Bilärdä «Sälät» forumınıñ öçençe smenası açıldı ← kire kaytirga

Bilärdä XI Xalıkara «Cälät» yaşlär uku-ukıtu forumınıñ öçençe smenası – Cotsial künekmälär Bilär Forumnıñ (Sotsialnıe nawıki/Soft Skills) açılış tantanası uzdı.

Katnaşuçılarga sälamläü süze belän Tatarstan Respublikası yaşlär eşläre ministrı Timur Söläymanow möräcägat itte. «Iñ zur köç – ul sez üzegez. Üzegezneñ sälätläregezne, üzegezne kürsätegez. Biredä belem alırga omtıluçı şulkadär bala cıeluına min bik şat», - dip möräcägat itte ul smenada katnaşuçılarga.

Şulay uk ul bıltır forumga Tatarstan Respublikası Prezidentı Röstäm Miñnexanow kileüen iskä töşerde. Katnaşuçılar belän oçraşu wakıtında ul, ozaklamıy Kırımda balalar häm yaşlär öçen yaña lager barlıkka kiläçäk, dip wägdä itkän ide. Bu könnärdä Kırımda Kara diñgezdä yaña «Sälät-Ak Bars» bazasında berençe smena bara.

«Sälät üsä, sez dä anıñ belän bergä yaña maksatlarga ireşü häm üseş öçen yaña mömkinleklär alasız», - dip assızıkladı Timur Söläymanow.

Ul şulay uk bıel Kazan Islam xezmättäşlege oeşması yaşläre başkalası statusı aluın iskä töşerde häm säxnägä Mozambik respublikası prezidentınıñ yaşlär säyasäte mäsäläläre buença kiñäşçese Dario Kamalnı çakırdı.

«Bez Afrikada, Kazan - Rossiyaneñ iñ matur şähärläreneñ berse, dip sanıybız. Kızganıç, min monda nibarı ike tapkır gına buldım, läkin bügen yañadan kilüemä bik şatmın. Minem öçen Sälät - unikal täcribä», - dip söyläde Dario Kamal.

«Sälät» forumınıñ öçençe smenası 16 iyulgä kadär däwam itäçäk. Katnaşuçılar - Sälätneñ cäyge profille alannarına konkurs räweşendä saylap alıngan sälätle yaşlär. Smena Sälät oeşmasınıñ ellık eş näticäläre buença kulminatsion noktası bulıp tora.

Här kön uku-ukıtu programması häm uennar, sport yarışları häm mädäni kiçälär belän ürelep baraçak. Smena kısalarında «Närsä? Kayda? Kayçan?» intellektual turnirı uzaçak, uennıñ alıp baruçısı bulıp, iñ äybät uençılarnıñ berse, ike tapkır «iñ yaxşı uençı» iseme iyase - Kim Galaçyan çıgış yasayaçak.

Bıel uku-ukıtu sessiyaläre Soft Skills - hönäri dairädä kiläçäktä uñışka ireşü öçen kiräkle möhim sotsial künekmälärgä bagışlangan. Smena kısalarında ostaxanälärne Tatarstannıñ äydäp baruçı galimnäre, belgeçläre häm biznes-trenerları ütkäräçäk.

Alar arasında: WorldSkills Tatarstan xäräkäte psixologı Elwina Babaewa, formal bulmagan belem birü trenerı, Soft Skills ambassadorı Anastasiya Belomıttsewa, biznes-trener Elena Luçkina, kouç häm biznes-trener Dinä Arzamastsewa häm başkalar.

Tel häm tarix forumnıñ töp temaları bulaçak. Smena däwerendä katnaşuçılar Bilär cireneñ tarixın häm tatar telen öyränäçäk.

13 iyuldä Bilärdä uzuçı forumda berniçä buında Sälät belän bäylängän gailälär cıelaçak. Alarnı «Asıl gailä» proektı berläşteräçäk. Anıñ maksatı - Sälät gailäläreneñ üzara xezmättäşlege öçen mäydançık buldıru, «Asıltaş» mäktäbennän häm «Bäläkäç» klubınnan kilgän balalarnı forum tirälege belän tanıştıru, şulay uk katnaşuçılarnıñ törle yaklap üsüe öçen şartlar tudıru.

Monnan tış, smena wakıtında «Canlı Sälät» (SeletLive) turıdan-turı efirlar studiyase üz eşen däwam itäçäk. Translyatsiyalär Sälätneñ WKontakte häm YouTube räsmi akkauntlarında alıp barılaçak. Efirnıñ alıp baruçısı tarix fännäre kandidatı, «Sälät» oeşması aktiwistı Ilsur Näfıykow bulaçak.