8 par kuldaş – 1 Sämrux sını kire kaytirga

8 par kuldaş – 1 Sämrux sını

17-nçe gıynwar könne Sälät Yortında «Sämrux-2017» premiyaseneñ «El kuldaşları» nominatsiyase buença saylap alu turı uzdırıldı. 
Şunı iskärtep uzarga kiräk, älege premiya oeşmabıznıñ ägzaların, partner, proekt awtorları häm oeştıruçıların büläkläü, räxmät süzläre äytü maksatınnan ütkärelä. 

Bu kiçne Sämrux sını öçen kiläse 8 alannarnıñ äydamannarı köç sınaştı: 

• Ilüzä Şäwäliewa häm Gadel Xäertdinow («Sälät-Imänkäy») 
• Ence Şakirowa häm Ilnaz Mäcitow («Sälät-Bögelmä») 
• Almaz Gabdelbärow häm Läysän Safina («Sälät-Sanak») 
• Bulat Gaynetdinow häm Färidä Gazizullina («Sälät-Şäxes») 
• Ilwena Kärimowa häm Fänil Galiullin («Bolgar-Tugan tel») 
• Rämis Sadriew häm Aysılu Nuretdinowa («Sälät-Ruxiyat») 
• Azat Bäşärow häm Alinä Ramazanowa («Sälät Bolgar») 
• Rafis Xälilow häm Ilüzä Xosnullina («Sälät-Rauşan») 

Älege kuldaşlarnıñ eşçänlegen, mömkinleklären bu etapta ike bäygedä sınap karadılar: sälamläü häm pedagogik situatsiyalär. Bu yulı bäyalüçe jyuri ägzaları arasında bez kiläse möxtäräm kunaklarıbıznı kürä aldık: 

• Sälätneñ küp kenä proektlarına üz öleşen kertkän, Sälät weterannarı forumı citäkçese, «Serwis Stil» mebel kompaniyaseneñ general direktorı – Leniza apa Rizwanowa; 
• Munitsipal byudjet uçrejdeniyase «Kazan şähäreneñ parklar häm skwerlar direktsiyase» direktorı – Alsu apa Karyakina; 
• Sälätebezneñ ostazı, tarix fännäre doktorı, arxeolog, Tatarstannıñ atkazangan fän eşleklese, Tatarstan Respublikası Fännär akademiyase akademigı - Fayaz abıy Xucin; 
• Yazuçı, dramaturg, publitsist – Rabit abıy Batulla; 
• Sälät weteranı, «Sälät-Rauşan» häm «Sälät-Ruxiyat» alannarınıñ direktorı – Läysän apa Wetrowa; 
• Kazan Federal uniwersitetı dotsentı – Rişat abıy Xäsänow; 
• «Sälät» yaşlär üzäge direktorı –Aygöl apa Gabdraxmanowa. 

Bäyge başlanır aldınnan «Sälät-Şäxes» äydamanı Bulat Gaynetdinow nominatsiyagä karata üz fikeren belderde: «Minem fikeremçä, älege konkurska barı tik çın tandem bulıp eşläüçe kuldaşlar gına kilä ala. Kübese minem belän rizalaşır, monda üzenä çınnan da ışana torgan keşelärne genä kürep bula. Şulay uk üzeñneñ kuldaşıña ışanu da möhim. Min andıy keşene tapkanıma bik şat. Anıñ belän eşläü üze ber bäxet ide», dip, urtaklaştı eget. 

Iñ berençe bulıp säxnädä üz çıgışların «Sälät-Sanak» äydamannarı täkdim itte. Läysän belän Almaz kuldaşlarnıñ eş protsessında bik möhim rol uynaganı turında söyläp kittelär. Bu temada açıklık kerter öçen, alar kuldaşlarınıñ, yagni ber-berseneñ uñay yakları turında büleştelär. 

Kiläse bulıp sälamläü estafetasın «Bolgar-Tugan tel» äydamannarı, Ilwena belän Fänil kabul ittelär. Äzerlägän çıgışlarında äydamannarnıñ töp wazıyfaları turında centekläp söylärgä tırıştılar. Axırda, çarabızga yam kertkän moñlı cır belän dä şatlandırdılar. 

