Berençe SÄLÄT CIENI ONLAYN ütte! ← kire kaytirga

Gariza tutırıp, SÄLÄT CIENI ONLAYNda katnaşuçılar sanı 1000nän arttı. Ä gomumän cıennı tamaşa kıluçılar sanı 9000nän kübräk buldı.

Gadäti Sälät Forumı kebek ük, SÄLÄT CIENI ONLAYN da irtänge zaryadka belän başlanıp kitte. Annan soñ räsmi açılu tantanası buldı. Barısı da tieşençä – gimn häm wirtual äläm belän. Açılu tantanasında katnaşkan TR yaşlär eşläre ministrınıñ berençe urınbasarı Timur Söläymanow: «Bügen tarixi mizgel. Sälät kosmoska çıga, yaña däräcägä çıga. Bergäläp onlayn forum ütkäräbez. Bilärdä cıelu ul ber äyber: säxnädän sälamliseñ, köçle tawış işetelä. Ä onlayn forum – bötenläy yaña täcribä, ikelätä täcribä. Üz isememnän dä, ministr Damir Ildus ulı isemennän dä Sälätne şuşı zur täcribä belän kotlıym!» dip söyläde.

«Sälät» yaşlär üzäge direktorı Aygöl Gabdraxmanowa: «Öydä bulsak ta, bügen Sälät moxite xökem sörä. Min sezneñ energiyagezne sizäm. Tizdän cäy, bıel da traditsion formatta oçraşırbız, tanışırbız, aralaşırbız dip ışanam. Barısı da şäp bulır, Sälätçä bulır!» – dip sälamläü süzlären citkerde häm SÄLÄT CIENI ONLAYNnı açık dip belderde.

Açılu tantanasında şulay uk «Sälät» proektları citäkçese Ädip Älmir dä katnaştı. «Räxmät bu bäyrämne, bu cıennı yasauçılarga. Bügen köne bue bergä bulırbız. Min üzemne sezneñ belän bezgä Bilärdä yörgän kebek, xätta Bilär östennän kanatlanıp oçkan kebek xis itäm. Sälam, Izge Çişmä, sälam, Xucalar tawı, dip sälamlise kilä. Sälät 1997-nçe elda berençe tapkır Bilärdä cıeldı. Ul wakıtta 120 katnaşuçı ide. Bügen ul cıen masştablı forum däräcäsenä kadär üsep citte. Ä bügen menä Sälät äläme böten dönya çeltärendä cilferdi! Uñışlı cıen telim!» dip söyläde ul.

SÄLÄT CIENI ONLAYN Sälät wideoları belän ürelep bardı. Şulay uk cıen däwamında bıel cäy bulaçak alannarnıñ başcitäkläre belän turı efirlar oeştırıldı.

«Berençe kanal»dagı «Dobroe utro» tapşıruınıñ maxsus korrespondentı, Worldskills Kazan blogerı Alinä Sakaewa «Turı efir turında turı efir» digän ostaxanä ütkärde. Ul federal telewideniedä turı efir alıp barırga niçek äzerlänergä, üzeñne niçek totarga ikänlegen añlattı, jurnalistika buença faydalı kitaplar täkdim itte. «Ber üzeñ öydä utırgan kileş menä şulay sezneñ belän aralaşu – iskitkeç! Minem izolyatsiyadä utıruıma 30 kön inde. Yaña şartlarga iyaläşergä turı kilä. Böten syujetlarnı öydä töşeräm, bik küp gadjet kullanam», – dip söyläde ul.

SÄLÄT CIENI ONLAYN katnaşuçıların Tatarstan Respublikası yaşlär eşläre ministrı Damir Ildus ulı Fättaxow ta sälamläde. «Sälät üzgäreşlärne toep, bik tiz üzgärä aldı häm min moña bik şat. Onlayn forum – bik şäp ideya. Sälät bezneñ ildä onlayn formatta şuşındıy masştablı forum uzdıruçı berençe yaşlär oeşması, disäm dä yalgışmam. Bu Sälätne tulısınça kürsätä häm Sälätne başka oeşmalardan aerıp tora torgan kürsätkeç. Sez kättä, bez sezne yaratabız», – dip söyläde ul.

Töşke aşka «Sälät» yaşlär üzäge direktorı Aygöl Gabdraxmanowa belän bergäläp öçpoçmak peşerdek. Ä kiçke aşka – kıstıbıy. Anı turı efirda Sälät aktiwistı, ispan tele buença belgeç, tatar xalık aşları retseptları tuplangan «Xätirä» kitabı awtorı, çit ildä buşlay belem alu turında EDUabroad.pro proektı awtorı Alinä Sadriewa äzerläde.

SÄLÄT CIENI ONLAYNga törle illärdä yaşäüçe watandaşlar da kuşıldı. Alar izolyatsiya wakıtında närsä eşläüläre xakında söyläde. Mäsälän, Kanadada yaşäüçe Säläxetdinowlar gailäse bu çornı faydalı itep ütkärergä tırışa ikän.

