Kır şartlarında turı efir! Katlaulı, ämma mömkin eş! ← kire kaytirga

X Xalıkara «Sälät» yaşlär uku-ukıtu forumında «SeletLive» studiyase eşli. Kır şartlarında gamälgä aşırıla torgan proekt tamaşaçılarnı kön saen forum territoriyasendäge yañalıklar belän tanıştıra, kızıklı interwyu häm reportajlar büläk itä. Tabigat koçagında turıdan-turı efir niçek äzerlänä? Unikal proekt ideyase niçek tugan? Proektnıñ prodyuserı Almaz Sämigullinnan beleştek. 

– Almaz, «Sälät» forumında «SeletLive» studiyase buldıru ideyase niçek barlıkka kilde? 

– Forum territoriyasendä «SeletLive» inde ikençe elın eşli. Ideyase kötelmägändä tudı. Ber yamannıñ ber yaxşısı bula, dilär bit: pandemiya säbäple uzgan elnı küp kenä watandaşlarıbız Bilärgä kilä almıy kaldı. Sälät moxiten alarga da kürsätäsebez kilde. Kiçke çaralardan turıdan-turı efirga çıgarga kiräk digän fiker tora-bara zur ber tapşıru, kiçke şou äzerläügä kadär barıp citte. Alıp baruçı, aerım säxifälär, kunaklar, icadi nomerlar barlıkka kilde. Xäzer menä aerım studiyabez, maxsus çıgarılışlarıbız bar! Bezne Sälät dönyası belän tanışırga telägän härkem karıy ala. Auditoriyabez kiñ: sälkeşlärneñ äti-äniläre, tugannarı, dusları, çit illärdä yaşäüçe watandaşlarıbız Sälät moxiten öydän çıkmıyça da toya ala.

– Kır şartlarında turıdan-turı efirda eşli torgan studiya buldıru kıyulık ta sorıy...

– Äye, turı efirlar alıp baru texnik yaktan şaktıy katlaulı. Kızganıçka karşı, kıtırşılıklar da bula. Läkin bez kır şartlarında masştablı proektlar eşlärgä öyränäbez. Uzgan el isä efirnı niçek äzerläyaçägebezne küz aldına da kiterä almıy idek. Küp äyberlärgä eş barışında öyrändek. Xäzer inde täcribäbez bar. Kontentnıñ sıyfatın yaxşırtırga tırışabız. Bez tabigat koçagında eşlibez. Şuña kürä, kötelmägän syurprizlar da bulgalıy: küñelleläre dä, beraz käefne kıra torgannarı. Komandabız zur: rejisserlar, kreatiw tudıruçılar, operatorlar, alıp baruçılar bar. Härkem üz urınında. Çılbırnıñ ber öleşe genä bulmasa da, struktura tarkalaçak häm eşen tieşençä başkara almayaçak. Turı efirda eşläü katlaulı, ämma mömkin eş.

– «SeletLive» komandasında kemnär eşli? 

– «SeletLive»ta şäp moxit xökem sörä. Komandada eşläüçelärneñ kübese Sälättä üskän keşelär. Çittän dä belgeçlär kilde. Monda bar da gadi: komandada üz eşen yaratıp başkargan keşelär. Maksat – härkem öçen uñaylı bulgan moxit tudıru. Şulay bulganda gına yugarı näticägä ireşergä bula.

– Mondıy proektnı gamälgä aşıru öçen küp çıgımnar da kiräkter?

– Bez bıel Yaşlär eşläre federal agentlıgı häm Resurslar yaşlär üzäge oeştırgan Bötenrossiya yaşlär proektları konkursı grantın ottık. Şul räweşle, translyatsiyalärneñ sıyfatın yaxşırtuga ireşä aldık. Kiläçäktä närsälär kötäçägen aldan farazlap bulmıy, älbättä. Ämma alga taba da xıyallarıbız, maksatlarıbız bar. Bıel 4 smenada tapşırular eşläsäk, ä kiläse elda «SeletLive» forum bue efirga çıksa, şäp bulır ide dip uylıybız! Maxsus çıgarılışlarnı da kübräk töşeräse kilä.

– Ä maxsus çıgarılış gadi efirdan närsäse belän aerıla? 

– Gadi çıgarılışta alıp baruçı studiyadä utıra, yañalıklar söyli, kunaklar belän oçraşa. Ä maxsus digäne layw formatında uza, yagni xäzerge minutta närsä bara, şunı kürsätäbez, turı efirga zur masştablı çaralardan çıgabız. Şunda uk alıp baruçı katnaşuçı häm oeştıruçılar belän äñgämä kora.  ARTS BILER FORUM-da şundıy maxsus efir 30 nçı iyundä kürsäteläçäk. Säxnädä icadi laboratoriyalär eşçänlege näticälären täkdim iteläçäk. Maksatıbız – kontsertnı mömkin kadär kübräk tamaşaçıga kürsätü. SELET BILER FORUM-dagı maxsus efir isä alannarnı täkdim itü kiçäsennän bulaçak.  Uzgan ellarda anı säxnä karşında utıruçılar gına kürä ala ide. Ä bit ul Sälät öçen bik möhim çara! Häm, nihayat, alannar prezentatsiyasen onlayn da karap bulaçak.

«SeletLive» studiyaseneñ onlayn-translyatsiyaläre Sälätneñ «WKontakte», Instagram häm YouTubetagı räsmi akkauntlarında kürsätelä.