«Sälättäge böten yaxşı närsä «TALKış käläwe» mäktäbendä tuplangan ide» ← kire kaytirga

«Fänsar» fänni-belem birü üzägendä «TALKış käläwe» ingliz tele klubınıñ berençe küçmä mäktäbe üz eşen tögälläde. Anda 7-11-nçe sıynıf ukuçıları katnaştı.

Küçmä mäktäpneñ programması, oeştıru komandası häm başka neçkälekläre turında proektnıñ citäkçese Dilärä Kärimullina belän söyläştek.

–  Küçmä mäktäp niçek uzdı?

–  Gomumän alganda – yaxşı, ä balalar äytüençä, bik yaxşı uzdı. Smenadan soñ da elemtä saklansın öçen, Gugl forma buldırdık, häm «Küçmä mäktäpkä tagın barasıñmı?» digän sorauga böten bala da «Äye» dip cawap birde! Sotsial çeltärlärdä dä bik küp uñay kommentariylär kaldıralar. Menä şunnan soñ eşlise dä eşlise kilä! Min komandamnan, ukıtuçılar häm spikerlardan bik uñdım. Äydamannarnı aerıp äytep kitäsem kilä: Rizwanowa Kamilä, Usmanow Ildus, Miñnegulow Damir, Xänäfin Ayaz (Dj), Kamaliew Rafael. Näk menä şuşı keşelär küçmä mäktäptä Sälät atmosferasın buldırdı häm, älbättä, ingliz tele turında da onıtmadılar.

– Programmada närsälär bar ide?

– Programma bik tıgız buldı. Küñelsezlänep utırırga wakıt yuk ide. Barısı da Sälät Yortında başlandı. Räsmi açılışka Timur Söläymanow ta kilde. Annarı tanışu uennarı, «Ice breaking» uynadık. «Fänsar»ga kilgäç, «TALKış käläwe» proektı häm gomumän Sälät turında söylädek. Şunnan soñ balalar otryadlarga bülende häm üz proektların täkdim itügä äzerlände. Proektnıñ ideyase mondıy ide: berär il uylarga häm şunda üzeñneñ Sälät alanın buldırırga. Monı eşlägändä sälkeşlärneñ nikadär kreatiw buluları tagın ber tapkır raslandı. Älbättä inde, belem birü programmasınnan tış, küñel açu çaraları da buldı. Karaoke night häm Disco uzdırdık.

Ikençe häm öçençe könnär törle däreslär häm master-klasslarga bay buldı. Ukıtuçılar turında aerım äytep kitäsem kilä.

Elwira Kamaletdinowa belän Elena Kalitowa «Oxford street» mäktäbendä ukıtalar. Min alar belän «Discover KFU» alanında tanıştım. Yaxşı belgäç, «TALKış käläwe»gä dä çakırırga buldım. Öçençe ukıtuçı – Emiliya Şakirowa. Anı miña Dilärä apa Söläymanowa täkdim itte. Xäzer minem tormışımda tagın ber şäp keşegä kübräk. Bezneñ ukıtuçılarnıñ töp sere alarnıñ materialnı kızıklı itep birüendä, üz eşläre belän yanıp yörüendä bulgandır dip uylıym. Bu yanu balalarga da küçä.

Şulay uk bez törle kwizlar häm kwestlar da uzdırdık. Spikerlarıbız iskitkeç ide: Niyaz Rastamowiç – TR Prezidentınıñ sinxron tärcemäçese häm KFU ukıtuçısı; Lyu Mançju – magistraturanıñ berençe kurs studentı. Balalar bik şatlandı! Häm barısı da inglizçä buldı bit äle!

– Iñ awırı närsä buldı?

– Döresen genä äytkändä, mondıy komanda belän bötenese dä ciñel buldı! Böten problemalar da tiz arada xäl itelde. Ä iñ kıenı balalarnı cıyu bulgandır. Küçmä mäktäp berençe tapkır gına uzdı, östäwenä, uku elı urtasında buldı bit.

– Komandada eş niçek bülengän ide?

– Härkemneñ üz eşe bar ide. Minem komandam iñ yaxşısı ide, dip kat-kat äytä alam. Bez proektnı Kamilä Rizwanowa belän başlap cibärdek. Başlangıç etapta Miläüşä Safina bik bulıştı, ideya häm logotipnı uylaştı. Annarı bezgä Damir Miñnegulow kuşıldı häm şulay çılbır buença däwam itte. Ildus Usmanow söyläm klubı oçraşularına kilä ide. Rafael Kamaliewnı Damir çakırdı. Ä Ayaz Xänäfinga 100% ışana idem, şuña kürä di-djey itep çakırdım. Ber süz belän äytkändä – iñ şäp keşelär!

– Tieşle näticälärgä ireşelde dip sanıysıñmı?

– Hiçşiksez! Älbättä, tagın da yaxşırak itep eşlise kilä. Şulay bulaçak ta äle, min moña ışanam!

– Küçmä mäktäp katnaşuçıları belän elemtä däwam itäçäkme?

– Älbättä! Här atnanı söyläm klubı kısalarında oçraşular ütä, bez anda kızıklı spikerlarnı çakırabız. Teläge bulgan här keşegä kerü irekle. Menä ikençe atnaga düşämbe bik kızıklı kunak kiläçäk. Anıñ turında tizdän instagramda üzebezneñ @talkysh_klv säxifäsendä yazaçakbız. Ideyalär bik küp, tik alar turında söylise tügel, alarnı gamällär häm näticälär belän kürsätäse kilä. Monıñ öçen bezneñ yañalıklarnı küzätep barırga gına kiräk.

Kamilä RIZWANOWA, küçmä mäktäp katnaşuçısı:

– Minem öçen «TALKış käläwe» – ul tarix, bez üzebez yaza torgan tarix. Proekt äle küptän tügel genä barlıkka kilde häm anıñ küz aldında küçmä mäktäp däräcäsenä üsüen kürü şundıy räxät. Proektnıñ citäkçese Dilärä Kärimullinaga zur räxmät! Ul uñışka ışandı häm maksatka yul yarıp bardı, ä bez anıñ artınnan iyardek. Kiläçäktä Sälät atmosferasın böten tellärdä dä buldırıp, tagın da üsärbez dip ışanam!

Danil YuRINOW, küçmä mäktäp katnaşuçısı:

– Berençedän, proekt üzeneñ belem birü eşen cirenä citkerep başkardı. Bez telne tagın da yaxşırak üzläştersen öçen, oeştıruçılar ingliz telle moxit buldırgan ide. Bu bik möhim, çönki mäktäptä söyläm tele, «tere» tel öyränelmi diyarlek. Şäxsän min, küçmä mäktäptän kaytkaç, gadät buença, berniçä tapkır süzne ingliz telendä başladım. Ikençedän, küçmä mäktäptä min yañadan Sälät atmosferasına çumdım. Ixlas söyläşülär, küñel açu, biyulär, cırlar. Sälätkä berençe tapkır baruçılar, küçmä mäktäpne saylap, bik döres eşlägän dip uylıym, çönki Sälättäge böten yaxşı närsä «TALKış käläwe» küçmä mäktäbendä tuplangan ide.