«Iske Kazan» festiwale neçkälekläre ← kire kaytirga

15-21-nçe awgust könnärendä TRnıñ Biektau rayonı, «Iske Kazan» muzey-tıyulıgında X-nçı yubiley «Iske Kazan cıenı» ütkärelde. Biredä 300dän artık bala katnaştı. Smenanıñ barlık neçkälekläre häm kiläse elga plannarı turında bezgä festiwalnıñ ölkän äydamanı Timur Nazarow söyläde.

- Sezneñ töp maksatıgız närsädän gıybarät?

- Bezneñ töp maksatlarıbıznıñ berse – balalarda ata-babalarıbıznıñ şögıllärenä karata kızıksınu xisen açıklau häm buldıru. Bu oçrakta bez tarix häm hönärçelekkä östenlek birdek.

- X-nçı yubiley festiwal başkalardan närsä belän aerıldı?

- Berençedän, törledän-törle ostaxanälär häm oçraşular 2 tapkır kübräk oeştırıldı. Älege zur san malaylar häm kızlarnıñ üzlären törle ölkälärdä sınap karau, kürsätü öçen buldırıldı. Cıenga küp kenä kunaklar çakırıldı. Ä bu üz çiratında festiwalgä aerım ber däräcä birep tora.

- Uku-ukıtu häm küñel açu programmasınıñ üzençälege turında söyläsäñ ide.

- Festiwal territoriyasenä «Sälät-Imänkäy» häm «Sälät-Şäxes» alannarı kilgäç, alar öçen maxsus Welcome Tour, barlık alannar öçen tarixi muzeyda ekskursiya ütkärelde. Räsmi açılu tantanası da üzen köttermäde. Maxsus kunaklar, citäkçelär katnaşuçılarnı sälamlädelär, alarga faydalı kiñäşlär birdelär. Räsmi öleş tämamlanuı belän balalar ostaxanälärgä häm oçraşularga taralıştı. Äye, belem alu bik yaxşı närsä, ämma küñel açu turında da onıtırga kiräk tügel. Goref-gadätlärne onıtmas öçen, mäydanda zur Sabantuy bäyräme oeştırıldı. Festiwalneñ kiçke öleşe dä bik emotsional buldı diyargä kiräk. Älege moxitne tudırırga zur kontsert yardäm itte. Biredä katnaşuçılar üzlären KWN uenında, cır häm biyudä sınadı. Näk menä kontsert däwamında barlık alannar üz cırların häm biyulären täkdim itte.

- Kuygan maksatlarga ireşä aldıgızmı? Närsä yaki kem yardäm itte?

- Bik ciñel sorau tügel... Tik ber äyber äytä alam: barısına da cıen bik oşadı. Axırda şaktıy gına uñay fikerlär işettem. Bu üz çiratında kübesen añlata. Kuygan maksatlarga ireşergä, älbättä, citäkçelek bik nık yardäm itte. Bu mäsälädä täcribä dä zur rol uynadı diyargä kiräk. Älege masştablı çaranı bez berniçä el rättän oeştırabız. Şuña kürä nindider zur awırlıklar kilep çıktı dip äytä almıym.

- Festiwaldä 300dän artık bala katnaştı. Mondıy formattagı festiwallär yaşlär öçen aktualme? Ni öçen alarnıñ kübese Sälät alannarın saylıy?

- Şäxsän minemçä, alar bik aktual. Bäläkäy genä serebezne beraz açıyk, ikençe elga älege cıennı 1 könlek itep tügel, ä 3 könlek dip uzdırırga plan korabız. Kübese belgänçä, Sälät alannarı başka lagerlärdän şaktıy gına aerıla. Monıñ turında bezneñ smenalarda 1 tapkır bulsa da bulgan balalar belä. Bezdä belem birü programmasına aerım basım yasala. Törle sessiyalär, ostaxanälär, oçraşular ütkärelä. Ä alarnı Tatarstannıñ, Rossiyaneñ tanılgan şäxesläre alıp bara. Ämma, küñel açu programması da 2-nçe planda kalmıy.

- Kiläse elda nindi yañalık kertergä uylıysız?

- Ikençe elda bez barısın da şakkattırırga telibez. Plannarda tormışka aşırırga kiräk bulgan ideyalär şaktıy. Programmaga kübräk etnika häm muzıka östesi kilä.