Söläyman häm şigriyat söyuçelärneñ oçraşuı ← kire kaytirga

Kiçä Sälät Yortında yazuçı Söläyman häm şigriyat söyuçelärneñ oçraşuı uzdı. Biredä kunaklar arasında şagıyr, Däülät premiyase laureatı, Räsäy Federatsiyaseneñ Däülät premiyase laureatı, Tatarstan Respublikasınıñ G. Tukay isemendäge premiya laureatı Renat Xaris, şagıyr, professional yazuçı, Tatarstannıñ Xalık şagıyre, RSFSRnıñ Atkazangan sängat eşleklese, G. Tukay, M. Cälil isemendäge Däülät premiyase laureatı Rawil Fäyzullin da buldılar.

Şigriyatkä bagışlangan kiçäne maxsus muzıkal büläk belän «D`art» xor-studiyase başlap cibärde. Cırçılar, barlık kilgän kunaklar igtibarına Söläyman süzlärenä icat itelgän 2 cır täkdim ittelär. Kiçäneñ geroe äytüençä, kiçäneñ näk menä şulay başlanıp kitüe, çaraga ber üzençälekle, kabatlanmas moxit kertte.

«Belgänebezçä, 21-nçe fewral – Tugan tel köne. Bezneñ oçraşuıbıznıñ da näk menä bügen oeştırıluı yukka gına tügel. Bügen, biredä, bez gailä, dustanä moxittä möhim temalarga söyläşerbez, sezneñ belän üzebezneñ icatıbız belän urtaklaşırbız», dip – başlap cibärde kiçäne şagıyr Söläyman.

Älege kiçädä yazuçılar fälsäfä, bügenge ädäbiyat urını, tugan, tatar telen saklau häm üsterü kıenlıkları turında söyläştelär.

Oçraşunıñ berençe öleşendä Söläyman Ispaniyadä icat itelgän «Katalun däftäre»nä kergän şigırlären ukıp, tugan yagın, tugan moxitne sagınuı turında urtaklaştı.

Kiçäne däwam itep üzeneñ icat cimeşlären möxtäräm kunaklarıbız da ukıp, añlatıp kittelär.

Bügenge ädäbiyat temasına kagılgannan soñ, Renat Xaris mondıy fikerne belderde: «Kızganıç, läkin, xäzerge wakıtta, çınnan da, däülät premiyasenä iya bulırlık äsärlär yuk. Monıñ töp säbäbe närsädä ikänen añlap betermim. Tik, anıñ wakıt, zaman belän bäyle ikänlegendä inandım dip sanıym».

«Keşedän barlık bulgan baylıklarnı, äyberlärne tartıp alırga mömkin. Läkin, barı tik 1 närsäne genä keşedän alırga mömkin tügel. Ul – tel. Tugan telebez bezneñ iñ zur baylıgıbız ikänen añlasak ide», – dip fikerläre belän urtaklaştı yazuçı Rawil Fäyzullin.

Oçraşunıñ tagın ber öleşen aerıp bula. Biredä böek şäxeslärebez «Yazuçı bulıp tualarmı yaki bulalarmı?» digän fälsäfi sorauga barlık kilgän kunaklarga cawap birergä tırıştılar. Şunısı kızık, 3 şagıyrneñ dä bu sorauga kagılışlı üz fikere bar ide.

Ädäbi kiçä yaşlärneñ yazu säläten tabıp üsterergä häm zaman ädäbiyatın bizärgä kiräk digän teläklär belän tämamlandı.