Bilärdä «Sälät» uku-ukıtu forumı start aldı kire kaytirga

Bilärdä «Sälät» uku-ukıtu forumı start aldı

Bilärdä, Bilär tarixi-arxeologik muzey tıyulıgı territoriisendä, XI Xalıkara «Sälät» yaşlär uku-ukıtu forumınıñ berençe smenası - HÖNÄRLÄR BILÄR FORUMnıñ (Remesla/Junior skills) açılış tantanası uzdı.

Älege çarada «Sälät» yaşlär üzäge direktorı Aygöl Gabdraxmanowa sälamläü süze belän çıgış yasadı. «Minem bu iskitkeç urınga, başcitäklärgä, äydamannarga häm, älbättä inde, barlık katnaşuçılarga çiksez räxmätemne belderäsem kilä. Sezdän başka bu forum bulmas ide, - dip bilgeläp ütte ul. Läzzätlänegez, räxätlänep yal itegez, ber-beregez belän tanışıgız häm gomer bue sezneñ belän yanäşädä bulaçak duslar tabıgız. Bez sezne yaratabız häm härwakıt «Sälät»tä kürergä şatbız».

«Sälät» direktorı forumnı uzdırırga yardäme itüçe Tatarstan Respublikası prezidentı Röstäm Nurgali ulı Miñnexanowka, aeruça Tatarstan Respublikası yaşlär eşläre ministrlıgına häm Tatarstan Respublikası mägarif häm fän ministrlıgına, şulay uk Alekseewsk rayonı administratsiyasenä räxmät süzlären citkerde.

Tel tirälegendä tatar telen öyränüneñ ähämiyate turında «Adımnar - Alabuga» Polilingwal belem birü kompleksı direktorı Nadir Kuramşin söyläde. «Äydägez şuşı dürt kön eçendä tatar telebezne bergäläp şomartıyk. Bügen smenada 700 bala, sez barısı belän dä tanışa alasız. Yözese belän genä bulsa da aralaşıp karagız, sez üzegezneñ tel baylıgıgız niçek yaxşıraçagın kürersez», - dide Kuramşin.

Katnaşuçılarga «AK BARS» BANK GACneñ däülät sektorı belän eşläü buença direktorı Emil Xäyretdinow möräcägat itte. «11 el bu cirdä forum uza, 5 el min sezneñ belän bergä. Bügen bezneñ cıelunıñ säbäbe bulgan häm bezne ilhamlandıruçı yaşlärgä räxmätemne citkeräsem kilä. Min sezneñ üseşegezgä häm tatar telen öyränüegezgä şat», - dip urtaklaştı ul.

Smena açılışında Malsi Music, Ilgiz häm Zarina başkaruında «Sälät» forumınıñ cırı - «Au» täkdir itelde.

Forumnıñ berençe smenası ukuçılarnıñ yaña hönärlär öyränüenä bagışlangan. Bu könnärdä ekologiya, IT häm robototexnika buença ostaxanälär uzaçak.

Smenada katnaşuçılar - fän olimpiadaları, fänni konferentsiyalär häm icadi festiwallär ciñüçeläre häm prizerları, «Adımnar — belem häm tatulıkka yul» küptelle belem birü kompleksınıñ 6-11 sıynıf ukuçıları, şulay uk ​​Sälätneñ «Sälät–Bolgar-Tugan tel» profille smenasına saylap alunı ütkän balalar.