Конференция "ВикиШколы"
24.12.2018
21-nçe dekabr könne «Sälät Yortı»nda «Sälät WikiMäktäbe» uku-ukıtu proektınıñ közge sessiyase yomgaklau konferentsiyase ütte. Çarada Tatarstannıñ törle rayonnarınnan yaş wikipediyaçelär cıeldı. Maxsus kunaklar bularak «Wikimedia RU» entsiklopedik belemne taratuga teläktäşlek kürsätüçe tabışsız partnerlıknıñ direktorı häm başkarma direktorı Wladimir Medeyko häm Stanislaw Kozlowskiy, «Tatarstan Respublikasınıñ mäglümati texnologiyalär üzäge» däülät unitar predpriyatieseneñ başkarma direktorı Tatyana Kamaletdinowa, «Sälät WikiMäktäbe» proektın gamälgä kuyuçı, 2018 El wikimediaçısı Färhad Fatkullin häm Bötendönya tatar yaşläre forumı räise Täbris Yarullin katnaştılar.
Sälät WikiMäktäbe Sälät aktiwistların Wikimedia proektların kullanunı öyrätügä yunälgän. Proekt burıçları arasında tatar telle yaşlärne Wikimedia proektları birä torgan mömkinleklärne kullanuga öyrätü, Wikimedia platformasın Sälätneñ proektlarına kertü, XXI gasır tatar telle intelligentsiyasenä nigez salu. Bıel proekt kısalarında 2 uku-ukıtu sessiyase uzdı. alar kısalarında tatar telle yaşlär wiki-proektlarda eşläügä künektelär. Sessiyalärdä tatar, rus Wikipediyaläre aktiwistları häm «Wikimedia RU» tabışsız partnerlıgı ägzaları spikerlar rolen başkardı. 2018-nçe elda Tatarstannıñ 14 rayonınnan 24 ukuçı häm student Sälät WikiMäktäbendä ukıdı.
Konferentsiya barışında onlayn räweştä rus wikipediyaçese Ekaterina Borisowadan közge sessiyaseneñ yomgaklau ostaxanäse oeştırıldı. Ul katnaşuçılarga Wikimedia proektlarında bulgan Rossiya mädäni obektları turında kontentnı taswirladı.
Plenar utırış däwamında yazgı häm közge sessiyalär katnaşuçıları Tatar Wikipediyasendä çıgargan mäkalälären täkdim ittelär. Şunnan soñ «Wikimedia RU» direktorı Wladimir Medeyko häm Färhad Fatkullin yaşlärne uku-ukıtu programmasın ütüne raslıy torgan tanıklıklar häm istälekle büläklär belän büläklädelär.
Utırış tämamlangannan soñ, Wikimedia cämgıyateneñ tatar telle katnaşuçıları öçen berençe wikioçraşu oeştırıldı. Anda tatar telendäge wiki-proektlarnıñ üseşe xakında süz bardı.