Җәйге марафонны тәмамлап ← кире кайтырга

26-нчы августтан 10-нчы сентябрьгә кадәр Анапа шәһәренең «Приазовец» БСҮдә Сәләтнең 2018-нче ел җәенең соңгы сменасы - «Сәләт-Аршан» аланы узачак. 

«Сәләт-Аршан» – 1998-нче елда оешып, ел саен Кара диңгез буенда уза торган җәйге ял аланы. Беренче тапкыр ул Туапсе шәһәрендә узды һәм Татарстан Республикасының 100 сәләтле баласын туплады. «Аршан» аланы «Сәләт» хәрәкәте оештырган җәйге чараларның йомгаклау этабы булып тора һәм җәйге аланнарда катнашкан балаларны җыя. Катнашучылар «Сәләт» экспертлар советы тарафыннан портфолиолар конкурсы нигезендә сайлап алына. 

14 көн дәвамында укучылар үзүсеш, проектлар белән идарә итү юнәлешендә белем ала, эшлекле идеяләрен тормышка ашыру юлларын эзли, бу юнәлештәге заманча технологияләр белән таныша. Дәресләр ораторлык осталыгы, тайм-менеджмент һәм мантыйк буенча узачак. Шулай ук «Сәләт-Аршан» аланы кысаларында исеме инде танылып өлгергән «Аршан моңы» автор җыры конкурсы белән тәмамланачак.

Әлеге сменада 8-11-нче сыйныф укучылары катнаша ала.

Программаның нинди булачагын безгә «Сәләт-Аршан» аланы директоры Игорь Смирнов сөйләп бирде:

- Сменаның программасы – җәйнең азагын һәм көзнең башын максималь рәвештә комфорт белән һәм продуктив үткәрү. Балалар мәктәп программасыннан ял итәчәк, әмма, шул ук вакытта, шәхси үсешкә каралган бик бай программа булачак дип көтелә. Укытучылар һәм әйдаманнар үз өлкәләре буенча белемнәре, тәҗрибәләре белән уртаклашачак. Уку-укыту программасыннан тыш, күп кенә кызыклы чаралар һәм су көтелә. Барлык сюрпризларны әлегә ачмыйбыз. Соңгы 7 ел эчендә «Сәләт-Аршан»ның кабаттан барлыкка килүе – үзе бер зур яңалык! Традицион рәвештә «Аршан моңы» музыкаль фестивален үткәрергә планнаштырабыз.

Гаризалар 19 августка кадәр түбәндәге сылтама буенча кабул ителә: 
https://portfolio-selet.ru/sign_in