Şaxmat turnirı – ciñü ruxı, zihen köçe häm duslık bäyräme! ← kire kaytirga

20 aprel könne Sälät yortında Ädip Älmir kubogına XI şaxmat turnirınıñ yomgaklau etabı uzdı.

Turnir tarixı erak gasırlarga totaşkan şaxmat uenınıñ bügenge yugarı texnologiyalär zamanında da populyarlıgın yugaltmawın isbatlıy. 11 el däwamında şuşı proekt kısalarında Sälät moxitendä şaxmat uenın populyarlaştıru, şaxmat uynaunı aktiwlaştıru, yaşlär arasında bu uenga kızıksınu uyatu, şaxmat kazanışların propagandalau, uennı gadätkä kertü, kübräk yaşlärne cälep itü, aktiw, sälätle balalarnı häm yaşlärne açıklau häm tuplau yunäleşlärendä külämle eş alıp barıldı.

Oeştıruçılar bıelgı turnirnı da onlayn-platformada başlap cibärde. 12 nçe aprel könne lichess.org platformasında yarışnıñ onlayn etabı ütte. 56 yaş şaxmatçı saylap alu uzdı. 20 nçe apreldä 50 finalist inde çın şaxmat taktası artında köndäşläre belän küzgä-küz oçraştı.

Här yöreşne töptän uylarga, üzeñneñ genä tügel, köndäşeñneñ dä adımın aldan farazlarga kiräk. Wakıt turında da onıtırga yaramıy - monı yaş şaxmatçılar yaxşı belä. Şuña da uen çın mägnäsendä kızu bardı!

Turnir FIDA şaxmat uennarı kagıydäläre buença ütkärelde. Yarışlar ike törkemdä ütkärelde:

– I törkem – häwäskär uençılar (razryadsız);
– II törkem – razryadı bulgan uençılar (1-3 razryadlı). Näticädä häwäskärlär häm razryadları bulgan uençılar arasınnan öçär prizer bilgelände:

I törkem:

I urın – Raida Mardanowa,

II urın – Kärim Xalitow,

III urın – Räüil Karamow;

II törkem:

I urın – Samir Gomärow,

II urın – Aslan Xamidullin,

III urın – Ämir Abdullin.

Turnir prizerlarına istälekle büläklär tapşırıldı, ä ciñüçelär Ädip Älmir kubogına iya buldı. Barlık prizerlarnı kotlıybız häm kiläçäktä tagın da zurrak ciñülär telibez! Yarışta üz köçen sınap karagan här katnaşuçıga räxmätebezne belderäbez! Afärin!