«Sälät-Rauşan» fängä tartıluçı balalarnı barlıy ← kire kaytirga

9-24-nçe iyul könnärendä «Yoldızlı» bazasında «Sälät-Rauşan» smenası uzaçak. Katnaşuçılar: 5-11-nçe sıynıf ukuçıları.

«Sälät-Rauşan» cäyge alanı üzlären törle predmet olimpiadalarında, konkurs, konferentsiyalärdä kürsätkän mäktäp ukuçıların cıya. Alan programması katnaşuçılarnı häm belem yagınnan, häm ruxi yaktan üsterüne maksat itä. Könneñ berençe yartısında balalar üzläre saylagan yunäleştä belem alalar. Monda fizika-matematika, programmalaştıru häm mäglümati texnologiyalär, tabigat fännäre, tel, gumanitar fän mäktäpläre eşli. Däreslär icadi ostaxanä, maxsus kurs, master-klass yaki trening formasında uza. Ukuçılarga Kazan yugarı uku yortları ukıtuçıları, TR Fännär akademiyase galimnäre, däülät häm cämägat eşlekleläre, respublikanıñ mädäniyat häm sängat eşlekleläre, tanılgan biznesmennar belem birä.

Alannıñ maksatı – fängä tartılgan balalar häm üsmerlärne barlau, alarga ruxi häm intellektual üseş moxite buldıru.

«Sälät Rauşan» alanı «Sälät» xäräkäteneñ tübändäge burıçların üti:

- sälätle balalarnı häm üsmerlärne ezli, saylap ala häm TR fänni-tikşerenü üzäkläre öçen intellektual-ruxi elita buldıruda katnaşa;

- Tatarstan şähärläre häm rayonnarındagı sälätle mäktäp ukuçılarına üz yunäleşlärendä tiränten belem birä.

«Sälät-Rauşan» uku-ukıtu alanı berençe tapkır 1994-nçe elda Arçada oeştırıla häm 65 mäktäp ukuçısın berläşterä. 2005-nçe eldan alan Laeş rayonında («Yoldızlı» sälamätländerü bazası) uzdırıla başlıy, häm el saen TR rayon-şähärlärennän, RF subektlarınnan, erak häm yakın çit illärdän 220-läp sälätle balanı şul cirlektä tuplıy.