Kiçäbezne däwam itkän «Sälät-Ruxiyat» kuldaşları, Rämis belän Aysılu, älege bäygegä nıklap äzerlängännär. Monıñ turında alarnıñ grimları da söyläp tordı. Çıgışlarınıñ kıskaça eçtälege belän urtaklaşıp kitik: bik küp ellar ütkäç, kayçandır «Sälät-Ruxiyat» alanında kuldaşlar bulgan äydamannar xätirälärgä birelep ütkän smenalarnıñ fotoalbomın karap utıralar häm ber-berse belän şayaru räweşendä faydalı kiñäşlär belän urtaklaşalar. Alarnıñ töp fikerläreneñ berse – äydaman sälkeşkä tormışta üsü öçen bik zur etärgeç bulıp tora. 

«Sälät-Bolgar» alanın täkdim itüçe kuldaşlar, Azat belän Alinä üz çiratında härber yaştäge kazanışları, ciñüläre belän barlık kilgän kunaklar häm jyuri ägzaları belän urtaklaştılar. Bäygegä bäyräm käefen kerter öçen cır da büläk itergä buldılar. 

«Sälät-Imänkäy» dän Ilüzä belän Gadel äle başkalar belän kullanmagan ısul belän eşlärgä buldılar. Ul da bulsa, jyuri ägzaları belän interaktiw. Üz çıgışlarında kuldaşlar äydaman ütä torgan barlık etaplar turında söyläp kittelär. 

Kiläse katnaşuçılar şulay uk bäygegä centekläp äzerlängännär ide. Grim, wideo, yaxşı itep yatlangan süzlär. Monıñ barısı da alar çıgışlarına karata uñay fiker kaldırdı. Süz Ence belän Ilnaz turında bara («Sälät-Bögelmä»). Şunı da äytep kitergä kiräk, canatuçıları da bik şäp ide! 
«Sälät-Rauşan» äydamannarı Ilüzä belän Rafis, üz çıgışlarında kullangan formatları belän barlık tamaşaçılarda kızıksınu uyattılar. Sälamläü bäygesendä alar psixolog belgeçenä barıp, barlık mäsälälärne söyläp, üzläreneñ bik yaxşı tandem ikänen añladılar. Alar fikerençä, kuldaşlar arasında döres aralaşu bik möhim rol uynıy. Çönki mondıy aralaşu bulganda gına effektiw räştä eşläp bula. 

Berençe bäygene «Sälät-Şäxes»tän bulgan Bulat belän Färidä yaptılar. Biredä alar berençe tapkır äydaman bulıp bara torgan häm inde küp kenä smenalarda bulgan äydamannarnıñ aermaları turında büleştelär. Barısı da rizalaşır, çıgış yumorga da, faydalı kiñäşlärgä dä bay ide. Afärin! 

Ikençe «Pedagogik situatsiyalär» bäygese jyuri ägzaları fikere buença äydamannar öçen bik kiräkle ide. Çönki biredä jyuri äydamannarnıñ çınbarlıkta törle situatsiyalarda niçek eşläwen kürä aldılar. 

Axırda üzeneñ xis-kiçereşläre belän «Sälät» yaşlär üzäge direktorı Aygöl apa Gabdraxmanowa da urtaklaştı: «Bıel älege «El kuldaşları» nominatsiyase berençe tapkır uzdırıldı. Şunı äytä alam, alga da bu nominatsiyane kaldırırga kiräk dip uylıybız. Kübese minem belän rizalaşır dip uylıym, kiçäge nominatsiya başkalarga karaganda köçleräk ide. Kürengänçä, äzerlek bik yaxşı , zal da canatarlar belän tulgan ide. Bu bik şatlandıra. Äydamannar Sälät üseşendä bik möhim rol uynıylar, çönki alar anıñ üzägendä toruçılarnıñ berse. Alarnıñ yardäme belän sälkeşlär törle ölkälärdä üsä, ä alarnıñ üseşe belän Sälät tä ber urında tuktalıp tormıy», dip tögälläde üzäk direktorı. 

2018-nçe elnıñ 8-nçe fewralendä «El kuldaşları» isemenä laek bulgan parnı «Sämrux» premiyaseneñ buläkläü tantanasında, G.Tukay isemendäge Tatar Däülät Filarmoniyasendä belerbez. 

«Sämrux-2017» premiyaseneñ partnerları: «Tübätäy» tatar milli tiz tuklanu çeltäre, SELETSTORE yaşlär kieme häm aksessuarlar kibete, «Besedka» hönärxanäse, «Rocket Records» tawış yazdıru studiyase, G.Kamal isemendäge Tatar däülät akademiya teatrı, «Widimıy swet» foto häm wideo studiyase, FUN24 küñel açu häm «Ixsan» trening üzäge.