El däwamında Sälät ritmında ← kire kaytirga

Sälät klubları  –Tatarstan buença gına tügel, çit töbäklärdä dä aktiw räweştä yaşlär moxiten häm tugan telebezne üsterü häm populyarlaştıru östendä eşläüçe Sälät berläşmäseneñ  küz nurı.

Bilär kalasında uzgan Sälät klublarınıñ VI seminarında 13 klub katnaştı, şularnıñ ikese yañalar: Kazan şähäreneñ 9-nçı gimnaziyase häm 147-nçe nomerlı mäktäp.

Klub eşçänlege häm ellık plan turında bezgä Sälät klubı prezidentı Igor Smirnow söyläp uzdı.

- Sälät klubı – ul...

- Sälätneñ törle yaştä bulgan aktiwistlarnıñ berläşkän mäydançıgı. Klub eşçänlege oeştıru säläte bulgannarga törle yaklap yardäm itü moxite dä.

- Seminarlar uzdırunıñ maksatı nidän gıybarät?

-  Seminarnıñ maksatı, berençedän, yaña uku elın döres başlap cibärep, ellık plan tözü.  Ikençedän, yaña duslar tabu, başka klublar belän tanışıp, ideyalär, fikerlär belän urtaklaşu.

- Seminarnıñ eşçänlege nindi yunäleşlär buença ütkärelde?

- Härwakıttagıça öç yunäleş buença: därt, darman häm fähem. Här yunäleş buença yaña proektlar tudıru häm alarnı populyarlaştıru, tatar tele däräcäsen kütärü töp maksat. Bu yunäleşlär belän genä çiklänmiçä, media yunäleşenä dä igtibar ittek. Bügenge köndä üzegez beläsez internet zamanında yaşibez. Üz eşeñne döres itep yaktırtu bik kiräk.

- Bıel nindi proektlarnı tormışka aşıru turında uylandıgız?

- Här seminarda klublar yul kartasın tözep, el däwamında şunıñ nigezendä eşçänlek alıp baralar. Bu seminarda da alar eşlände. Yul kartasında törle yunäleşlärgä karagan proektlar bar, iñ möhime, uku-ukıtu yunäleşenä igtibar arttı.

- Igor, üz klubıñnı açıp cibärü öçen närsälär eşlärgä kiräk?

- Iñ möhime – teläk, älbättä. Här uku elı başında açık işeklär köne uzdırıla. Şunnan soñ teläkläre bulgan aktiwistlarnı bez seminarga çakırabız. Berençe tapkır katnaşırga kilüçelär bulganda bez inde şunda uk añlıybız, dimäk, teläkläre zurdan.

-  Katnaşuçılarnıñ säläten niçek bäyaliseñ?

- Eşlärgä teläkläre häm sälätläre zur. Iñ möhime, ber töple komanda buldırıp, berdäm eşläü häm başka klublar belän tıgız elemtädä toru. Eldan-el katnaşuçılar sanı da, sälätläre buença da kürsätkeçlär şatlandıra. Seminarlar uzdıru stimul bulıp tora.   

- Seminarlar uzdıru – klub eşçänlegeneñ stimulı bulıp tora diseñ. Bu seminarda sin şuña tagın ber kat inandıñmı? 

- Äye, Sälät atmosferası Tatarstannan gına tügel, ä başka töbäklärdän bulgan sälkeşlärne berläşterde häm kiläçäkkä eş başlap cibärergä ilhamlandırdı.

Sälät media-mäktäbe ukuçısı Alinä Sısoewa