"Сәләт-Прага" катнашучылары (бигрәк тә эшләре журналистика белән бәйле булганнары) бу вакыйганы озак көтте һәм, ниһаять, бу көн килеп җитте. Ул да булса, "Азатлык" радиосының төп халыкара офисына экскурсия көне.

 Әлеге радио дөньяның 18 илендә үз эшен алып бара. Радионың тулы исеме Radio Free Europe. Radio Liberty (RFERL). Ләкин төп парадокс шунда ки, бу массакүләм мәгълүмат чарасы Европада сөйләми диярлек (Чехиядән кала). Әлеге радио "салкын сугыш" вакытында, 50нче елларда оешкан һәм бүгенге көндә демократия зур үсеш алмаган (америкалылар фикере буенча) илләрдә үз эшен алып бара.

 Офис күптән түгел генә яңа бинага күчкән. Эчкә теләсә кем керә алмый: ул һәрьяклап саклана. Әмма "сәләт"леләрне, билгеле, шатланып каршы алдылар һәм махсус экскурсия оештырдылар. (Алик абыйга аеруча зур рәхмәт =))

   Халыкара редакциянең эшчәнлегенә, аның интерьерына егет-кызларның исләре китеп йөрде, әмма күпләрдә иң зур тәэсир калдырган нәрсә: "Азатлык"ның мәгълүмат үзәге бүлмәсе, яки, үзләре әйтмешли, Newsroom. Әлеге бүлмә хай-тек стилендә төзелгән "Азатлык" бинасының нәкъ уртасында урнашкан. Монда төрле илләр журналистлары бергә эшли. Өстәлләрдә - төрле илләрнең әйдәп баручы газеталары, диварларда - глобаль телеканаллар тапшыруларын күрсәтүче мониторлар. Бирегә бөтен дөньядан мәгълүмат "агыла", редакциядә эшләүчеләр аны эшкәртә һәм эфирда һәм (яки) сайтта бирә.

Билгеле, "Азатлык" журналистлары үзләре дә эксклюзив материаллар эшли, мәгълүмат таба. Шунысы кызыклы: кайбер авторитар илләрдә әлеге радио үз эшчәнлеген ярымлегаль рәвештә алып бара, ә журналистлар, гомумән, эзәрлекләнүгә дучар ителә. Бу турыда безгә радионың пиар-хезмәткәре Лариса сөйләде.

 Әмма, шатлыкка, безнең "Азатлык"ка, ягъни татар-башкорт редакциясенә, бу кагылмый. Редакциянең төп миссиясе - барлык татар, башкорт халкы өчен мәгълүмат җиткерү, төрле илләрдә яшәгән милләтәшләр арасында элемтә урнаштыру. Редациядә хәзер 6 кеше эшли һәм аларның һәркайсын универсаль журналист дип атарга мөмкин, чөнки алар мәгълүматны җыя да, эшкәртә дә, фотоматериал белән дә эшли, сайтны да алып бара.

 Вакытлары шактый тыгыз булуга карамстан, Алик абый Гыйльми, Алсу апа Курмашева һәм  Наиф абый Акмалов "сәләт"леләр белән сорау-җавап форматында әңгәмә корып алды. Билгеле, "сәләт"леләр биргән сораулар арасында шактый провакациялеләре дә булды. Мәсәлән, туры сүзле журналист буларак, Сөмбел Вәлиди төп аспектка игътибар итмичә калмады: "Америкалылар тарафыннан финанслаган радиода  эшләү күңелегездә авырлык яки уйланулар тудырмыймы?"- дип кызыксынды ул.   Җавабы да озак көттермәде: "Милләтемне үстерер өчен Мәскәү акча бирсә, анда да эшләр идем", - диде Алсу апа. 

 Шунысы да аерым игътибарга лаек: күптән түгел генә "Азатлык"та яңа рубрика ачылган: хәзер һәр укучы үз материалын радио сайтына җибәрә ала, ләкин "материал" дигәндә, язмалар гына түгел, аудио-, видеоматреиаллар да күздә тотыла. Шуңа күрә, хөрмәтле укучыларыбыз, сез дә, татар дөньясына кагылган уникаль материалга ия икән, бүлешмичә калмагыз.

"Азатлык"радиосының  сайты: www.azatliq.org