Mäglümatlar dulkınınnan artta kalmıyk ← kire kaytirga
Bezneñ dönyabız daimi räweştä yañalıkka omtıla, mizgel saen üzgärep tora! Yaña açışlarnıñ, innowatsion häm fän sıeşlı texnologiyalärneñ könnän-kön arta baruı bezgä yañalık tügel... Dustım, mäglümatlar dulkınınnan artta kalmaska häm ber agımda bulırga teläsäñ «Sanak-lab» uku-ukıtu laboratoriyase sine üzendä kötep kala!
22-nçe sentyabrdä «Sanak-lab» yaña sezonga start aldı! Älege möhim data uñaennan Sälät (Ostrowskiy, 23) Yortında Açık işeklär köne uzdı. Sigez uku ae däwamında yaña yunäleşlär, közge küçmä sessiya häm mawıktırgıç däreslär köteläçäge tagın ber kat raslandı. «Sanak-lab» uku-ukıtu laboratoriyaseneñ citäkçese Läysän apa Sabitowa laboratoriya turında barlık kiräkle mäglümatlarnı da kilgän kunaklarga citkerergä tırıştı. Kayda? Ni räweşle? Niçek? Kıskası, barlık soraularga da cawaplar tabıldı.
Yaña yunäleşlärneñ berse - informatika fänennän BDIga äzerlek! Älege tarmak buença mögallim rolen başkaraçak Kamil abıy Äxmätow (Innopolis uniwersitetı studentı, KFUnıñ IT-litsee çıgarılış ukuçısı, ike altın medal iyase (Tatarstan häm Rossiya), informatikadan BDInı 100 ballga birgän!) üzeneñ fikere belän urtaklaşıp kitte:
- Älege yunäleşneñ maksatı: yugarı uku yortlarına kerü öçen informatika buença BDIdan maksimal räweştä zur ballar tuplau. Monıñ öçen ukıtuçı gına tırışırga tieş tügel, älbättä, ä ukuçı üze dä böten köçen äzerlekkä yunältergä tieş. Şulay uk bu katlaulı eştä distsiplina da bik möhim!
3d-modelläşterü, saytlar yasau, sxemotexnika, programmalaştıru, grafik dizayn... Älege isemlek sindä kızıksınu xise uyata ikän, dustım, aşık! «Sanak-lab» uku-ukıtu laboratoriyasendä katnaşu öçen gariza tutırır! Professional ukıtuçılar häm effektiw programma sine kötä! Mömkinlegeñne kulıñnan ıçkındırma!