«Asıltaş» Sälät mäktäbe yaña ukuçıların kabul itte kire kaytirga

«Asıltaş» Sälät mäktäbe yaña ukuçıların kabul itte

«Asıltaş» Sälät mäktäbe yaña ukuçıların kabul itte. 1 sentyabr 1 nçe «Ä» sıynıf ukuçıları öçen täüge tapkır, däreskä çakırıp, kıñgırau çıñladı.

Asıltaşlarıbıznı Belem köne belän kotlarga Tatarstan Respublikası Yaşlär eşläre ministrı Timur Söläymanow, Tatarstan Mägarif häm fän ministrlıgınıñ Milli mägarif bülege mödire Ence Gıyzzätullina, «Sälät» proektları citäkçese Cäüdät Söläymanow kilde.

«Bügenge Tatarstannıñ häm ilebezneñ barlık mäktäplärendä yañgıragan barlık alkışlar Belem köneneñ töp kaharmannarı – ukuçılarga, bigräk tä alga, belem dönyasına bik zur adım atlauçı berençe sıynıf ukuçılarına bagışlana!», – dip iskärtep ütte Timur abıy Söläymanow kotlau süzendä. Ukuçılarga belem dönyasında bulgan barlık çiksez zur mömkinleklären tulısı belän kullanırga kiräklegen assızıklap uzdı ul häm kotlau süzlären citkerde.

«Sälät berläşmäseneñ uñışlı eşçänlege turında bezneñ ildä genä tügel, böten dönyada belälär. Şuşı uñışlı eşçänlekneñ ber «Asıltaş» mäktäbe eçendä genä tügel, ä başka mäktäplärgä dä taraluı tagın da kuanıçlı» – dide üz çıgışında Tatarstan Mägarif häm fän ministrlıgınıñ Milli mägarif bülege mödire Ence Gıyzzätullina.

«Sälät» klassları häm klubları «Adımnar» mäktäpläre bazasında da uñışlı eşläp kilä. Şulay uk yaña uku elında Tübän Kama häm Älmät şähärendä açılgan mäktäplärdä dä «Sälät» klassları açıldı. «Sälät-Adımnar» sıynıflarınıñ gomumi sanı arttı.

«Sälät» proektları citäkçese Cäüdät Söläymanow «Asıltaş» Sälät mäktäbe ukıtuçılarınıñ bik köçle belgeçlär buluın äytep ütte. «Öçençe el rättän «Asıltaş» Sälät mäktäbebezgä berençe sıynıf ukuçıların kabul itäbez. Biredä balalarga köçle ukıtuçılar kollektiwı belem birä. Ukuçılarnıñ üseşe öçen barlık mömkinleklär dä tudırılgan» – dide ul üz çıgışında.

Asıltaşlar el däwamında mäktäptä uzdırıluçı zur çaralarda katnaşa. Gailälärneñ ber-berse belän yakınnanrak tanışuı, kızıksındırgan soraularına cawaplar tabuı öçen küçmä sessiyalär, törle ölkälärdäge tanılgan şäxeslär belän oçraşular oeştırıla. Ukuçılar törle kontsertlarda, ekskursiyalärdä, teatrlarda, muzeylarda, kürgäzmälärdä buldı. Ukuçılar alga taba da Sälät berläşmäseneñ törle proektlarında häm çaralarında katnaşıp, belemnären tiränäytäçäk häm yaña täcribä tuplayaçak.

Täüge tapkır mäktäp busagasın atlap kergän ukuçılar belem dönyası belän tanışuların başladı inde, 2 nçe, 3 nçe «Ä» sıynıf ukuçıları isä, nıklı itep, yaña uku elına ayak bastı. Ul balalar öçen dä, alarnıñ ukıtuçıları häm äti-äniläre öçen dä uñışlı, gomerlekä istä kalırlık matur häm yaxşı bulsın ide!