Timur Söläymanow: «Töp maksat – balalarga üz-üzlären tabarga yardäm itü» ← kire kaytirga

19 iyunnän 2 awgustka kadär Tatarstannıñ Bilär tarixi-arxeologik muzey-tıyulıgında X Xalıkara «Sälät» yaşlär uku-ukıtu forumı uzaçak. Äzerlek eşläre, bıelgı yañalıklar turında bügen «Tatar-inform» mäglümat agentlıgında uzgan matbugat konferentsiyasendä söyläştelär.

Jurnalistlar belän oçraşuda Tatarstan yaşlär eşläre ministrınıñ berençe urınbasarı Timur Söläymanow, «Sälät» yaşlär üzäge direktorı Aygöl Gabdraxmanowa, «Sälät» yaşlär üzäge direktorı urınbasarı, cäyge alannar koordinatorı Igor Smirnow häm mädäni programma citäkçese Islam Waleew katnaştı.

Agımdagı el Tatarstanda Tugan tellär häm xalıklar berdämlege elı dip iglan itelde. Timur Söläymanow äytüençä, forumda tatar telen öyränügä häm saklauga aerım igtibar birelä. Uku-ukıtu programması rus häm tatar tellärendä alıp barıla, çönki spikerlar Tatarstan gına tügel, Räsäyneñ başka töbäk häm şähärlärennän dä kilä.

«Forumda Tatarstannıñ här rayonınnan, Rossiyaneñ başka töbäklärennän, xätta Belgiya, Germaniyadän dä katnaşaçaklar. Bilärgä 8 meñgä yakın keşe kiläçäk. Uzgan eldagı kebek, bıel da onlayn katnaşıp bula. Onlayn räweştä 9-10 meñ keşe katnaşır dip kötäbez. Şul räweşle barlık katnaşuçılar sanı 18 meñgä yakın bulırga tieş», — dide «Sälät» yaşlär üzäge direktorı Aygöl Gabdraxmanowa. Şulay uk ul balalarnıñ kurkınıçsızlıgı berençe urında toruın da iskärtep ütte. Forumnı oeştıruçılar Bilärgä barır aldınnan PTsR-test tapşırırga, ä balalar meditsina tikşerüe ütärgä tieş.

Şulay uk bıel teläge bulgan härkem forum moxiten tatıp karıy ala. Onlayn räweştä. Monıñ öçen maxsus SeletLive dip atalgan proekt buldırıldı. Turıdan-turı efirda Bilär cirennän forum yañalıkları, kızıklı çaralarınnan translyatsiyalär ütkäreläçäk. Alarnı Sälätneñ YouTube, Instagram häm WKontakte akkauntlarında kararga mömkin bulaçak.

Forumga çakırılgan spikerlar arasında «Çto? Gde? Kogda?» telewizion uenı belgeçläre Nikolay Krapil, Wera Rabkina, Denis Galiäkbärow häm Olga Bıkowa, cırçı AYGYUL, kompozitor, «ART Wektor» icadi initsiatiwalar üzäge citäkçese Marat Taturas, biyuçe, xoreograf, «Altın bitlek» milli teatr premiyase iyase Nurbäk Batulla, Tatarstannıñ atkazangan artistı Elena Kalaganowa h.b. bar.

«Här smena üzençälekle häm el saen alarga nindi dä bulsa yañalık östälä. Bıelgı Arts Biler Forum-da, mäsälän, icadi laboratoriyalär ütkäreläçäk. Här yunäleşneñ ekspertı katnaşuçılardan üzenä törkem tuplayaçak. Forum däwamında alar yaña icadi produkt buldıraçak», – dip söyläde Islam Waleew.

Şulay uk mädäni programma citäkçese jurnalistlarga yaña Forum cırın täkdim itte. Ilgiz Şäyxraziew häm Zärinä Wildanowa başkaruındagı «Ä sin äzerme?» dip atalgan cırga balalar maxsus biyu dä äzerläyaçäk.        

 Forumnardan tış, bıel 22 alan eşläyaçäk. «Sälätneñ küp kenä smenaları uza torgan Laeş rayonında urnaşkan «Yoldızlı» bazasında küptän kötelgän tözekländerü eşläre tämamlandı. Şulay uk Kama Tamagı rayonında ör-yaña «Argamak» bazası açıldı. 6 iyun könne anda «Sälät-Manzara» alanı smenası başlandı», – dide Igor Smirnow.

Forum smenaları isemlege:

- 1 smena, Junior Skills Biler Forum, mäktäp ukuçılarına xäzerge zaman häm kiläçäk hönärlären üzläşterü öçen yaña mömkinleklär tudıruga yunältelgän (19-23.06);

- 2 smena, Arts Biler Forum, sälätle balalarnıñ häm talantlı yaşlärneñ icadi potentsialın tormışka aşıru mäydançıgı (26.06-01.07)

- 3 smena, Selet Biler Forum, komandada näticäle eşläü künekmälären kamilläşterügä häm şäxsi ostalıknı arttıruga yunälderelgän (04-09.07);

- 4 smena, IT Biler Forum, mäglümat ezläü häm eşkärtü, innowatsiyale produktlarnı gamälgä aşıru häm yasalma intellektnı üsterüneñ aktual instrumentlarına bagışlangan (14-18.07);

- 5 smena, Media Biler Forum, telewidenie, radio häm foto-wideoprodakşnga bagışlangan (22-26.07);

- 6 smena, Leaders Biler Forum, Rossiya mäktäp ukuçıları xäräkäte belän berlektä uza. Liderlık sıyfatların, proektlar tözü häm komandada eşläü künekmälären üsterügä yunälderelgän smena (29.07-02.08).

Forum – Tatarstan Respublikasınıñ iñ märtäbäle yaşlär proektlarınıñ berse. Anıñ turında Rossiyadä genä tügel, çit illärdä dä yaxşı belälär. Ul – mädäniyat, sängat, belem birü, media häm IT ölkäsendäge ideyalär, yañalıklar belän büleşü platforması. Forum şäxsi häm hönäri sıyfatlarnı kamilläşterergä yardäm itä, dönyaküläm trendlar belän tanıştıra. Ul intellektual, ruxi häm mädäni yaktan baerga telägän yaşlärne berläşterä.