Yaşlärneñ gamäli icatka igtibarın yunältü, yaşerenep yatkan sälätlären açu;

- Mäktäp ukuçılarına hönäri yunäleş birü;

- Yaş buınnı Junior Skills eşçe hönärlär çempionatına äzerläü.

Aliya Wäliewa, «Sälät-Ostalar bistäse 2017» alanı direktorı:

- Uzgan elgı katnaşuçılarnıñ kübese bıel da gariza kaldırgan, dimäk,  alarga smena oşagan digän süz. Bu bezneñ öçen bik söeneçle fakt. «Ostalar bistäse» – intellektual-gamäli häm fänni-texnik icat smenası ul. Balalarga kızıklı da, faydalı da bulgan belemnär biräsebez kilä. Älege smena, Sälätneñ barlık smenaları şikelle ük, sälkeş küñelendä cäyneñ iñ onıtılmas wakıygası bulıp kalır dip ışanam. Alanıbıznı äydamannar sostawı yardäme belän unikal itärgä tırışırbız. Çönki bezneñ äydamannar bik maksatçan häm şayan! Inde bügennän kızıklı programma häm çaralar östendä eşlibez.

Ilnaz Idrisow, «Sälät-Ostalar bistäse 2016» alanı sälkeşe, Sälät aktiwistı:

- «Ostalar bistäse»n bik yarattım, äle dä sagınam. Biredä Sälät miña üzen başka yaktan da açtı. Bu alanga bıel da barırga uylıym, çönki annan kitep bulmıy, ul minem bar küñelemne yaulap aldı. (Kölä) Junior Skills eşçe hönärlär çempionatına äzerläü bu smenada bik köçle. Ä bu yunäleş bügenge köndä bik populyar. Garizanı tutırıp ölgerdem inde.

Garizalar portfolio-selet.ru saytında kabul itelä. Räxim itegez!