«Bolgar — Tugan tel» alanında yal itäçäk sälkeşlär isemnäre bilgele! ← kire kaytirga

Töbäkara «Bolgar–Tugan tel» alanı – tatar telen, mädäniyaten häm tarixın öyränügä bagışlangan, törle töbäklärdän kilüçe yözlägän sälätle balalarnı berläşterüçe, alarnıñ tatar telle moxittä milli traditsiyalärebezne üzläşterü maksatın küz aldında totuçı unikal lager.

Alan eşçänlege «Tatarstan Respublikası däülät telläre häm Tatarstan Respublikasındagı başka tellärne saklau, öyränü häm üsterü buença Tatarstan Respublikası däülät programması»n gamälgä aşıru kısalarında oeştırıla. Smena Tatarstan Respublikası yaşlär eşläre ministrlıgı, Tatarstan Respublikası mägarif häm fän ministrlıgı, «Sälät» yaşlär üzäge häm Tatarstan töbäk «Sälät» yaşlär fondı yardäme belän ütkärelä.

«Bolgar–Tugan tel» alanı 2014 nçe elda barlıkka kilä häm 11 el däwamında Tatarstan Respublikasınıñ törle rayonnarınnan häm Rossiyaneñ törle töbäklärennän kilüçe 400 dän artık sälätle balalarnı berläşterä. Proektnıñ maksatı – yaşlärneñ igtibarın tatar telen öyränügä cälep itü. Älege maksatka ireşü öçen yaña mäglümati häm metodik eşlänmälär kullanıla, tatar mädäniyate traditsiyaläre üzläşterelä, aktiw pozitsiyale sälätle şäxes tärbiyaläüdä innowatsiyale alımnar kullanıla.

Smena törle tematik bloklarga bülengän mädäni häm belem birü çaralarınnan tözelä: tarix, tatar tele, milli biyu, wokal däreslären häm kul eşläre ostaxanälären üz eçenä ala. Alannıñ zamança mädäni häm uku-ukıtu programması tatar telendä alıp barıla, balalarnı kızıksındıru maksatınnan törle zamança trendlar, innowatsion ısullar kullanıla.

Bıel «Bolgar–Tugan tel» alanı Bilär cirlegendä (Tatarstan Respublikası Alekseewsk rayonı Bilär awılında) 29 iyun – 5 iyul könnärendä uzaçak.

Bıel älege smenada katnaşaçak sälkeşlärneñ isemlege äzer.