Bäxetneñ yaña dulkınında ← kire kaytirga

Sälät berläşmäseneñ cäyge kampaniyase kızgannan-kıza bara. Bolgarda IV Töbäkara «Bolgar-Tugan tel» palatkalı lagereneñ berençe smenası axırına yakınlaştı. Laeş rayonında urnaşkan «Zwezdnıy» yal häm sälamätländerü lagerendä «Sälät-Tel», Bilärdäge «Fänsar» fän häm mägarif üzägendä isä «Ostalar bistäse» alannarı däwam itä.

Bu cäydä  Sälätneñ 25 profille smenası uzaçak. Alar arasında traditsiyagä kergännäre dä, bıel berençe tapkır eşliyaçäkläre dä bar. Biredä 15 meñ sälätle bala häm yaşlär katnaşuı kötelä.

Sälät smenaları ul – tatar telle unikal moxit. Biredä kabatlanmas uku-ukıtu, mawıktırgıç mädäni-küñel açu, sport programmaları eşli, üz eşeneñ ostalarınnan ostaxanälär uzdırıla.

28-nçe iyun könne Sälät cäyge kampaniyaseneñ 2-nçe smenası start alaçak. Tatarstanda gına tügel, Çuwaşiya, Başkortostan Respublikalarında, Samara şähärendä Sälät alannarı üz eşen başlap cibäräçäk. «Aznakay», «Baylar Cabası», «Batır», «Bilär kalası», «Bolgar», «Bögelmä», «Bua (Gayrät)», «Kandrakül», «Rauşan», «Ruxiyat», «Samara» häm «Yar Çallı» smenaları sälkeşlärne kötä.

Sälät smenalarında törle yaktan üseş, irken üzañ häm fänni belem alu öçen barlık şartlar da tudırılgan.

Kabatlanmas Sälät moxite balanıñ säläten açarga, anı üsterergä mömkinlek tudıra.

Sälät nizamätläreneñ berse menä niçek  yañgırıy: «Bez yaxşılıkka tartılıp üsäbez, naçarlıktan etärelep tügel».

Berläşmä 1994-nçe elda oeştırılgan ide. Ike distä tarixına ul üzendä 90 meñ balanı, ukıtuçılarnı, ostazlarnı tuplıy aldı. Sälkeşlär äle dä berençe äydamannarın, alannarınıñ sörännären xäterli, istälek itep sarı galstukların, sarı futbolkaların saklıy.

Albina Kadirowa, «Sälät-Şäxes 2017» alanı direktorı:

- Här cäyge profille alannıñ üz yunäleşe, üzençälege bar. Här direktor komandası belän bergälektä 100%-ka eşli: här balanıñ cäe onıtılmaslık bulırga tieş. Gariza kaldırıp sez üzegez dä bu süzlärneñ döreslegen tikşerep karıy alasız. Sälätne süzlär belän genä añlatıp beterep bulmıy. Anı toep kararga kiräk. Minem öçen Sälät gadäti yaşlär oeşması gına tügel, ä sular hawam da, tormışım da.

Dilärä Xälitowa, «Sälät-Bilär kalası 2017» smenası direktorı:

- Min Sälättä inde 6 el. Şuşı wakıt aralıgında ul minem ikençe gailämä äwerelde. Sälkeş bulganda uk äydaman bulu turında xıyallana başladım. Berençe «Äydamannar mäktäbe»m 2014-nçe elda uzdı. Şul uk elnı äydaman bulu bäxetenä dä ireştem. Şuşı energiya belän ilhamlanıp eşçänlegemne däwam ittem. Bıltırgı cäemne «Sälät-Bilär kalası» belän bäylädem. Barlık balalar da bu alannı minem şikelle ük yaratsınnar öçen barın da eşlärmen!

Bulat Wäliullin, «Sälät-Samara 2017» smenasınıñ ölkän äydamanı:

- Sälät minem öçen bik kaderle.  2011-nçe elda niçek kilgänemne äle dä xäterlim. Sälät mine şäxes bularak tärbiyaläde. Biredä KWN uynadım, icat, fän belän şögılländem. Bik küp duslarım buluı öçen dä Sälätkä räxmätlemen. Bu elnıñ gıynwarında Samarada yaña alan açıp cibärdek. Älege şähärdä aktiw räweştä Sälät klubı eşläp kilä. Tulı bäxet öçen şuşı smena gına citmi ide. 7 könlek kışkı smenanı da maturlap uzdıra aldık. Balalar gına tügel, üzebez dä bik kanägat kaldık. Älege xis-kiçereşlär başka berkayda da kabatlanmas! Nibarı ber atna eçendä 43 balanıñ yakın keşeeñä äwerelüen kötmägän idem. Şuña da kabattan şuşı smenaga kaytırga wägdä birdem. Bügenge köndä min häm komandabız kızıklı programma uylau belän mäşgul. Samara ilebezneñ kosmos belän bäyle şähäre bulganga, smenada da galäm çatkıları bar.

Här alan turında tulı mäglümat selet.biz saytınıñ «Alannar» bülegendä kürsätelgän. Gariazalar portfolio-selet.ru saytında kabul itelä, biredä başta terkälü uzu kiräk. Portfoliogızda barlık kazanışlarıgıznı kürsätergä onıtmagız.

Gadi 3 adım häm kabatlanmas cäy sezne kötä!