Sälät aktiwı mäktäbe kısalarında yaña komandalar häm proektlar tudı ← kire kaytirga

Uzgan atna axırında Bilär kalasınıñ «Fänsar» uku-ukıtu üzägendä berençe tapkır Sälät aktiwı mäktäbe uzdı. Mäktäpneñ töp maksatı – Sälät moxite belän tanış bulgan aktiw kızlar-egetlärne Sälät proektlarında katnaştıru häm yaña ideyalär täkdim itü. Çarada Kazan, Bögelmä, Yar Çallı şähärlärennän aktiw studentlar katnaştı. 

Sälät proektları citäkçeläre isä, üz çiratta, Sälätneñ yaña elga eş planı belän tanıştırıp, üz täcribälärennän çıgıp, här yunäleş buença ideyaläre taşıp torgan yaşlärne komandada kürü niyate belän çıktılar. 
Programma törle çaralarga bay ide, öç kön däwamında yul kartasın tözep, yaña proektlar buença da fiker alıştılar. 

Sälätneñ öç törle moxit buluın istä totıp, kübräk tatar häm ingliz telenä basım yasarga kiräklege turında da äñgämä kordılar. 

Media yunäleşendä eşlägän komanda Sälätneñ yutub kanalın populyarlaştıru uñaennan yaña ideyalär täkdim itte. 

Sportka kagılışlı fikerlär dä küp buldı. Törle ostaxanälär ütkärü, yaña turnirlar, kızıklı şäxeslär belän oçraşu häm bolarnı barısın da küçmä sessiyalärdä uzdıru aerım ber fiker bularak yañgıradı. 

Şulay uk Sälätneñ üz teatrın, KWN komandasın buldıru da yañalık bulır ide dide aktiw yaşlär. 

Älege mäktäpne uzdıru alga taba da kiräkle eş dip belderde Sälät klubı prezidentı Igor Smirnow: «Kızlar-egetlär kiçäge sälkeşlär buluga karamastan härberse üzençälekle, töple fikerle. Sälätneñ bügenge proektlarında gına tügel, üzläre tudırırga telägän proektlarda da katnaşu teläge belän yanıp yörilär. «Sämrux», «Äydamannar mäktäbe», M.I. Mäxmütow isemendäge «Fänsar» mäktäbe eşçänlegendä dä üz öleşlären kertergä niyatlilär. Mäktäp uzgan wakıt eçendä bez şunı añladık: Sälät moxiten yaña ideyalär belän tulılandıruçı sälätle yaşlär bar häm bez moña bik şat».