ARTS BILER FORUM: ikençe kön ← kire kaytirga

Bügen, ARTS BILER FORUM-nıñ ikençe könendä, öç yunäleş (muzıka, biyu, teatr) buença da ostaxanälär ütkärelde. Spikerlar arasında cırçı häm akter, Grigoriy Lepsnıñ prodyuserlık üzäge artistı Danil Buranow; cırçı, «Golos» proektı finalistı, Tatarstannıñ atkazangan artistı Elmira Kalimullina; dramaturg, «Äkiyat» Tatar däülät kurçak teatrı baş rejisserı Ilgiz Zäyniew; biyuçe, «Altın bitlek» milli teatral premiya iyase Nurbäk Batulla, Tatarstan respublikasınıñ atkazangan artistı, Cır häm biyu däülät ansamble solistkası Aygöl Kıyamowa häm başkalar bar ide.

Forum turında spikerlarnıñ berse – Tatarstannıñ atkazangan artistı, cırçı Elmira Kälimullina belän söyläştek.

- ARTS BILER FORUM nindi täesirlär kaldırdı, Elmira?

- Monda şundıy räxät, iskitkeç balalar! Bilär üze, minemçä, ber mogcizalı dönya. Häm bu Forum bik kiräk: balalarnıñ üzlärenä dä, äti-änilärgä dä, xätta äbi-babaylarga da! Çönki bu Forumnan soñ balalarnıñ yaña dusları barlıkka kilä, yaña maksatlar häm proektlar tua! Barı tik Sälättä, ARTS BILER FORUM-da gına şundıy moxit.

- Wokal yunäleşendä katnaşuçılar nindi fikerlär tudırdı?

- Sälätle balalar bik küp. Härber keşe indiwidual, unikal, härberebezneñ üz tizlege bar. Şuña kürä här balanıñ saylangan cırı, kostyumı aşa monı kürergä mömkin.

Älbättä, eş bik küp, häm bu bik äybät! Çönki härber säxnädä çıgış yasaganda üsäseñ – jyuri belän aralaşu, başkalarnı tıñlau. Bez bu materialnı istä kaldırabız, annan soñ kompyuterdan alıngan fayllarday iskä töşerep, analiz yasıybız, üzebezne başka yaktan açuıbıznı añlıybız.

- Balalarga nindi kiñäşlär birer idegez?

-  Berençedän, kurıkmaska. Härber çıgış – ul sineñ soraularıña cawap birü, ul sine moral yaktan da, professional yaktan da üsterä. Ikençedän eşlärgä, muzıkanı yaratırga. Dönya şundıy matur: sin cırlıysıñ, sin biiseñ, , muzıka uen korallarında uynıysıñ, başkalar belän aralaşasıñ. Bu bezne ilhamlandıra, häm bez dönyanı tagın da maturlıybız.

- Forumga nindi teläkläregez bar?

- Minem onıklarım da bu Forumda katnaşırlık bulsın ide. Älbättä, uñışlar telim, häm ARTS BILER FORUM turında böten dönya belsen ide!

Şulay uk bügen ekspertlar yunäleşlär buença katnaşuçılarnıñ çıgışların karadı.

ARTS BILER FORUM kısalarında uzuçı Flüs Latıyfi isemendäge «Sälätkä nur bulgan yoldızlar» maxsus proektı üz eşçänlegen däwam itte.

Ä kiç belän katnaşuçılar öçen Sforzando orkestrı çıgış yasadı.