Sälät Forumınıñ media-komandası ägzası Älfiya Şakircanowa «Tawrida» forumı grantına iya buldı!

Mädäniyat häm sängat ölkäsendä kaynauçı yaşlärneñ «Tawrida» forumı Kırımda inde bişençe el rättän uzdırıla. Bu – professional berläşmälär barlıkka kiterä häm yaş mädäniyat eşleklelärenä icadi moxit tudıra torgan forum. Katnaşuçıları – 18-35 yaşleklär, icadi wuz studentları häm çıgarılışları, icadi moxittä kaynauçılar. 2019-nçı elda forum maydan oktyabrgä kadär uza, barlıgı 15 tematik smenanı üz eçenä ala. Älege smenalarda böten il buença barlıgı 6 meñ yaş keşeneñ katnaşuı kötelä.
Älfiya dä şundıy ber smenadan grant belän kayttı!

– Älfiya, çın küñeldän kotlıybız sine! Forumnan algan xisläreñ belän urtaklaş äle...

– Forumga baru öçen, miña tulı metrajlı film töşerergä turı kilde – monı min şayarıp şulay cawap biräm. Çınlıkta bolayrak buldı: min «Ne nazıway menya Wasya» digän tulı metrlı film töşerep, Bötenrossiya debyutantlar Pitçingınıñ şort-listına eläktem. Anda filmımnı täkdim ittem häm «Tawrida»ga baru xokukına iya buldım. Forumga konkret proekt belän barırga häm grantka dägwa kılırga kiräk ide.

– Sin forumda nindi yunäleştä katnaştıñ?

– Min garizamnı WGIK mäktäbenä, wideokontent smenasına tapşırdım.

– Ä ni öçen ekologiya yunäleşendäge proekt belän katnaşırga buldıñ?

– Soñgı wakıtta mine Cir şarınıñ ekologik torışı, bu xälgä keşelärneñ mönäsäbäte bik borçıy. Şuña kürä filmnı şuşı temaga töşerergä buldım. Çüpne aerıp tügü häm könküreştä plastik kullanunı kimetü turında film töşerergä telim. Filmnıñ töp geroe – Tatarstanda «eko-agartuçı» Kira. Anıñ maksatı – ekologik (häm bäxetle!) yaşäü räweşen buldıru.
Älege filmnı karagannan soñ, härkem ekologik yaşäü räweşen saylargamı-yukmı dip uylana alaçak. Ul ekologiya kulturası nigezlären açıp biräçäk.

– Bu filmnı kayçan töşerä başlarga uylıysıñ? Häm anı kayçan karıy alaçakbız?

– Filmnı töşerügä äzerlek eşläre sentyabrdä başlanaçak, oktyabrdä inde töşerä başlarga, ä martta eşne tögällärgä uylıybız. Grafiktan taypılmıyça barsak, filmnı 2020nçe elnıñ yazında karap bulaçak.

– Kiläse elga da forumda katnaşıp, tagın da zurrak ürlär yaulau teläge barmı?

– Älbättä, bar! Şuña kürä kiläse elga da elägergä tırışaçakmın. Ul inde yaña proekt, yaña bieklek bulaçak.