Bu könnärdä «Sälät»neñ media-üzäge citäkçese Liliya Gatina tugan könen bilgeläp uzdı. Sälätkä sälkeş bulıp kilgän, ä bügenge köndä Sälätneñ media-üzäge citäkçese bulgan, Sälät moxiten toep, traditsiyalären kürep üskän, ä xäzer alarnı üz eşçänlegendä däwam itüçe şäxes ul. Yaña wazıyfa, aña bäyle xis-kiçereşläre häm berläşmä kiñlegendä «Sälät»neñ media-üzäge role turında Liliya Gatina belän aralaştık.

— Sälät dönyasına yaña gına kuşılgannarga Sälätneñ närsä ikänen niçek añlatır ideñ?

Sälät – distälägän alannar, zamança proektlar, masştablı forumnar, cılı tanışularnı häm bik küp belemnärne üz eçenä algan unikal moxit ul. Yukka gına anı mömkinleklär moxite dip atamıylardır, çönki Sälät härkemgä üsärgä, kamilläşergä, üz üzeñne tabarga mömkinleklär birä häm anı ber süz belän genä atau mömkin dä tügel. Sälät – ul sistema, texnologiya, galäm, Sälätneñ marşında da äytelgänçä, ul här sälätle balanı yaña yaktan açuçı däülät.

— Sin üzeñ Sälät dönyasına kayçan kuşıldıñ? Ul mizgellärne xäterliseñme?

Min Sälättä berençe tapkır 2015 elda «Sälät-Rauşan» alanında buldım, annarı här el saen bik küp alannarda yal ittem, sälkeş futbolkasın äydamannıkına alıştırdım, törle proektlarda katnaşıp, üzemne kürsättem, yaña yaktan üstem. Berençe mizgellärne äle dä bik yaxşı xäterlim: «Yoldızlı» bazası, berençe tapkır forumga barular, şuşı üzeençälekle moxitne toyu. Ämma, xäzer Sälät üzgäreşlär kiçersä, kamilläşsä dä, älege moxit äle dä saklana, bügen dä sälkeşlär şuşı moxitne toya ala, gaşıyk bula ala. Bu bik şatlandıra, älbättä.

— Ul wakıttagı Sälät belän bügenge Sälätne çagıştır äle.

Bügenge köndä Sälät, hiçşiksez, üste, kamilläşte, anıñ masştabları kiñäyde, san yagınnan gına tügel, sıyfat yagınnan da. Sälkeşlärneñ yalı küñelle häm kurkınçsız uzsın öçen biredä barlık şartlar tudırıla. Sälätkä kiläçäktä dä üseşennän tuktamawın telim, çönki zaman, yaş buın belän bergä atlau, kamilläşü näk menä Sälätne çın Sälät itä dä.

— «Sälät»neñ media-üzäge citäkçese bulu sineñ öçen närsä ul? Üz aldıña nindi maksatlar kuydıñ?

Media-üzäk citäkçese bulu – berençe çiratta, minem öçen bik zur cawaplılık. Çönki Sälätne media-üzäk tanıta, anı bar dönyaga kürsätä. Sälätneñ eşçänlegen barlık sälätlelärgä kürsätä alu mömkinlege buluı häm erakta bulıp ta sälätneñ moxiten toya alırga mömkinlek birä aluıbız belän bik şatmın. Bezne çit illär häm başka töbäklärdän dä küzätep baralar, bik cılı kommentariylar, räxmät süzläre yazalar, bu çınlap ta bik söenderä. Kiläçäktä Sälätne tagın da tanıtırga, auditoriyane üsterergä häm şuşı unikal moxitne başkalar da kübräk belsen öçen şuşı yunäleştä eş alıp barunı däwam itäbez. Töp maksatıbız – yaña sälätle balalarnı tuplau, alarnı şuşı mömkinleklär moxite belän tanıştıru, Sälätne tagın da kiñräk auditoriyadä populyarlaştıru.

— Sälät kiñlegendä media-üzäkneñ rolen niçek küräseñ?

Sälätneñ här üzäge bik ähämiyatle, bersennän başka anı küz aldına kiterergä dä mömkin tügel. Media-üzäk – 30 el elek bulgan onıtılmas mizgellärne saklauçı, Sälätneñ xäzerge torışın, barışın yaktırtıp baruçı, anı Tatarstannıñ yöze bulgan masştablı proekt bularak kürsätüçe, tanıtuçı häm anıñ kiläçägen kaygırtuçı üzäk.

— Sälättäge balalarga häm ata-analarga nindi teläklär citkerer ideñ?

Sälätkä kilegez, küregez häm şuşı moxittä kaynagız! Bu çınnan da bik zur mömkinlek. Tanışu öçen, üseş öçen, kamilläşü öçen. Bez sezne Sälättä kötäbez! Bezneñ sotsial çeltärlärgä yazılıgız.