Aygöl Wäliullina Sämrux sının alaçak kire kaytirga

Aygöl Wäliullina Sämrux sının alaçak


«Sämrux-2017» el premiyasendä katnaşu öçen gariza kabul itü kampaniyase bara. «El direktorı», «El ölkän äydamanı», «El alanı», «El sälkeşe», «El  klubı», «El kuldaşları» häm «Sälät cırlıy» nominatsiyalärendä katnaşırga teläk belderüçelär saylap alunıñ 4 etabın uzarga tieş bulaçak. Barı tik «El äydamanı» nominatsiyaseneñ ciñüçese inde bilgele. Ul – Aygöl Wäliullina! Kotlıybız!

 

20-23 oktyabr könnärendä Bilär kalasınıñ «Fänsar» üzägendä «Äydamannar yarışı» bäygese uzdırılgan ide.  «Premer-liga» turınıñ barlık etapların uñışlı uzıp, Aygöl ciñüçe rätendä buldı. Niçek? Aygöl belän aralaşkannan soñ beldek.

- Aygöl, Sälät sineñ öçen närsä ul?

- Sälät – bügenge köndä minem küñelemä iñ yakın bulgan urın, monda duslık, monda üz östeñdä eşläü, üseş, meñlägän sälätle yaşlär moxite.  

- Üzeñneñ äydamanlık eşçänlegeñ belän yakınnanrak tanıştırıp kit äle. Kaysı elnı häm kaysı smenada sin berençe tapkır äydaman buldıñ?


- 2016-nçı elda 1-nçe kursnı tämamlagaç «Sälät-Rauşan» smenasında buldı ul. Bu smenada 2014-2015-nçe ellarda sälkeş bulgan idem. Äydaman bulu, älbättä, küñelemä bik oşadı.

- Ni öçen äydaman bulırga teläk tudı?


- Sälätkä berençe tapkır kilep kergäç, alga taba tormışımnı Sälät belän bäylärmen dip min ber dä uylamagan idem. Läkin här sälkeşneñ bügenme, irtägäme äydaman bulıp karıysı kilü xıyalı barın añladım. Kızık ta, kızganıç ta, läkin sälkeş bulgan wakıtta bez wakıtnı aşıktırganbız ikän bit dip uylap kuyam xäzer. (Kölä).

- Küñeleñdä istä kalgan smena kaysı? Ni öçen?


- «Sälät-Rauşan 2016», «Sälät-Samara»nıñ kışkı smenası häm «Sälät-Samara 2017». Härberse üzençälekle, ber-bersenä oxşamagan. Barısı da yörägemä yakın, aerıp äytä almıym. Barlık köçeñne birep eşläsäñ, här smenadan da yam tabasıñ.

- Balalar belän eşläüdä iñ awırı närsä sineñçä?


- Gomumän, el saen smenalarga bargan saen bik küp täcribä tuplıysıñ. Äle barısına da töşenep betmägänlegeñne añlıysıñ. Döresen äytäm, berençe el äydaman bulıp bargaç, min bu eş bik ciñel ikän dip uylagan idem, läkin eldan-el şunı añlıym: äydaman eşe awır da, küp köç tä taläp itä torgan xezmät ikän. Iñ möhime, sınaularga bireşmäskä kiräk.

- Bäygedä iñ awırı närsä buldı?


- Awır dip..... Aerıp äytä dä almıym inde. Läkin uzgan el belän awırrak bulganın sizdem üze. Bäygene ike ligaga bülep döres eşlägännär dip sanıym. Üz säläteñne tagın da açu öçen menä digän mömkinlek.

- Ciñärmen dip kötteñme? Isemeñne işetkäç nindi xis-kiçereşlär kiçerdeñ?


- Ciñärmen dip ber dä uylamagan idem. Çönki barlık katnaşuçılar da bik köçle ide. Isememne işetkäç, şunda uk elap cibärdem. Şatlık yaşläre ide inde, älbättä. Şunnan soñ tınıçlanıp, üz xezmätemä üzem ük analiz birep karadım: barısın da döres eşlädemme ikän digän sorau belän bernikadär wakıt uylanıp yordem.

- Sineñçä, tagın kem ciñügä laek ide?


- Barlık äydamannar da  bik yaxşı äzerlängännär ide, härberse dä ciñügä laek ide. Gomumän bu bäygedä ber-bereñnän könläşü xise yuk ide, bäygegä barıbız da bergä äzerländek, ber-berebezgä yardäm ittek.

- Niçek uylıysıñ, ni öçen näk menä sin ciñügä laek buldıñ?


- Awır sorau. Şunı gına äytep uzasım kilä: bäyge wakıtında miña bik küp duslarım şaltıratıp uñışlar telädelär. Alarga bik zur räxmät! Şulay uk kuratorlarga, bäygeneñ oeştıruçılarına häm Sälät berläşmäsenä zuuur räxmät.  

- «Sämrux» el premiyasendä iñ-iñnär arasında bulu kauşatamı?


- Älbättä. «El äydamanı 2017» isemen alu gına tügel bit ul, ä äydamanlık eşçänlegeñä bernikadär näticä yasau häm kiläçäktä dä bu laeklı isemgä tap töşermäü dä äle ul.

- Kiläse ellarga da äydaman bulu telägeñ barmı?


- Äye. Tormışımnı Sälätneñ cäyge alannarınnan  häm sälkeşlärdän başka küz aldına da kiterä almıym. Yaña alannarda üzemne sınap karıysım kilä. 1, 3 häm 4-nçe smenalarda ber tapkır da bulganım yuk. Alarda da eşläp karıysım kilä. Kem rolendä – anısı möhim tügel älegä.

- Aygöl, bezneñ komandada bulganıña bez bik şat. «Sämrux»ta oçraşkanga kadär.