36 sägatlek yul – xıyalga karşı tora almıy! ← kire kaytirga

IV Töbäkara «Bolgar-Tugan tel» çatırlı alanınıñ 1-nçe smenası tögällängängä atna da ütep ölgermäde, Sälätlelär kabattan izge Bolgar cirenä kayttılar. Älege muzey-tıyulık yanädän şat balalar awazına kümelde, sixri belem dönyasına äwerelde. Tugan telebezgä mäxäbbät, anı kamilläşterergä omtılu, Räsäyneñ törle poçmaklarında yaşäüçe yaşlär belän aralaşu, duslaşu, cäyge kanikullarnı küñelle ütkärü teläge 45 töbäktän bulgan sälätle balalar häm yaşlärne Bolgar cirendä cıydı. 1-nçe smenadan aermalı bularak, bu yulı bezgä Xantı-Mansiysk awtonomiyale okrugınıñ Nefteyugansk şähäre aktiwistları da kilep kuşıldı. Şuşı şähärdän kilgän Elina Şärifullina süzlärenä karaganda, alar 36 sägat yulda kilgännär!

«Baştan uk äydamannarnıñ açık yözläre, ixlaslılıgı küzgä taşlandı. Härdaim alarnıñ igtibarın toyabız. Biredäge moxit tä dustanä: barısı da köläç yözle, här mizgelneñ kaderen belälär. Lagerneñ yunäleşe dä oşıy. Tel öyränü, tugan telemne şomartu ber dä komaçau itmäs», – dip belderde Elina.

Smenanıñ iñ yaş katnaşuçısı – 9 yaşlek Ilwina Fäxretdinowa lagerdä berençe tapkır. Aña monda bik oşıy ikän.

«Kızıklı keşelär belän tanışasım, duslaşasım, yaña belemnär tuplıysım kilde. Şuña da biregä kildem. Çaralar bik mawıktırgıç, küñelle uza», – di Ilwina.

Smenanıñ programması da faydalı. Balalar kurayda uynarga öyränälär, kün eşlänmälär tegü serlärenä töşenälär. TNW telekanalı alıp baruçısı, rejisser Wenera Iwanowa belän bergä turı efir turında söyläştek, härkem üzen telewidenie yoldızı itep toya aldı. Galim, tekstolog, Tatarstan Respublikasınıñ atkazangan sängat eşleklese Näcip Näkkaş kalligrafiya buença ostaxanä ütkärde. Smenanıñ sport yunäleşe citäkçese Ilfat Wäliew katnaşuçılar belän Kıtayda belem aluı turında söyläşte. «Idel» jurnalınıñ baş möxärrire Radik Sabirow jurnalistika häm şigriyat berdämlege xakında bäyan itte.

Kirill Çeuzow üzen säyaxätçe dip sanıy. Ul inde ikençe el Räsäy buença säyaxät itä. Forumıbıznı da çitlätep ütä almagan.

«Lagerne uratıp algan tabigat iskitkeç! Balalar bik aktiw, bäxetlelär. Alarnıñ energiyasennän üzeñ dä cılınasıñ. Minem yanga da kilep sorauların birdelär. Dimäk, kızıksınalar. Bu bik şäp! Barısı da bik oşıy!», – dip xis-kiçereşläre belän urtaklaştı Kirill.

«Biredä çın tatar ruxı, moxite xökem sörä. Belem alu, aralaşu öçen barlık mömkinleklär dä tudırılgan. Programmada karalgan däreslär, respublikabıznıñ ataklı şäxesläre, möxtäräm belgeçläre belän oçraşular bik küñelle ütä. Lagerda bulgan wakıtıgız yaktı mizgellär bulıp xäteregezdä kalsın. Uñışlar, isänlek-saulık, matur hawa torışı teläp kalam!» – dip citkerde Tatarstan Respublikası mägarif häm fän ministrlıgınıñ äydäp baruçı konsultantı Älfiya Äxätowa.

Alinä Sısoewa, Sälät media-mäktäbe ukuçısı