«Böten dönyadagı kebek ük, bez dä öydä utırabız. Uramga çıgarga yarıy, katgıy tıyu yuk. Şulay da kiräkmägändä uramga çıgıp yörmäskä tırışalar. Balalar pianinoda, gitarada uynıy, uramda basketbol uynıylar. Östäl uennarın bik yaratabız, böten gailä belän uynıybız. Bergäläp welowipedta yöribez. Onlayn cıen öçen räxmät! Üzebezne Bilärdä forumda kebek xis ittek!» – dip söyläde gailä başlıgı Marat Säläxetdinow.

Awstraliyadän elemtägä kergän Dilärä Wäliewa da ber ayga yakın üzizolyatsiyadä utıruların äytte. «Uramga çıgarga yarıy. Döres, wakıtı çiklängän häm distantsiya saklarga kiräk. Bu wakıt yukka gına birelmägänder, tuktap uylanır öçen birelgänder dip uylıym. Faydalı itep, gailä belän uzdırırga tırışabız», – dip söyläde ul.

Törkiyadä yaşäüçe Ilsur Näfıykow Istanbul şähärendäge xällär turında söyläde. «20-dän yaşräklärgä häm 65 yaştän ölkänräklärgä uramga çıgıp yörü tıela. 20-65 yaşleklär atna urtasında kibetkä, aptekalarga çıga ala. Ä atna axırında beräügä dä çıgarga yaramıy. Min Istanbul uniwersitetında tarix ukıtam. Xäzer däreslär onlayn platformada ütä», – dip söyläde ul. Ul buş wakıtın dokumental häm tarixi filmnar karap ütkärä ikän.

Bıel Sälätneñ cäyge smenaları, forumnar bulaçakmı, digän soraular bik eş kilä. Cäy turında älege häm başka soraularga cawapnı «Sälät» yaşlär üzäge direktorı Aygöl Gabdraxmanowa belän «Sälätle cäy» üzäge citäkçese Igor Smirnow birde. «Bu elnı da cılı, matur, Sälätle cäy bulır dip ışanıp kalabız. Barlık alannarga da äzerlek plan buença bara. Alar turında tulı mäglümatnı selet.biz saytında ukırga mömkin. Ä alannarga baru öçen garizalar portfolio-selet.ru saytında kabul itelä. IX Xalıkara «Cälät» yaşlär uku-ukıtu forumınıñ da 6 smenasın uzdırırga planlaştırıp torabız. Gomumän alganda, 55 kön forum bulaçak, alarda 15 meñnän kübräk keşe katnaşaçak, 546 uku-ukıtu sessiyase uzdırılaçak. Ägär üzgäreşlär bulsa, bez üzebezneñ saytta häm sotsial çeltärlärdä hiçşiksez sezgä xäbär itäçäkbez», – dide alar.

«Sälät kiçläre» şigri battlında törle alannarnıñ äydamannarı häm sälkeşläre Gabdulla Tukay, Ildar Yuziew, Şäükät Galiew, Mödärris Ägläm şigırlären ukıdılar. Parallel räweştä onlayn şaxmat turnirı da bardı. Anda 40-tan kübräk sälkeş katnaştı.

«Bäläkäç» klubına yörüçe Änisä belän Älmir dä turı efirga kuşılıp, SÄLÄT CIENI ONLAYN katnaşuçılarına üzläreneñ cırın büläk itte. Rejisser Ilşat Räximbay gailäse belän dä turı efir oeştırıldı.

Yabılu tantanasında Ädip Älmir SÄLÄT CIENI ONLAYNnı oeştıruga köç kuygan häm anda katnaşkan här keşegä räxmäten belderde. «SÄLÄT CIENI ONLAYN tämamlana, ämma berläşüebez däwam itä», – dide ul.

Gimn başkarılıp, wirtual äläm töşerelgännän soñ, «Neweroyatnaya istoriya bukwı D»digän temaga kwiz uzdı. Intellektual uennı «Närsä? Kayda? Kayçan?» uenı znatokları kapitanı, «Bällür yabalak» iyase, «Samıy umnıy» intellektual proektınıñ iñ köçle uençısı Boris Belozerow häm Anna Şäräfiewa alıp bardılar. «Wirtual räweştä bulsa da Sälätkä kaytuıma min bik şat», – dip bilgeläp ütte Boris Belozerow.

Annan soñ «Sälätle fatirnik» buldı. Anda Wenadan maxsus kunak – multi-muzıkant, cırçı, kompozitor, tanılgan bitbokser kızlar arasında dönyada berençe bişlekkä kerüçe AIGUL da çıgış yasadı. «Üzizolyatsiya başlangaç, tormışımda bernärsä üzgärmäde diyarlek. Elek tä öydä eşli idem, xäzer dä şulay eşlim. Döres, kontsertlar citmi. Menä SÄLÄT CIENI ONLAYN ütkärü – bik şäp ideya. Sezneñ belän buluıma şatmın», – dip söyläde ul.

Şulay uk «fatirnik»ta tanılgan cırçı, «Altın bars» muzıkal premiyase iyase, Sälät aktiwistı Ilnaz Safiullin häm Arts Biler Forum-nıñ muzıka yunäleşe citäkçese, «The Cheeklaweek» muzıkal proektı awtorı häm citäkçese, Räsäyküläm häm xalıkara wokal konkursları häm festiwalläre laureatı, «Yummy music» bäysez muzıkal leyblı artistı Zärinä Wildanowa da çıgış yasadı. SÄLÄT CIENI ONLAYN traditsion «şämçeklär» belän tämamlandı.