«El äydamanı» ← kire kaytirga

Fewral aenda «Sämrux» el premiyaseneñ ciñüçelären açıkladık. Täkdim itelgän 8 nominatsiya arasınnan iñ-iñnärne bilgelädek. «El äydamanı» isemenä «Sälät-Batır» äydamanı Fännur Şayxetdinow laek buldı. Xis-kiçereşlären belü maksatınnan, Fännur belän äñgämä kordık.

- Fännur, üzeñ belän tanıştırıp üt äle.

- Min KFUnıñ Idarä, iktisad häm finanslar institunıñ geografiya bülegendä 3 kursta belem alam. Buş wakıtımda balık totırga, futbol uynarga, uemdagı kızıklı ideyalärne çınga aşırırıga yaratam.

- Sälätkä niçek kilep eläkteñ?

- Sälättä min 2010-nçı eldan birle, sälkeş bularak «Sälät-Şäxes», «Sälät-Rauşan» alannarında yal ittem, Bilär forumında oeştıruçı bulıp ta eşlärgä ölgerdem. Annan «Sälät-Rauşan», «Sälät-Ostalar bistäse», «Sälät-Batır» alannarında äydaman buldım. Bolardan tış «Äydamannar mäktäbe» häm «Äydamannar yarışında», zamanında Sälät oeştırgan futbol yarışlarında häm, älbättä inde, «Bezneñ fiker» debatlar ligasında katnaştım.

- Sin «El äydamanı» nominatsiyasendä ciñü yauladıñ. Çın äydaman nindi sıyfatlarga iya bulırga tieşlegen sin beläseñ dimäk.

- Minem fikeremçä, äydaman üz eşenä cawaplı karıy belergä tieş. Şul uk wakıtta yumor xisenä, märxämätlelek, kreatiwlık, liderlık kebek sıyfatlarga iya bulırga tieş.

- Bu cäyne kaysı alanga baraçagıñnı xäl itteñme äle?

- Bıel «Sälät-Batır» alanında ölkän äydaman bulaçakmın. Sälkeşlärgä menä digän smena yasau öçen köçemne kızganmayaçakmın!

- Ä Sämrux premiyasendä ciñärmen dip uyladıñmı? 

- Döresen genä äytkändä, yuk. Zur syurpriz buldı ul minem öçen! Ul könne başım bik küp uylar belän tulgan ide, «Sämrux» premiyase  turında uylamaska tırıştım. Sälättä mondıy uñışka ireşüemä bik şatmın. Sälät bezneñ öçen, çın mägnäsendä, zur bäyräm oeştırdı. Miña gına tügel, barlık kilgän keşegä oşagandır, şigem yuk.

- Büläkläü wakıtında isemeñne äytkänçe nindi xislär kiçerdeñ?

- Büläkläü wakıtında isememne äytkänçe yözemdä ällä ni emotsiyalär bulmasa da, eçemnän dulkınlandım. Isememne äytkäç şundıy ciñel bulıp kitte. Tırışularım buşka kitmägän ikän. (Kölä)

- Yarışka ezerlängändä köndäşlektän kurkmadıñmı? 

- Gomumän, belgänegezçä, yarış berniçä etapta ütte. Başta Äydamannar yarışında ciñep, annan soñ tagın jyuri aldında üzeñne kürsätergä kiräk ide. Katnaşkan äydamannar barısı da şundıy şäp, uñgan-bulgannar – şuña bu konkursta ciñü awır, minemçä. Fänil, Çulpan häm Läysän – bik köçle äydamannar, minem öçen alarnıñ härkaysısı el äydamanı isemenä laeklı.

- Sälätlelärgä teläkläreñ?

- Berençe çiratta, miña yardäm itkännärgä, miña ışangannarga zur räxmätemne belderäsem kilä. Ciñüemä äle haman da ışanıp betä almıym! Sälätkä barısı öçen dä zur räxmät! Tagın da yugarı biekleklärgä kütärelermen dip ışanıp kalam. Ä sälkeşlärne «Sälät-Batır»ga çakırıp kalasım kilä. Süz biräm, smena bik kızık ütäçäk!

Sälät Media mäktäbe ukuçısı Läysän Minnullina