Bişençe smena - IT BILER FORUM start aldı! ← kire kaytirga

3-nçe awgust könne IX Xalıkara «Cälät» yaşlär uku-ukıtu forumınıñ bişençe smenası - IT BILER FORUM başlanıp kitte.

IT BILER FORUM mäglümati texnologiyalärneñ keşe tormışınıñ böten ölkälärendä dä möhim rol uynawına ışangan keşelärne berläşteräçäk.

Smena däwamında mäglümatnı näticäle ezläü häm eşkärtüneñ aktual instrumentlarına, innowatsiyale produktlarnı tormışka aşıru häm yasalma intellekt tudıruga bagışlangan profille ostaxanälär häm uku-ukıtu mäydançıkları eşläyaçäk. Tanılgan belgeçlär katnaşında uza torgan diskussiya mäydançıkları katnaşuçılarga 4-nçe sänägat rewolyutsiyase alıp kilä torgan gacäep dönyaga yul açaçak.

IT BILER FORUM-nıñ maxsus mäydançıgı - Wiki-programma. Ul balalarnı mäglümatnı eşkärtü häm täkdim itü künekmälärenä öyrätü mömkinlege tudıraçak. Balalar könenä 1500 keşe ukıy torgan yazmalar yazarga öyränäçäk, dönyadagı iñ zur multilingwal onlayn-entsiklopediyaneñ awtorlarına äylänäçäk.

Forumnıñ spikerları:

Aydar Şäyxin – «Gıylem» fän häm mägrifät üzägeneñ başkarma direktorı, Bötendönya tatar yaşläre forumı Sowetı ägzası;

Bulat Camaliew – Tatarstan Respublikasında yasalma intellekt texnologiyaläre buença wäkalätle wäkil, «Tsifrlı awıl» sotsial IT-proektın buldıruçı, Räsäyküläm «Tsifrowoy prorıw» xakatonı ciñüçese, KFUnıñ Mäglümati texnologiyalär häm intellektual sistemalar Yugarı mäktäbe aspirantı;

Fayaz Azizow – VFX artist, 2d/3d mouşen dizayner, Sälät aktiwistı;

Roman Ursan – ölkän ukıtuçı, KFUnıñ «Gen häm küzänäk texnologiyaläre» fänni-tikşerenü laboratoriyase keçe fänni xezmätkäre, fänne populyarlaştıruçı, tabib-kardiolog, kardiologlarnıñ Ewropa berläşmäse ägzası;

Aynur Kamaltdinow – «Ainur Studio» studiyasenä nigez saluçı. 3D animator, rässam häm programmistlardan torgan törkemneñ citäkçese. IT belgeç, ukıtuçı, tulılandırılgan (AR) häm wirtual (VR) çınbarlık ölkäsendä ekspert;

Anna Biryukowa (Mäskäü şähäre) – «Media» tsifrlı näşriyatınıñ partnyorı, wikipediyaçe, redaktor häm fänni kommunikator;

Reda Kerbuş (Sankt-Peterburg şähäre) – Wikimediaçı. Frantsuz, garäp, bärbär häm rus tellärenä tärcemäçe, Aljiriya wikimediaçılarınıñ yuzer-törkeme ägzası, bärbär telläre wikimediaçılarınıñ yuzer-törkemenä nigez saluçı;

Amir Aaroni – lingwist, programmist, wikimediaçı häm Wikimedia Fondı xezmätkäre (Izrail).

Balalar Bilärgä kilügä, alar öçen territoriya buença welkom-tur oeştırıldı, soñınnan forumnıñ gala-kontsertına çıgışlar saylap alu buldı. Sägat 18:30-da Selet Live onlayn studiyasendä turı efir uzdı. Bilär cirlegennän turı efirlar forumnıñ här könendä çıgıp bara. Anda forum yañalıkları, interwyular, kızıklı reportajlar häm başka xäbärlär kürsätelä.

Kiç belän IT BILER FORUM-nıñ räsmi açılu tantanası buldı. Katnaşuçılarnı «Sälät» yaşlär üzäge direktorı Aygöl Gabdraxmanowa sälamläde: «Bez sezne Izge Bilär cirendä kürergä bik şat. Oeştıruçılar bu forumga ozak äzerländelär, sezgä faydalı häm kızıklı uku-ukıtu programmasın täkdim itälär. Sez yaña belem alırsız, yaña duslar tabarsız häm wakıtıgıznı küñelle uzdırırsız, dip ömetlänäbez».

Çakırılgan kunaklar arasında Aljiriya wikimediaçıları törkeme ägzası Reda Kerbuş ta bar ide: «Min Forumga ikençe ikençe el rättän kiläm. Yaşlärneñ törle ölkälärdä belem alu, üsüläre söenderä. Minem öçen, älbättä, alarnıñ wikimediya belän şögıllänüläre bik möhim. Bezneñ kurslarnı uzıp, lektsiyalärebezne tañlagaç, bez balalar arasınnan tatar, rus häm ingliz tellärendä eşli alaçak aktiwistlarnı taba aluıbızga bik şat», – dip fikeren belderde ul.